ނިހާލްގެ ރެކޯޑު މުގުރާލައި އެންމެ އަވަސް ގޯލުގެ ރެކޯޑު ސިމާހުއަށް

އެފްއޭއެމް ފުޓްސަލް ޒޯން ޗެމްޕިއަންޝިޕުގައި އެންމެ އަވަސް ލަނޑުޖެހި ކުޅުންތެރިޔާގެ ރެކޯޑު، ހިންނަވަރުގެ އިބްރާޙީމް ސިނާހު ހޯދައިފިއެވެ.

އޭނާ މި ރެކޯޑު ހެދީ، ތުޅާދޫއާއި ހިންނަވަރު، ނޯތު ޒޯން 2ގައި އަންގާރަ ދުވަހުގެރޭ ބައްދަލުކުރި މެޗު ފަށައިގެން 20 ސިކުންތުގެ ތެރޭގައި ލަނޑު ޖަހައިގެންނެވެ. މި މެޗުން ހިންނަވަރު މޮޅުވީ 2-3 ގެ ނަތީޖާއަކުންނެވެ.

ސިނާހުގެ ކުރިން މި ރެކޯޑު އޮތީ ކަނޑިތީމުގެ ހުސެއިން ނިހާލް އަތުގައެވެ.

އޭނާ މި ރެކޯޑު ހެދީ ނޯތު ޒޯން 1ގައި ކަނޑިތީމާއި ހަނިމާދޫ ބައްދަލުކުރި މެޗުގައި ޖެހި ފުރަތަމަ ލަނޑާއެކުއެވެ.

2-6ގެ ނަތީޖާއަކުން ކަނޑިތީމު މޮޅުވި މި މެޗުގައި ނިހާލް ލަނޑުޖެހީ 34ވަނަ ސިކުންތުގައެވެ.

މި ރެކޯޑު ހެދުމުގެ އިތުރުން މެޗުގައި ކަނޑިތީމުން ޖެހި ހަ ލަނޑުގެ ތެރެއިން ތިން ލަނޑު ކާމިޔާބުކޮށްދީ ނިހާލް ވަނީ ހެޓްރިކް ހަދާފައެވެ. ޒޯން ޗެމްޕިއަންޝިޕުގައި 12 މެޗު ކުޅެފައިވާއިރު އަދި އެހެން އެއްވެސް ކުޅުންތެރިއަކަށް ހެޓްރިކް ހެދިފައެއް ނުވެއެވެ.

ނިހާލް އެޓީމަކަށް ނިސްބަތްވާ ކަނޑިތީމުން މިހާތަނަށް މުބާރާތުގައި ދެ މެޗު ކުޅެފައިވާއިރު ދެވަނަ މެޗުގައި ފިއްލަދޫއާ ދެކޮޅަށް ކުޅެ ކަނޑިތީމު ވީ އެއްވަރެވެ.

ކަނޑިތީމު ހިމެނެނީ ނޯތު ޒޯން1 ގައި ނައިވާދޫ، އިހަވަންދޫ، ފިއްލަދޫ އަދި ހަނިމާދޫއާ އެކުއެވެ. ފަސް ޓީމުން ވާދަކުރާ މި ޒޯނުގެ ޗެމްޕިއަނުން ކަނޑައަޅާނީ ރައުންޑް ރޮބިން އުސޫލުން ކޮންމެ ޓީމެއް، ކޮންމެ ޓީމަކާ ކުޅުމަށްފަހު އެންމެ ރަނގަޅު ނަތީޖާއެއް ހޯދާ ދެޓީމުގެ މެދުގައި ފައިނަލް މެޗެއް ކުޅެގެންނެވެ.

އެންމެ އަވަސް ލަނޑުޖެހި ރެކޯޑު ހަދާފައިވާ ސިމާހު އެ ޓީމަކަށް ނިސްބަތްވާ ހިންނަވަރުން ވަނީ ނޯޓު ޒޯން 2 ގެ ގްރޫޕް އޭގެ ދެވަނަ ހޯދައިގެން އެ ޒޯނުގެ ސެމީގެ ޖާގައެއް ހޯދާފައެވެ.

އެ ގުރޫޕުގައި ދެން ހިމެނެނީ އިނގުރައިދޫ، ތުޅާދޫ އަދި މަނަދޫއެވެ. ގުރޫޕުގެ އެއްވަނަ ހޯދީ ކުޅުނު ތިން މެޗުވެސް ކާމިޔާބުކުރި އިނގުރައިދޫއެވެ. ދެވަނައިގައި ހިންނަވަރު އޮތީ ހަ ޕޮއިންޓާއެކުއެވެ. ތިންވަނަ ހޯދި ތުޅާދޫއިން ތިން ޕޮއިންޓު ހޯދާފައިވާއިރު ފުލުގައި މަނަދޫ އޮތީ ޕޮއިންޓެއް ނުލިބިއެވެ.

ނޯތު ޒޯން 2 އިން ގުރޫޕު ބީގައި ހިމެނޭ ރ. ދުވާފަރާއި ނ. މަގޫދޫއިން ވެސް ސެމީގެ ޖާގައެއް ހޯދާފައިވާއިރު ފުޓްސަލްގެ ގަދަބާރު، އޭދަފުއްޓަށް ވަނީ ޕޮއިންޓެއް ނުލިބި މުބާރާތް ނިމިފައެވެ.