ރާއްޖޭގެ އެކި ސަރަހައްދުތަކުގައި އަޅާފައި ހުރި މަސްކަނދުފަތި ކައިރީގައި މަސް ޙަރަކާތްތެރިވާ ގޮތް ބެލުމަށްޓަކައި ސޯނާ ބޮއިތަކެއް ހަރުކޮށް، ޓެސްޓްތަކެއް ހަދަމުންދާ ކަމަށް މެރިން ރިސާރޗް ސެންޓަރުން ވިދާޅުވެއްޖެއެވެ.
މެރިން ރިސަރޗް ސެންޓަރުން ވިދާޅުވީ މިއީ އަދި ޓެސްޓް ކުރަމުންދާ ޓެކްނޮލޮޖީއެއް ކަމަށާއި، މިއިން ލިބޭ ނަތީޖާތަކަށް ބެލުމަށްފަހު ރާއްޖޭގެ ހުރިހާ ސަރަޙައްދެއްގައި ސޯނާ ބޮއިތައް ހަރުކުރާނެ ކަމަށެވެ. img:http://s2.psmnews.mv/images/660x400/14779051567503.jpg|މަސްކަނދުފަތި ކައިރީގައި މަސް ޙަރަކާތްތެރިވާ ގޮތް ބެލުމަށްޓަކައި ސޯނާ ބޮއި ހަރުކުރުން - ފޮޓޯ: އެމްއާރްސީ
ރާއްޖޭގައި ކުރަމުން އަންނަ ކަނޑުމަހުގެ މަސްވެރިކަން ތަރައްޤީ ކުރުމަށްޓަކައި މެރިން ރިސަރޗް ސެންޓަރުން ދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ޒަމާނީ ޓެކްނޮލޮޖީ ރާއްޖެއަށް ތަޢާރަފްކޮށް މަސްވެރިކަން ތަރައްޤީ ކުރުމަށް ގިނަ މަސައްކަތްތަކެއް ކުރަމުންދާ ކަމަށް އެ ސެންޓަރުން ވިދާޅުވެއެވެ. މެރިން ރިސަރޗް ސެންޓަރުގެ ފަރާތުން ޖަޕާނަށް އެންމެފަހުން ކުރި ދަތުރުގައި ޖަޕާނުގައި ކަނޑުމަހުގެ މަސްވެރިކަން ކުރަމުންދާ ގޮތްތައް ދިރާސާކޮށް އެފަދަ ޒަމާނީ ޓެކްނޮލޮޖީތައް ރާއްޖެއަށް ގެންނަން މަސައްކަތް ކުރަމުންދާ ކަމަށް އެ ސެންޓަރުން ވިދާޅުވެއެވެ. img:http://s2.psmnews.mv/images/660x400/14779052009903.jpg|މަސްކަނދުފަތި ކައިރީގައި މަސް ޙަރަކާތްތެރިވާ ގޮތް ބެލުމަށްޓަކައި ސޯނާ ބޮއި ހަރުކުރުން - ފޮޓޯ: އެމްއާރްސީ
ޕީއެސްއެމްއާ ވާހަކަދައްކަވަމުން މެރިން ރިސަރޗް ސެންޓަރުގެ ސީނިއަރ ސައިންޓިފިކް އޮފިސަރ އަހުމަދު ރިޔާޒު ޖައުހަރީ ވިދާޅުވީ ސޯނާ ބޮއި މެދުވެރިކޮށް މަސް ޖަމާވާ ކަނދުފަތިތަކާއި އެކި މޫސުންތަކުގައި މަސް އުޅޭ ސަރަޙައްދުތައް ދެނެގަނެވޭނެ ކަމަށެވެ. އަދި މިކަމުގެ ސަބަބުން މަސްވެރިންނަށް ދިގު ދަތުރުތައް ނުކޮށް ސީދާ މަސް ޖަމާވާ ބޮއިތައް ދެނެގަނެ އެ ސަރަޙައްދަށް ގޮސް މަސްވެރިކަން ކުރުމުގެ ފުރުސަތު ފަހިވެގެންދާނެ ކަމަށެވެ. img:http://s1.psmnews.mv/images/660x400/14779053424602.jpg|މަސްކަނދުފަތި ކައިރީގައި މަސް ޙަރަކާތްތެރިވާ ގޮތް ބެލުމަށްޓަކައި ސޯނާ ބޮއި ހަރުކުރުން - ފޮޓޯ: އެމްއާރްސީ
މަސްކަނދުފަތިތަކުގައި ހަރުކޮށްފައި ހުރި ސޯނާ ބޮއިތައް ބޭނުންކޮށްގެން ސެޓެލައިޓް މެދުވެރިކޮށް މެރިން ރިސަރޗް ސެންޓަރަށް މައުލޫމާތު އެއްކުރަމުންދާނެ ކަމަށް ޖައުހަރީ ވިދާޅުވިއެވެ. މި މަސައްކަތުގެ ދަށުން ލ. އަތޮޅުގެ 4 މަސްކަނދުފައްޗެއްގައި މިހާރުވަނީ ސޯނާ ބޮައި ހަރުކޮށްފައިއެވެ. އަދި މި ބޮއިތައް މެދުވެރިކޮށް ލިބޭ މައުލޫމާތުތައް އެ ސެންޓަރުން ދަނީ އެއްކުރައްވަމުންނެވެ. img:http://s2.psmnews.mv/images/660x400/14779053701358.jpg|މަސްކަނދުފަތި ކައިރީގައި މަސް ޙަރަކާތްތެރިވާ ގޮތް ބެލުމަށްޓަކައި ސޯނާ ބޮއި ހަރުކުރުން - ފޮޓޯ: އެމްއާރްސީ
ޖަޕާނުގައި ބޭނުންކުރަމުން އަންނަ މި ޓެކްނޮލޮޖީ އަކީ ވަރަށް ކާމިޔާބު ޓެކްނޮލޮޖީއެއް ކަމަށާއި، މިހާރު ޓެސްޓްކުރަމުންދާ ބޮއިތަކުން ލިބޭ ނަތީޖާއަށް ބެލުމަށްފަހު މި މަސައްކަތް ފުޅާކުރެއްވުމަށް ނިންމަވާފައިވާ ކަމަށް މެރިން ރިސަރޗް ސެންޓަރުން މައުލޫމާތުދެއެވެ. ޖައުހަރީ ވިދާޅުވީ ސެޓެލައިޓް މެދުވެރިކޮށް ލިބޭ މައުލޫމާތުތައް އެޕްލިކޭޝަނެއް ނުވަތަ އިންޓަރނެޓްގެ ޒަރީޢާއިން ވަގުތުން ވަގުތަށް ލިބެން ހުންނާނެ ކަމަށެވެ.
މަސްކަނދުފަތިތަކުގައި ޓެސްޓް މަރުހަލާއަށް ހަރުކޮށްފައިހުރި މިފަދަ ސޯނާބޮައިތަކަށް ގެއްލުން ނުދިނުމަށް އެ ސެންޓަރުން އިލްތިމާސް ކުރައްވައެވެ.