މިދިޔަމަހު 900 އަށްވުރެ ގިނަ މައްސަލަ: އެންމެ ގިނައީ ވައްކަން

ނިމިދިޔަ ސެޕްޓެންބަރު މަހު އެކަނިވެސް ޖުމްލަ 924 މައްސަލައެއް ފުލުހުންނަށް ހުށަހަޅާފައިވާކަމަށް ދިވެހި ފުލުހުންގެ ޚިދުމަތުގެ ތަފާސްހިސާބުތަކުން ދައްކައިފިއެވެ.

ފުލުހުންގެ ތަފާސްހިސާބުތައް ދައްކާގޮތުން ސެޕްޓެންބަރު މަހު ހުށަހެޅުނު މައްސަލަތަކުގެ އެންމެ ބޮޑު އިންސައްތައެއް ހިއްސާކުރަނީ ވައްކަމުގެ މައްސަލަތަކެވެ. ވައްކަމުގެ 277 މައްސަލައެއް ރިޕޯޓްކޮށްފައިވާއިރު، ދެވަނައަށް އެންމެ ގިނައީ މަގުމަތީގެ އެކްސިޑެންޓުތަކުގެ މައްސަލަތަކެވެ. އެއީ 222 މައްސަލައެވެ.

ސެޕްޓެންބަރު މަހު ހުށަހެޅި މައްސަލަތައް:

• ވައްކަން: 277 މައްސަލަ
• މަގުމަތީގެ އެކްސިޑެންޓު: 222 މައްސަލަ
• މަސްތުވާތަކެތި: 165 މައްސަލަ
• ގެއްލުނު މުދާ: 69 މައްސަލަ
• ތަކެއްޗަށް ގެއްލުންދިނުން: 57 މައްސަލަ
• މާރާމާރީ: 49 މައްސަލަ
• ޚިޔާނާތް: 30 މައްސަލަ
• ގެވެށި އަނިޔާ: 23 މައްސަލަ
• ޖިންސީ ކުށްތައް: 14 މައްސަލަ
• މަކަރާއި ޙީލަތް: 9 މައްސަލަ
• ފޭރުން: 9 މައްސަލަ

މިއަހަރުގެ ފުރަތަމަ 4 މަސްދުވަހު މަހަކު އެވްރެޖުކޮށް 1,000 އަށްވުރެ ގިނަ މައްސަލަ ހުށަހެޅުނުއިރު، މެދުތެރެއިން ފެށިގެން އާންމު ކުށްތަކުގެ އަދަދު ވަނީ ވަކިވަރަކަށް ކޮންޓްރޯލް ކުރެވިފައެވެ.

މިއަހަރުގެ މިހާތަނަށް މުޅި ޖުމުލަ 9,454 މައްސަލަ ފުލުހުންނަށް ހުށަހަޅާފައިވެއެވެ. މީގެ ތެރެއިންވެސް އެންމެ ގިނައިން ރިޕޯޓްކޮށްފައިވަނީ ވައްކަމާއި މަގުމަތީގެ އެކްސިޑެންޓުތަކުގެ މައްސަލަތަކެވެ. އެގޮތުން ވައްކަމުގެ 2,610 މައްސަލައާއި، 2,273 އެކްސިޑެންޓު ރިޕޯޓުކޮށްފައިވެއެވެ.

މިދިޔަ އަހަރުގެ ސެޕްޓެންބަރު މަހު ހުށަހެޅުނު މައްސަލަތަކުގެ ނިސްބަތަށް ބަލާއިރު، ވައްކަމުގެ މައްސަލަތަކާއި މަސްތުވާތަކެތީގެ މައްސަލަތައް މިއަހަރުގެ ސެޕްޓެންބަރު މަހު ވަނީ ދަށްވެފައެވެ. އެގޮތުން އެއަހަރުގެ ސެޕްޓެންބަރު މަހު މުޅި ޖުމުލަ 1,142 މައްސަލަ ރިޕޯޓުކޮށްފައިވެއެވެ.

ފުލުހުން މަސައްކަތް ކުރަމުންދަނީ މަގުމަތީގެ ރައްކާތެރިކަން އިތުރުކުރުމަށާއި، ވައްކަމާއި މަސްތުވާތަކެތީގެ މައްސަލަތައް މަދުކުރުމަށް ޚާއްޞަ ފިޔަވަޅުތަކެއް އަޅަމުންނެވެ.