ށ. ޅައިމަގުގައި ލެބޯޓަރީގެ ޚިދުމަތް ފަށައިފި

ށ.ޅައިމަގުގައި ޞިއްޙީ މަރުކަޒުގައި ލެބޯޓަރީގެ ޚިދުމަތް ފަށައިފިއެވެ. ޅައިމަގުގައި މި ޚިދުމަތް ފައްޓަވައިދެއްވީ، ޞިއްޙަތާއި ޢާއިލާއާއި އިޖްތިމާޢީ އެހީއާއި ބެހޭ ވަޒީރު ޤީލާ ޢަލީއެވެ.

ޅައިމަގުގަ ޞިއްޙީ މަރުކަޒުގައި ލެބޯޓަރީގެ ޚިދުމަތް ފެށުމަށް މިއަދު އެރަށުގައިވަނީ، ޚާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި ޞިއްޙީ ވަޒީރު ޤީލާ ޢަލީގެ އިތުރުން ޞިއްޙީ ވުޒާރާގެ އިސްވެރިންނާއި، ޅައިމަގުގެ ކައުންސިލްގެ އިސްވެރިންނާއި، ސިއްޙީ މަރުކަޒުގެ އިސްވެރިން ބައިވެރިވެ ވަޑައިގެންނެވިއެވެ.

ށ. ޅައިމަގުގެ ޞިއްޙީ ޚިދުމަތް އިތުރަށް ފުޅާކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިދިޔަ އަހަރު ޅައިމަގަށް ވަޑައިގެން އެރަށު ރައްޔިތުންނާއި ބައްދަލުކުރައްވާ ވަނީ ވިދާޅުވެފައެވެ. ޞިއްޙީ މަރުޒަކުގެ އައު އިމާރާތް ކުރާއިރު ޚިދުމަތް 16 ގަޑިއިރަށް ބަދަލުކުރާނެކަމަށާއި އަދި އައު އިމާރަތް ތަރައްޤީ ކުރަނީ 4 އެނދާއި ލެބޯޓަރީ އެހެނިހެން ވަސީލަތްތައް ހިމަނައިގެންކަން ރައީސް ވަނީ ފާހަގަކުރައްވާފައެވެ.

ރާއްޖޭގެ މީހުން ދިރިއުޅޭ ހުރިހާ ރަށެއްގައި ލެބޯޓަރީގެ ޚިދުމަތް ޤާއިމުކޮށްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ރިޔާސީ ވަޢުދުފުޅެކެވެ. އެގޮތުން މިހާތަނަށް ލެބޯޓަރީގެ ޚިދުމަތް ލިބެން ނެތް 76 ރަށެއްގައި މި ޚިދުމަތް ޤާއިމުކުރުމުގެ މަސައްކަތް ސަރުކާރުން މިހާރު ދަނީ ވަރަށް ބާރު ސްޕީޑެއްގައި ކުރިއަށް ގެންދަމުންނެވެ. ޅައިމަގުގެ އިތުރުން މި ސަރަޙައްދުގެ އެހެން ރަށްރަށުގައިވެސް މިފަދަ ޚިދުމަތްތައް ފުޅާކުރުމަށް ސަރުކާރުން ދަނީ އިސްކަންދެމުންނެވެ. ޅައިމަގުގައި ހުޅުވިގެން މިދިޔައީ މި ސަރުކާރުން އަތޮޅުތަކުގައި ހުޅުވި 20 ވަނަ ލެބޯޓަރީއެވެ.

ލެބޯޓަރީގެ ޚިދުމަތް ނެތް ރަށްރަށުގެ ރައްޔިތުން އާންމު ޓެސްޓުތައް ހެދުމަށްޓަކައި އެހެން ރަށްރަށަށް ދަތުރުކުރަން ޖެހުމަކީ ބޮޑު ތަކުލީފެކެވެ. މީގެ ކުރިން ޅައިމަގު އަދި މިފަދަ އެހެން ރަށްރަށުގެ ރައްޔިތުންވެސް ކުޑަ ޓެސްޓެއް ހަދާލުމަށްޓަކައި ޖެހެނީ އަތޮޅުގެ ޚިދުމަތް ލިބޭ އެހެން ރަށަކަށް ދަތުރުކުރާށެވެ. ނަމަވެސް، މިއަދު ޅައިމަގު ޞިއްޙީ މަރުކަޒުގައި ލެބޯޓަރީ ޤާއިމުވެގެން ދިއުމާއެކު، އަމިއްލަ ރަށުގައި ތިބެގެން ލޭގެ ޓެސްޓުތަކާއި އެހެނިހެން އަސާސީ ޓެސްޓުތައް ހެދުމުގެ ފުރުޞަތު މިވަނީ ތަނަވަސްވެފައެވެ.

މި ޚިދުމަތާއެކު ރައްޔިތުންގެ ޖީބަށް ބޮޑު ލުޔެއް ލިބިގެންދާނެއެވެ. ދަތުރުފަތުރަށް ހިނގާ ޚަރަދާއި، އެކަމަށް ހޭދަވާ ވަގުތު ސަލާމަތްވެ، ބޮޑު ފަސޭހައެއް ލިބިގެންދާނެ ކަމަށް ރަށުގެ ރައްޔިތުން އުފަލާއެކު ފާހަގަކުރެއެވެ. ޚާއްޞަކޮށް އުމުރުން ދުވަސްވީ މީހުންނާއި ކުޑަކުދިން ގޮވައިގެން ކަނޑު ދަތުރުކުރަން ނުޖެހި، ރަށުން ފަރުވާ ލިބޭނެ މަގު ފަހިވުމަކީ ޅައިމަގު ރައްޔިތުންނަށް ލިބުނު ވަރަށް ބޮޑު ހިތްހަމަޖެހުމެކެވެ.