ހުޅުމާލޭގައި އިންޑިއާގެ ކުންފުންޏަކުން ލަގްޒަރީ ފެންވަރުގެ އެޕާޓްމަންޓްތަކެއް ތަރައްޤީކުރަން ނިންމާ، އެމަޝްރޫޢު އިފްތިތާޙްކޮށްފިއެވެ.
ޗަމްޕާ ހޮޓެލްގައި ބޭއްވި ރަސްމިއްޔާތެއްގައި މި މަޝްރޫޢު އިފްތިތާޙްކޮށްދެއްވީ ޓޫރިޒަމް މިނިސްޓަރ މޫސާ ޒަމީރުއެވެ. މި ރަސްމިއްޔާތުގައި އިންޑިއާއިން ރާއްޖެއަށް ކަނޑައަޅާފައި ހުންނަވާ ސަފީރު އަކިލޭޝް މިޝްރާ އާއި ސްޓޭޓް ބޭންކް އޮފް އިންޑިޔާގެ ސީ.އީ.އޯ ބައިވެރިވެވަޑައިގެންނެވިއެވެ.
"ރެނާޓަސް އިތާ މުތް" މިނަމުގައި އިންޑިޔާގެ އާރް.ޕީ.ޕީ ގްރޫޕުން ކުރިއަށްގެންދާ މި މަޝްރޫޢަކީ މިކްސްޑް ޔޫސް ރެޒިޑެންޝަލް ކޮމްޕްލެކްސްއެކެވެ. މި މަޝްރޫޢުގެ ދަށުން ހުޅުމާލޭގައި ލަގްޒަރީ ފެންވަރުގެ 72 އެޕާޓްމަންޓް ތަރައްޤީކުރުމަށް ވަނީ ހަމަޖެހިފައެވެ. ހުޅުމާލޭ ފެރީ ޓަރމިނަލް ކައިރީގައި ޢިމާރާތްކުރާ މި އެޕާޓްމަންޓް ކޮމްޕްލެކްސްގައި ހަތަރު ޕެންޓްހައުސްގެ އިތުރުން 1 ކޮޓަރި، 2 ކޮޓަރި އަދި 3 ކޮޓަރީގެ އެޕާޓްމަންޓްތަކެއް ތަރައްޤީކުރެވޭނެކަމަށް އާރް.ޕީ.ޕީ ގްރޫޕުން މަޢުލޫމާތުދެއެވެ.
މީގެ އިތުރުން، މި އެޕާޓްމަންޓް ކޮމްޕްލެކްސްގައި ފިޓްންސް ކްލަބަކާއި، ކުޑަކުދިންގެ ޕްލޭ ރޫމެއް، އަދި އެހެނިހެން ވަޞީލަތްތައް ޤާއިމުކުރެވޭނެކަމަށް އެ ފަރާތުން މަޢުލޫމާތުދެއެވެ.
އިންޑިއާގެ ރެނާޓަސް ގްރޫޕުން ރާއްޖޭގައި އެންމެ ފުރަތަމަ ކުރިއަށްގެންދިޔަ މަޝްރޫޢަކީ ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީ އޮފް ޓޫރިޒަމް އެންޑް ހޮސްޕިޓާލިޓީ ބިލްޑިންގ ޢިމާރާތް ކުރުމުގެ މަޝްރޫޢުއެވެ. މީގެ އިތުރުން، އިންދިރާ ގާންދީ މެމޯރިއަލް ހޮސްޕިޓަލް މަރާމާތު ކުރުމުގެ މަޝްރޫޢުގެ މަސައްކަތްވެސް ކުރަމުންދަނީ އެ ކުންފުނިންނެވެ.