އަންނަ އަހަރަށް ދައުލަތުން ލަފާކުރައްވާ ބަޖެޓްގައި ޢާމްދަނީ އިތުރުކުރުމަށް ހިމަނުއްވާފައިވާ އެއަރޕޯޓް ޑިވޮލޮޕްމެންޓް ޗާރޖް ނެގުމަށް މަޝްވަރާކުރައްވާފައި ވަނީ ބިދޭސީންނާއި ދިވެހީންގެ އަތުން ތަފާތުކުރުމެއް ނެތިކަމަށާއި، ނަމަވެސް ދިވެހިން މިކަމުން އިސްތިސްނާވޭތޯ ކަނޑައަޅުއްވާނީ ރައްޔިތުންގެ މަޖިލީހުންކަމަށް ރައީސް އޮފީހުގެ މިނިސްޓަރ އަދި އިކޮނޮމިކް ކައުންސިލްގެ ކޯ-ޗެއަރ އަޙްމަދު ޒުހޫރު ވިދާޅުވެއްޖެއެވެ. މިނިސްޓަރ މިހެން ވިދާޅުވީ ރައްޔިތުންގެ މަޖިލީހުގެ ބަޖެޓް ކޮމިޓީގައި ވާހަކަފުޅު ދައްކަވަމުންނެވެ.
އަންނަ އަހަރުގެ ބަޖެޓަށް އާމްދަނީ ހޯދުމަށް ބަޖެޓްގައި ސަރުކާރުން ހިމަނުއްވާފައިވާ މުހިއްމު ކަންތައްތަކުގެ ތެރޭގައި، ސޮވެރިން ޑިވެލޮޕްމަންޓް ފަންޑެއް ޤާއިމް ކުރައްވާ، އެއަރޕޯޓް ޑިވެލޮޕްމަންޓް ޗާޖެއް ނެގުމަށް ނިންމަވާފައިވެއެވެ. ރައްޔިތުންގެ މަޖިލީހުގެ ބަޖެޓް ކޮމިޓީގައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ އޮފީހުގެ މިނިސްޓަރ އަދި އިކޮނޮމިކް ކައުންސިލްގެ ކޯ-ޗެއަރ އަޙްމަދު ޒުހޫރު ވިދާޅުވީ، އެއަރޕޯޓް ތަރައްޤީކުރުމަށް ފީއެއް ނެގުމަށް މަޝްވަރާކުރެވެމުންދަނީ، އެއަރޕޯޓް ބޭނުންކުރާ ހުރިހާ ފަސިންޖަރުންގެ އަތުންކަމަށެވެ. ނަމަވެސް ދިވެހިން އިސްތިސްނާ ކުރާނެކަން ނުވަތަ ނޫންކަން ނިންމާނީ ރައްޔިތުންގެ މަޖިލީހުގެ މެމްބަރުން ކަމަށެވެ.
އެއަރޕޯޓް ޑިވެލޮޕްމަންޓް ޗާރޖް ނެގުމަށް ނިންމެވީ، އެއަރޕޯޓް ތަރައްގީ ކުރެއްވުމަށް ބިލިއަނެއްހާޑޮލަރު ހޭދަވާނެތީ އެ ޚަރަދުތައް ފޫބެއްދުމުގެ ގޮތުންކަމަށް ޒުހޫރު ވިދާޅުވިއެވެ. އެއަރޕޯޓް ޑިވެލޮޕްމަންޓް ޗާރޖްގެ ގޮތުގައި ނަގާ ފީން ސޮވަރިން ވެލްތު ފަންޑެއް ޤާއިމުކުރުމަށް ސަރުކާރުން ނިންމަވާފައިވާކަމަށް މިނިސްޓަރ ވިދާޅުވިއެވެ. އަދި އެ ފައިސާ ބޭނުންކުރެވޭނީ ދަރަނިތައް އަދާކުރުމަށާއި، ކުދި ވިޔަފާރިތަކަށް އިންވެސްޓްކުރުމަށް މަގުފަހިކުރުމަށްކަމަށް މިނިސްޓަރ ވިދާޅުވިއެވެ. އެއާރޕޯޓް ތަރައްޤީކޮށް ނިމުމުން ކުރިއަށްއޮތް 5 އަހަރާއި 7 އަހަރު ދުވަހުގެ ތެރޭގައި އެއަރޕޯޓް ބޭނުންކުރާ މީހުންގެ ޢަދަދު 7 މިލިއަނަށް އިތުރުކޮށްގެން އާމްދަނީ ހޯދުމަކީ ސަރުކާރުގެ އަމާޒެއްކަމަށްވެސް މިނިސްޓަރ ވިދާޅުވިއެވެ.
ބަޖެޓް ކޮމިޓީގައި ވާހަކަފުޅު ދައްކަވަމުން އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވީ، އިބްރާހީމް ނާޞިރު އިންޓަރނޭޝަނަލް އެއަރޕޯޓް ތަރައްޤީކުރައްވަނީ ވަކި ޕްލޭނެއްގެ ދަށުން ދައުލަތަށް ފައިދާވާގޮތަށްކަމަށެވެ. އެއަރޕޯޓް ތަރައްޤީކުރުމުގެ މަސައްކަތް ކުރަނީ ބޭރުގެ ކުންފުނިތަކުގެ އެހީގައި ނަމަވެސް ދިވެހި ކުންފުނިތަކަށްވެސް ފުރުޞަތު ދެއްވާކަމަށާއި، ފައިދާވެސް ވާނެކަމަށެވެ.
އަންނަ އަހަރުގެ ބަޖެޓްގައި ދައުލަތަށް އާމްދަނީ އިތުރުކުރުމަށް ހިމަނުއްވާފައިވާ ކަންކަމުގެ ތެރޭގައި، ބިންވެރިކުރުވުމުގެ ސިޔާސަތުގެ ދަށުން އިޤްތިޞާދީ ބޭނުންތަކަށް ބިންވިއްކުމާއި ސިއްޙަތަށް ގެއްލުންހުރި ބައެއް މުދަލުގެ އިމްޕޯޓް ޑިއުޓީ ބޮޑުކުރުމާއި ސްޕެޝަލް އިކޮނިމިކް ޒޯންތަކުގައި ތަރައްޤީކުރާ މަޝްރޫޢުތަކުން ލިބޭ އެކިއުޒިޝަން ފީ ހިމެނެއެވެ. އަދި މާލެ ސަރަހައްދުގެ ދުއްވާތަކެތީގެ ތޮއްޖެހުން ކުޑަކުރުމަށް ކޮންޖެޝަން ޗާޖެއް ތައާރަފުކުރުމާއި ޓެކްސީ އާއި ޕިކަޕް ހުއްދައިގެ ކޯޓާގެ ނިޒާމު ހަރުދަނާކޮށް ހުއްދަތައް ވިއްކަން ފެށުންވެސް ހިމެނެއެވެ.