އެއް ދުވަހުގެ ކްރިކެޓް މެޗުތަކުގައި 15000 ލަނޑު ހަމަކޮށް އިންޑިޔާގެ ކްރިކެޓް ކުޅުންތެރިޔާ ވިރާތު ކޯލީ ތާރީޚުން ޖާގަ ހޯދައިފި އެވެ.
އޭނާއަކީ މިއަދަދު ހަމަކުރި ދެ ވަނަ ކުޅުންތެރިޔާއެވެ. އަނެއް ކުޅުންތެރިއަކީ އިންޑިޔާގެ ކުރީގެ ކެޕްޓަން އަދި މިހާރު ރިޓަޔާ ކޮށްފައިވާ އިތުބާރު ބެޓްސްމަން ސަޗިން ޓެންޑުލްކަރެވެ.
ވިރާތު 15000 ލަނޑު ހަމަކުރީ އާދިއްތަ ދުވަހު ވެސްޓް އިންޑީޒް އަތުން 8 ވިކެޓުން އިންޑިޔާ މޮޅުވި މެޗުގައެވެ. މި މެޗުގައި ކޯލީ ވަނީ ނުބައިނުވެ 139 ލަނޑު ހަދާފައެވެ. ނަމަވެސް މެޗަށް ފަހު އޭނާ ބުނީ މިއީ އެއްގޮތަކަށް ވެސް އޭނާ ވިސްނައިގެން ހުރި ކަމެއް ނޫން ކަމަށެވެ.
"އަހަރެން މިހިސާބަށް ދެވިދާނެ ކަމަށް ނުވިސްނަން. އެކަމަކު މި ހިސާބަށް އާދެވުނީމާ ވަރަށް އުފާވެއްޖެ. މިއީ ހަގީގަތުގައި ވެސް ވަރަށް އުފާވެރި ވަގުތު ކޮޅެއް،" ވިރާތު ބުންޏެވެ.
ނަމަވެސް ވިރާތާއި ޓެންޑުލްކަރުގެ މެދުގައި ތަފާތު ތަކެއް އެބަހުއްޓެވެ. ވިރާތު ފަނަރަ ހާސް ލަނޑު ހަމަކުރީ 303 އިނިންގްސްއިންނެވެ. ކެރިއަރުގައި 18426 ލަނޑު ހެދި ޓެންޑުލްކަރު ފަނަރަ ހާސް ލަނޑު ހަމަކުރީ 377 އިނިންގްސްއިންނެވެ. މެޗަށް ފަހު ނޫސްވެރިން އޭނާ ވަށާލައި ގިނަ ސުވާލުތަކެއް އަމާޒު ކުރީ މިހާ އަވަހަށް ފަނަރަ ހާސް ލަނޑު ހަމަކުރުމަކީ އާދައިގެ ކަމެއް ނޫން ކަމަށް ބުނަމުންނެވެ.
މި މެޗުގައި ވިރާތު ހެދި ސައްތަ އަކީ އޭނާގެ ކެރިއަރުގައި މިހާތަނަށް ހެދި 49 ވަނަ ސައްތަ އެވެ. މިއީ ޓެންޑުލްކަރު ވެސް ސައްތަ ހަދާފައިވާ އަދަދެވެ. ތިން ވަނަ އަށް އެންމެ ގިން ސައްތަ ހެދި އިންޑިޔާގެ ކުޅުންތެރިއަކީ ރޯހިތު ޝަރުމާ އެވެ. އޭނާ ހަދާފައިވަނީ 34 ސައްތަ އެވެ.
ވިރާތު ކޯލީ އަކީ މިހާރު ހަމައެކަނި އެއް ދުވަހުގެ ކްރިކެޓް މެޗުތައް ކުޅޭ ކުޅުންތެރިއެކެވެ. އޭނާ އެއް ދުވަހުގެ މެޗުތަކަށް ޚާއްސަވީ ޓެސްޓް ކްރިކެޓާއި ޓުވެންޓީ20 ކްރިކެޓް މެޗުތައް ކުޅުން ހުއްޓާލާފައެވެ. އޭނާ މިހާރު ތައްޔާރުވަމުން އަންނަނީ އަންނަ އަހަރު ބާއްވާ ވޯލްޑް ކަޕް ކްރިކެޓް މުބާރާތަށެވެ. އެ މުބާރާތުގައި ކުޅުމަށްފަހު ވިރާތު މިހާރު ވިސްނަމުންދަނީ ކްރިކެޓް ކުޅުން ހުއްޓާލުމަށެވެ.