"އޭޝިއަން ގޭމްސްއަކީ އެތުލީޓުންނަށް ލިބުނު ބޮޑު ތަޖުރިބާއެއް"

ޖަޕާނުގައި ކުރިއަށްދާ އޭޝިއަން ގޭމްސްގެ ތަޖުރިބާއިން ކުރިއަށް އޮތް ސައުތު އޭޝިއަން ގޭމްސްއަށާއި އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ގިނަ ފައިދާތަކެއް ކުރާނެކަމަށް މޯލްޑިވްސް އޮލިމްޕިކް ކޮމިޓީގެ ޖެނެރަލް ސެކެޓްރީ ތަމޫހު އަޙްމަދު ސައީދު ވިދާޅުވެއްޖެއެވެ.

ޖަޕާނުގައި ހުންނަވާ ޕީއެސްއެމް ނިއުސްއާ ވާހަކަދައްކަވަމުން ތަމޫހް ވިދާޅުވީ އޭޝިއަން ގޭމްސްގައި ވާދަކުރަމުންދާ ޤައުމީ އެތުލީޓުންނަށް އޭޝިއަން ގޭމްސްގެ ސަބަބުން ގިނަ ކުރިއެރުންތަކެއް އައިކަމަށް ޤަބޫލުކުރައްވާކަމަށެވެ. އެގޮތުން ތަފާތު މެޗު ތަޖުރިބާތައް މުބާރާތުގެ ސަބަބުން ދިވެހި އެތުލީޓުންނަށް ލިބުނުކަން ތަމޫހް ފާހަގަކުރެއްވިއެވެ.

މިއީ އޭޝިއާގައި ކުރިއަށްދާ މަލްޓި ސްޕޯޓްސް އެންމެ ބޮޑު އެއް އިވެންޓަށްވާއިރު، މިމުބާރާތުގެ ސަބަބުން ދިވެހި ކުޅުންތެރިންނަށް އެކި ފެންވަރުގެ ތަފާތު ސްޓައިލްތަކުގެ ކުޅުންތެރިންނާ ވާދަކޮށްލުމުގެ ފުރުސަތު ފަހިވެގެންދިޔަކަން ތަމޫހް ފާހަގަކުރެއްވިއެވެ.

"ރާއްޖޭގެ ހުރިހާ އެތުލީޓުންނަށް ވަރަށް ބޮޑު ކުރިއެރުންތަކެއް އައި. މި ލެވެލްގެ ގޭމްސްއެއްގައި ވާދަކޮށް ތަޖުރިބާތަކެއްވެސް ލިބުނު. ރާއްޖޭގެ އެތުލީޓުން ބޭނުންވަނީ ގިނަ ކޮމްޕެޓެޓިވް މެޗުތަކެއް. މިއީ ވަރަށް މުހިންމު ގޭމްސްއެއް. ސައުތު އޭޝިއަން ގޭމްސް އާއި އައިއޯއައިޖީ ކުރިމަތީގައި އޮތް އިރު" ތަމޫހް ވިދާޅުވިއެވެ.

މިފަހަރު އޭޝިއަން ގޭމްސްގެ ތެރެއިން އެކޮމަޑޭޝަންގެ މައްސަލަތަކެއް ފެންމަތިވެ، ޖަޕާނަށް ގިނަ ބައެއްގެ ފާޑުކިއުންތައް އަމާޒުވެފައިވާއިރު، އެކަމާ ގުޅޭގޮތުން ތަމޫހް ވިދާޅުވީ ދިވެހި އެއްވެސް އެތުލީޓަކަށް އެކަމުގެ އަސަރެއްނުކުރާކަމަށެވެ.

ދިވެހި އެތުލީޓުންގެ ކަންކަން އެމްއޯސީއިން ވަރަށް ގާތުން ބަލަމުންދިޔަކަމަށާ، ދިވެހި ކޮންޓިންޖެންޓް ޖަޕާނަށް އެތެރެވީއިރުވެސް ހުރިހާ ކަމެއް ހަމަޖެހިފައިވާކަން ތަމޫހް ފާހަގަކުރެއްވިއެވެ. މީގެ އިތުރުން ރާއްޖޭގެ ކޮންޓިންޖެންޓްގެ ހާލުވެސް ރަނގަޅުކަމަށް ތަމޫހް ވިދާޅުވިއެވެ.