"އެއް ޖީލުން އަނެއް ޖީލަށް އިލްމު ފޯރުކޮށްދިނުމުގައި އުމުރުން ދުވަސްވީ މީހުންގެ ދައުރު ބޮޑު"

އުމުރުން ދުވަސްވީ މީހުންނަކީ އާއިލާތަކުގެ ބިންގާކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.

އުމުރުން ދުވަސްވީ މީހުންގެ ދުވަހުގެ މުނާސަބަތުގައި ސޯޝަލް މީޑިއާގައި ކުރެއްވި ޕޯސްޓެއްގައި، އުމުރުންދުވަސްވީ މީހުންނަކީ މުޖުތަމަޢުގެ އާދަކާދަތައް ދަމަހައްޓަވައި، އެއް ޖީލުން އަނެއް ޖީލަށް އިލްމާއި ހިކުމަތް ފޯރުކޮށްދެއްވާ ބޭފުޅުންކަމަށްވެސް ފަސްޓް ލޭޑީ ވިދާޅުވިއެވެ. ބައިނަލްއަގުވާމީ ގޮތުން ފާހަގަކުރާ އުމުރުން ދުވަސްވީ މީހުންގެ ދުވަހުގެ މުނާސަބަތުގައި، އެބޭފުޅުން މުޖުތަމައަށް ކޮށްދެއްވަމުން ގެންދަވާ އަގުނުކުރެވޭ ފަދަ ޚިދުމަތްތަކުގެ އަގުވަޒަންކޮށް، އެބޭފުޅުންގެ ހައްގުތައް ރައްކާތެރިކޮށް، ދުޅަހެޔޮކަން ކަށަވަރުކުރުމަށް އަޅުގަނޑުމެން އަޒުމް ކަނޑައަޅަންޖެހޭކަމަށްވެސް އެ ކަމަނާ ވިދާޅުވިއެވެ.

ދުނިޔޭގެ އާބާދީގައި އުމުރުން ދުވަސްވީ މީހުންގެ ނިސްބަތް އިތުރުވެ، އިންސާނުން ދިރިއުޅޭ އުމުރު ދިގުވަމުންދާއިރު، ދިރިއުޅުމުގެ ކޮންމެ މަރުހަލާއެއްގައިވެސް އެކަކު އަނެކަކަށް އަޅާލައި އެހީތެރިކަން ފޯރުކޮށްދޭނެ ގޮތްތަކާ މެދު އަލުން ވިސްނަންޖެހޭކަމަށް ފަސްްޓް ލޭޑީ ސާޖިދާ ވިދާޅުވިއެވެ. އުމުރުން ދުވަސްވީ މީހުންނަށް މުޖުތަމަޢުއާ އޮންނަ ގުޅުން ބަދަހިކުރުމުގެ ފުރުސަތުތައް ފަހިކޮށްދީ، ދުޅަހެޔޮ، ހިތްހަމަޖެހޭ އަދި އަބުރުވެރި ދިރިއުޅުމެއް އުޅުމުގެ މަގު ތަނަވަސްކޮށްދޭންޖެހޭ ކަމަށްވެސް އެ ކަމަނާ ވިދާޅުވިއެވެ.

ސިޔާސަތުތައް ބައްޓަންކުރަންވާނީ ދުޅަހެޔޮކަމާއެކު އުމުރުން ދުވަސްވުމަށް ބޭނުންވާ ދާއިމީ އިންވެސްޓްމަންޓްތަކާއި، ހަރުދަނާ ސިއްހީ ނިޒާމަކާއި، އިޖުތިމާއީ ރައްކާތެރިކަމުގެ އިތުރުން އިގްތިސާދީ ފުރުސަތުތައް ހިމެނޭ ގޮތަށްކަމަށާއި، ގައުމުގެ ތަރައްގީގެ ދަތުރުގައި އުމުރުން ދުވަސްވީ މީހުންގެ ފުރިހަމަ ބައިވެރިވުން ކަށަވަރުކުރުމަކީ، އެންމެންގެ ބައިވެރިވުން ހިމެނޭ، އޯގާތެރި މުޖުތަމައެއް ބިނާކުރުމަށް ކޮންމެހެން ބޭނުންތެރި ކަމެއްކަމަށް އެ ކަމަނާ ވިދާޅުވިއެވެ.

ފަސްޓް ލޭޑީ ވިދާޅުވީ ދުޅަހެޔޮކަމާއެކު ދިރިއުޅޭ އުމުރު ދިގުކޮށްދީ، އުމުރުން ދުވަސްވުމުގައި ކޮންމެ މީހަކަށްވެސް ކުރިމަތިވާ ތަފާތު ތަޖުރިބާތައް ބަލައިގަނެގެން، ކޮންމެ މީހަކީވެސް އަބުރުވެރިކަމާއި، މަގްސަދެއް އޮތް އަދި ރައްކާތެރި ދިރިއުޅުމެއްގައި އުމުރުން ދުވަސްވާ މީހަކަށް ހެދުމަށް މަސައްކަތްކުރަންޖެހޭ ކަމަށެވެ.