އެކުވެރި ދައުލަތްތަކުގެ (އދ) ސަލާމަތީ މަޖިލީހުން އެފްރިކާއަށް ދާއިމީ ގޮނޑިއެއް ކަށަވަރުކޮށްދިނުމަށާއި، ބައިނަލްއަޤުވާމީ މާލީ އިދާރާތަކަށް ބޮޑެތި އިސްލާހީ ބަދަލުތަކެއް ގެނައުމަށް އދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ގޮވާލައްވައިފިއެވެ. ނިއު ޔޯކުގައި ބޭއްވި ފޯރަމެއްގައި ވާހަކަފުޅު ދައްކަވަމުން ގުތެރޭޝް ވިދާޅުވީ، މުއްސަނދިންނަށް އަމާޒުކޮށް އުފައްދާފައިވާ މާލީ ނިޒާމު، ތަރައްޤީވަމުން އަންނަ ޤައުމުތަކުގެ ބޭނުންތައް ފުދޭގޮތަށް ބަދަލުކުރަންޖެހޭ ކަމުގައެވެ. އެފްރިކާއަކީ އިސްތިޢުމާރުގެ ދެގުނަ ޝިކާރައެއްގެ ގޮތުގައި ސިފަކުރައްވަމުން ގުތެރޭޝް ވިދާޅުވީ، ދެވަނަ ބޮޑު ހަނގުރާމައަށްފަހު އެ ބައްރަށް ބައިނަލްއަޤުވާމީ މޭޒުދޮށުން ޖާގަ ގެއްލުނު ނަމަވެސް، ދުނިޔޭގެ މުހިންމު ނިންމުންތަކުގައި ސީދާ ބައިވެރިވުމުގެ ފުރުޞަތު މިހާރު ލިބެންޖެހޭނެ ކަމުގައެވެ.
މެދުއިރުމައްޗާއި ޔޫކްރެއިންގެ ހަނގުރާމަތަކުގެ ސަބަބުން ދަތިތައް ކުރިމަތިވި ނަމަވެސް، ވޭތުވެދިޔަ އަހަރު އެފްރިކާގެ އިޤްތިޞާދު %4.4 ކުރިއަރާފައިވާ ކަން އދގެ ވެރިޔާ ހާމަކުރެއްވިއެވެ. އަދި، އެ ބައްރުގެ މިނިވަން ވިޔަފާރީގެ ދަށުން ކުރެވޭ މުޢާމަލާތްތަކުގެ އަގު މި އަހަރު 230 ބިލިޔަން އެމެރިކާ ޑޮލަރަށް އަރާނެ ކަމަށް ބެލެވެއެވެ. މީގެ ސަބަބުން ހަމައެކަނި ރޯ މެޓީރިއަލް ބޭރުކުރުމުގެ ބަދަލުގައި، އިޤުތިޞާދީ ފައިދާ އެ ބައްރުގައި ހިފެހެއްޓުމުގެ ފުރުޞަތު ފަހިވެގެންދާނެ ކަން އޭނާ ފާހަގަކުރެއްވިއެވެ.
އެފްރިކާގެ މުހިންމު މަޢުދަންތައް ބޭރު ޤައުމުތަކަށް ގެންދިއުމުގެ ބަދަލުގައި، އެތެރޭގައި ވަޒީފާތަކާއި އިޤުތިޞާދީ އަގު އުފައްދަންޖެހޭ ކަމުގައި ވެސް ގުތެރޭޝް ވިދާޅުވިއެވެ. މީގެއިތުރުން ކެންޔާގައި ކަރަންޓުގެ %90 އިއާދަކުރަނިވި ހަކަތައިން އުފެއްދުމާއި، ވިލާތުގެ ޤައުމުތަކާ ގުޅުވައިލަން މަޣުރިބުން އަޅާ ސަބްމެރިން ކަރަންޓު ކޭބަލާއި، އާޓިފިޝަލް އިންޓެލިޖެންސްގެ ރޮނގުން ތޫނުސް ހޯދާފައިވާ ކުރިއެރުމާއި، ރުވާންޑާއިން ޑްރޯންގެ ޚިދުމަތް ފުޅާކުރުން އޭނާ ފާހަގަކުރެއްވިއެވެ.
އެ ބައްރުގެ ވިޔަފާރިވެރިންގެ ދެބައިކުޅަ އެއްބަޔަށްވުރެ ބޮޑުބައި އަންހެނުން ހިއްސާކުރާއިރު، އެ ފަރާތްތަކަށާއި މޫސުމީ ކަންކަމަށް ލުއި ލޯނު ދިނުން އިތުރުކުރުމަށް ތަރައްޤީގެ ބޭންކުތަކަށް ގުތެރޭޝް އިލްތިމާސްކުރެއްވިއެވެ. ހަމަމިއާއެކު، ސަރަޙައްދީ ހަމަނުޖެހުންތައް ހައްލުކުރުމަށް އިތިއޯޕިއާ އަދި ޑިމޮކްރެޓިކް ރިޕަބްލިކް އޮފް ދި ކޮންގޯގައި އިސްނަގައިގެން ކުރާ މަސައްކަތްތަކަށް ތަޢުރީފުކުރައްވަމުން، ސިޔާސީ ހަމަޖެހުމެއް ނެތި ދެމެހެއްޓެނިވި ތަރައްޤީއެއް ޙާޞިލު ނުކުރެވޭނެ ކަން ގުތެރޭޝް ބަޔާންކުރެއްވިއެވެ.