އިބްރާހިމް ނާސިރު އިންޓަރނޭޝަނަލް އެއާޕޯޓުން ފުރާ ކޮންމެ ފަސިންޖަރެއްގެ އަތުން 25 ޑޮލަރުގެ ރޭޓުން ފީއެއް ނެގުމަށް އަންނަ އަހަރަށް ލަފާކުރައްވާ ބަޖެޓްގައި ހުށަހަޅުއްވައިފިއެވެ.
އެއާޕޯޓު ޑިވެލޮޕްމަންޓް ޗާޖުގެ ގޮތުގައި ނަގާ ފައިސާ ޖަމާކުރުމަށް ހަމަޖެހިފައިވަނީ ސަރުކާރުގެ ފުއްދުންތެރިކަން އިތުރުކޮށް، ފަހަށް ރައްކާކުރުމުގެ ނިޒާމެއް ޤާއިމްކުރުމަށްޓަކައި އުފައްދާ ފިސްކަލް ރިޒާވްއަށެވެ. ސޮވްރިން ޑިވެލޮޕްމަންޓް ފަންޑުގެ ނަމުގައި ޤާއިމްކުރާ ފިސްކަލް ރިޒަރވްގެ ސަބަބުން ތަރައްޤީއަށްޓަކައި ނެގޭ ލޯނުތައް އަދާ ކުރުމަށް މަގުފަހި ވެގެންދިޔުމުގެ އިތުރަށް، ލޯނު ދޭ ފަރާތްތަކުގެ އިތުބާރު ހޯދައިދައިދެވިގެންދާނެއެވެ. އަދި އަންނަން އޮތް ޖީލުތަކަށް ދަރަނީގެ ބުރަ ކުޑަ ކުރެވިގެންދާނެ ކަމަށް ބަޖެޓްގައިވެއެވެ.
އަންނަ އަހަރަށް ލަފާކުރައްވާ ބަޖެޓް ރައްޔިތުންގެ މަޖިލީހަށް ހުށަހަޅައިދެއްވަމުން ފިނޭންސް މިނިސްޓަރ އަހުމަދު މުނައްވަރު ވިދާޅުވީ، މި ފަންޑަށް މައިގަނޑު ގޮތެއްގައި ޖަމާކުރެވޭނީ އަލަށް ތައާރަފުކުރާ އެއަރޕޯޓް ޑިވެލޮޕްމަންޓް ޗާޖުގެ ފައިސާ ކަމަށާއި 2017 ވަނަ އަހަރު މި ފަންޑަށް 1.1 ބިލިއަން ރުފިޔާ ޖަމާކުރެވޭނެކަމަށް ލަފާކުރެއްވޭ ކަމަށެވެ.
ސޮވްރިން ޑިވެލޮޕްމަންޓް ފަންޑަށް އެއާޕޯޓް ޑިވެލޮޕްމަންޓް ޗާޖުގެ ގޮތުގައި 565.8 މިލިޔަން ރުފިޔާ ލިބޭނެ ކަމަށް ސަރުކާރުން ލާފަކުރެއެވެ.