ގްރޭން ކެނޭރިއާގައި އިޔަންއާ އާމިން ވާދަކުރަނީ

އައިބީސީ ވޯލްޑް ޓުއާގައި ހިމެނޭ ގްރޭން ކެނޭރިއާ ފްރޮންޓޮން ކިންގްގައި ރާއްޖޭގެ އުންމީދީ ބޮޑީބޯޑަރު އިޔަން އަހުމަދާއި، މިދިޔަ އަހަރުގެ ގައުމީ ލީގުގެ ޗެމްޕިއަން އާމިން އުމަރު މޫސާ ވާދަކުރަން ނިންމައިފިއެވެ.

މި މުބާރާތުގެ ޖޫނިއާ ކެޓަގަރީގެ ސްލޮޓް އިޔަން ކާމިޔާބުކުރީ ރާއްޖޭގައި ބޭއްވި، އައިބީސީ ވޯލްޑް ޓުއާ މުބާރާތް "މޯލްޑިވްސް ޕްރޯ"ގެ ޖޫނިއާ ކެޓަގަރީގެ ޗެމްޕިއަންކަން ހޯދައިގެންނެވެ.

މި މުބާރާތުގެ ޖޫނިއާ ކެޓަގަރީގައި ރާއްޖޭގެ އިޔަންގެ އިތުރުން ނޫހު މުހައްމަދު ދުނައިމް އިރުޝާދު އާއި ދާއިން އަބްދުލް ފައްތާހު އަށްވެސް ވާދަކުރުމުގެ ފުރުސަތު ވަނީ ލިބިފައެވެ. އެކަމަކު އެކި ސަބަބުތަކާހުރެ މި ދެ އެތުލީޓުން މި މުބާރާތުގައި ވާދަނުކުރާނެއެވެ.

އައިބީސީން އާންމުކުރި ލިސްޓުގައި ވާގޮތުން ފްރޮންޓޮން ކިންގުގެ ޖޫނިއާ ކެޓަގަރީގައި ބައިވެރިވާނީ 48 އެތުލީޓުންނެވެ.

މި މުބާރާތުގެ ޖޫނިއާ ކެޓަގަރީގައި ރާއްޖޭގެ އިޔަން ވާދަކުރާއިރު، މެންސް އޯޕަން ކެޓަގަރީގައި ޒުވާން ތަރި އާމިންވެސް ވާދަކުރާނެއެވެ. އާމިން ވާދަކުރާނެކަން އޭނާ ވަނީ މޯލްޑިވްސް ޕްރޯ މުބާރާތައް ފަހު ހާމަކޮށްފައެވެ.

އާމިން އާއި އިޔަން ވަނީ މި އަހަރު މޮރޮކޯގައި ކުރިއަށްދިޔަ އައިބީސީ ވޯލްޑް ޓުއާ މުބާރާތުގައި ވެސް ވާދަކޮށްފައެވެ. އެ ފަހަރު އާމިންއާ، އިޔަންގެ އިތުރުން ދެން ވާދަކުރީ ރާއްޖޭގައި އުފެދުނު އެންމެ މޮޅު ބޮޑީބޯޑަރު އަލީ ޚުޝްރުވާން އަހުމަދު (ކުޑަ އައްޔަ) އެވެ.

ސްޕެއިންގެ ކެނޭރިއާ އައިލަންޑްގައި ކުރިއަށްދާ މި މުބާރާތް ފަށާނީ އަންނަ މަހުގެ 17 ގައެވެ.