ކުދި ކުށްތައްކުރާ ފަރާތްތަކަށް ޝަރުތުތަކަކާއެކު ލުޔެއް ދެވޭނެ ޤާނޫނީ އޮނިގަނޑެއް އެކުލަވާލެއްވުމުގެ މަސައްކަތް ފަށްޓަވާފައިވާ ކަމަށް ހޯމް މިނިސްޓަރ އަޒްލީން އަޙްމަދު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ވ.ފުލިދޫގައި ވާހަކަފުޅު ދައްކަވަމުންނެވެ. ފެލިދެ އަތޮޅު ފުލިދޫގައި ވާހަކަފުޅު ދައްކަވަމުން ހޯމް މިނިސްޓަރ އަޒްލީން އަޙްމަދު ވިދާޅުވީ، ޖަލުތަކާއި ޕެރޯލްގެ ޤާނޫނަށް ގެނެވޭ އިޞްލާޙުތަކާއެކު ކުދި ކުށްތައްކުރާ ފަރާތްތަކަށް ޝަރުތުތަކަކާއެކު ނަމަވެސް ލުޔެއް ދެވޭނެ ޤާނޫނީ އޮނިގަނޑެއް ރައީސުލްޖުމްހޫރިއްޔާގެ ލަފާފުޅުގެ މަތިން އެކުލަވާލެއްވުމުހެ މަސައްކަތް ކުރައްވަމުން ގެންދަވާ ކަމަށެވެ. މި އޮނިގނަޑު އެކުލަވާލެވުމުން، ޤައުމުގެ ސަލާމަތަށް އެކުށެއްގެ ސަބަބުން ބިރެއްނެތް ކުށްތަކުގައި ހުކުމް ތަންފީޒުކުރަމުންދާ ގިނަ ޢަދަދެއްގެ ޒުވާނުންނަށް އެނބުރި އެމީހުންގެ ޢާއިލާތަކާއި މައިންބަފައިންގެ ގާތަށް ރުޖޫޢަވެ ދިރިއުޅުން އިޞްލާޙުކުރުމުގެ މަގުފަހިވެގެންދާނެ ކަމަށް މިނިސްޓަރ ވިދާޅުވިއެވެ.
ހޯމް މިނިސްޓަރ އަޒްލީން އަޙްމަދުގެ ވާހަކަފުޅުގައި ވަނީ ލާމަރުކަޒީ ނިޒާމަށްވެސް އަލިއަޅުއްވާލައްވާ ވާހަކަފުޅު ދައްކަވާފައެވެ. މިނިސްޓަރ ވިދާޅުވީ، ލާމަރުކަޒީ ނިޒާމް ކާމިޔާބުކަމާއެކު ތަންފީޒްކުރަން މިހާރު ފެށިފައިވާއިރު، ލާމަރުކަޒީ ޤާނޫނު ތަންފީޒް ކުރުމުގައި ހުރި ގޮންޖެހުންތައް ގިރާކޮށް، އަންނަ ލޯކަލް ކައުންސިލް އިންތިޚާބުގައި ނަތީޖާ ހާސިލްކުރެވޭފަދަ ގޮތަށް ކައުންސިލްތައް އެކުލަވާލުމަށް ޤާނޫނަށް އިޞްލާޙުތައް މިހާރު ގެންނަވާފައިވާ ކަމަށެވެ. މި އިޞްލާހުތަކާއި ބަދަލުތަކުގެ ސަބަބުން ދައުލަތުގެ ރިކަރަންޓު ޚަރަދު އެތައް ގުނައެއް ކުޑަވެ ކައުންސިލްތައް ހަރަކާތްތެރިވުމަށް ފަސޭހަވެގެންދާނެ ކަމަށް މިނިސްޓަރ ވިދާޅުވިއެވެ.
ސަރުކާރާ ރައްޔިތުންނާ ގުޅުވައިދޭ އެންމެ މުހިންމު އެއްބަޔަކީ ރައްޔިތުންގެ މަޖިލީހުގެ މެމްބަރުންނާއި، ސިޓީ އަދި އަތޮޅު ކައުންސިލާއި ރަށު ކައުންސިލްތަކުގެ މެމްބަރުންކަން ފާހަގަކުރައްވާ ހޯމް މިނިސްޓަރ ވަނީ ސަރުކާރުގެ ތަރައްޤީގެ އެޖެންޑާ އިންސާފުވެރި ގޮތެއްގައި ރައްޔިތުންނަށް ފޯރުވައި ދެއްވުމަށް ގޮވާލައްވާފައެވެ.