ކުޑަކުދިންގެ ޙައްޤުތައް ކަށަވަރުކޮށް ހިމާޔަތްކުރުމަކީ ޤައުމީ މަސްއޫލިއްޔަތެއް!

ކޮންމެ އަހަރެއްގެ މޭ މަހުގެ 10 ވަނަ ދުވަހަކީ ރާއްޖޭގައި ފާހަގަކުރާ "ޤައުމީ ކުޑަކުދިންގެ ދުވަސް" އެވެ. މިއަހަރުގެ މި ދުވަހަށް ކަނޑައަޅާފައިވާ ޚާއްޞަ ޝިއާރަކީ "އާއިލީ ހަމަޖެހުން، ކުދިންގެ ދުޅަހެޔޮކަން" މިއެވެ.

ކުޑަކުދިންނަކީ ޤައުމުގެ މުސްތަޤުބަލުގެ އުންމީދެވެ. އެކުދިންގެ ރައްކާތެރިކަން ކަށަވަރުކޮށް، ޖިސްމާނީ އަދި ނަފްސާނީ ދުޅަހެޔޮކަން ޔަޤީންކޮށްދިނުމަކީ، ޙަޤީޤީ މާނައިގައި ޤައުމެއްގެ ތަރައްޤީ ވަޒަންކުރެވޭނެ އެންމެ މުހިންމު މިންގަނޑެވެ. ދުނިޔޭގެ އެހެނިހެން ޤައުމުތަކެކޭ އެއްފަދައިން، ރާއްޖޭގައިވެސް ކުޑަކުދިންނަށް އަމާން އަދި ރައްކާތެރި މާޙައުލެއް ބިނާކުރުމަށްޓަކައި ހަރުދަނާ މަސައްކަތްތަކެއް ދަނީ ކުރަމުންނެވެ.

ކުޑަކުދިންނަކީ މުޖުތަމަޢުގެ ހުރިހާ ފަރުދުންގެ ފަރާތުން އޯގާތެރިކަމާއި ލޯބި ލިބެންޖެހޭ ބައެކެވެ. އެކުދިންގެ ޙައްޤުތަކާއި ރައްކާތެރިކަމަށް ހުރަސްއަޅާ ކަންކަން ނައްތާލުމަށްޓަކައި، ރާއްޖެއިން ވަނީ ބައިނަލްއަޤުވާމީ އެކި މުޢާހަދާތަކުގައި ބައިވެރިވެ، މުހިންމު ގިނަ މަސައްކަތެއް ކޮށްފައެވެ.

މިގޮތުން، "ކުޑަކުދިންގެ ޙައްޤުތައް ރައްކާތެރިކުރުމާބެހޭ ޤާނޫނު" އާއި، "ކުޑަކުދިންގެ ޢަދުލުގެ ޤާނޫނު" އަދި "ތަޢުލީމުގެ ޤާނޫނު" ތަސްދީޤުކޮށް، މިހާރު ދަނީ އަމަލީގޮތުން ތަންފީޒުކުރަމުންނެވެ.

އެހެންނަމަވެސް، ސިއްޙަތާއި ޢާއިލާއާއި އިޖުތިމާޢީ އެހީއާ ބެހޭ ވުޒާރާގެ ތަފާސްހިސާބުތަކުން ދައްކާގޮތުގައި، މިދިޔަ މަހު އެކަނިވެސް އަނިޔާއާ ގުޅުންހުރި 230 މައްސަލަ ވަނީ ހުށަހެޅިފައެވެ. މީގެ ތެރެއިން 92 މައްސަލައަކީ ކުޑަކުދިންނަށް ކުރާ އެކި ބާވަތުގެ އަނިޔާތަކާ ގުޅުންހުރި މައްސަލަތަކެވެ.

މިއީ ނުހަނު ކަންބޮޑުވާންޖެހޭ އަދަދެކެވެ. މިކަމަށް ދާއިމީ ޙައްލެއް ހޯދުމަށް ސަރުކާރުން މެދުނުކެނޑި މަސައްކަތް ކުރަމުންދާއިރު، ކޮންމެ ކުއްޖަކަށްމެ އަމާންކަމާއި ކަރާމާތް ލިބިގެންވާ މާޙައުލެއް ކަށަވަރުކޮށްދިނުމަކީ ދައުލަތުގެ މުހިންމު އަމާޒެކެވެ.

ކުޑަކުދިންގެ ޙައްޤުތަކާ ގުޅޭ ބައިނަލްއަޤުވާމީ މުޢާހަދާއަކީ ރާއްޖޭގެ ޤާނޫނުތަކާއި ސިޔާސަތުތަކުގެ އަސާސްކަމުގައިވާއިރު، ކަމާބެހޭ ނިޒާމުތައް ހަރުދަނާކޮށް، ކުދިންގެ ކުރިއެރުމަށް ބާރުވެރިވާ ފަދަ މާޙައުލެއް ޤާއިމުކުރުމަށް ސަރުކާރުން އިސްކަންދެއެވެ.

ޢާއިލީ ވެއްޓެއްގައި ލޯތްބާއެކު ބޮޑުވުމުގެ ޙައްޤުން މަޙްރޫމުވެފައިވާ ކުދިން މުޖުތަމަޢުގައި ތިބިކަމީ ހިތާމަވެރި ޙަޤީޤަތެކެވެ. އެފަދަ ކުދިންނަށް ޢާއިލީ ލޯބި ހޯދައިދިނުމަށް ފެށި މަސައްކަތުގެ ދަށުން، ވޭތުވެދިޔަ ދެ އަހަރުގެ ތެރޭގައި 110 ކުއްޖަކު ވަނީ އަލުން ޢާއިލާތަކާ ޙަވާލުކުރެވިފައެވެ. މިއީ އިޖުތިމާޢީ ތަރައްޤީގެ ދާއިރާއިން ލިބުނު ބޮޑު ކާމިޔާބީއެކެވެ.

ސިއްޙަތާއި ޢާއިލާއާއި އިޖުތިމާޢީ އެހީއާ ބެހޭ ވުޒާރާއިން ހާމަކުރި ގޮތުގައި، 2025 ޖޫންގެ ނިޔަލަށް ދައުލަތުގެ ބެލުމުގެ ދަށުގައި ތިބީ 160 ކުދިންނެވެ.

މިހާރު ދައުލަތުން ދަނީ ކުދިން ބަލަހައްޓާ މަރުކަޒުތައް އިތުރަށް ތަރައްޤީކޮށް، މާލެއާއި އަތޮޅުތަކުގައި ހުރި މަރުކަޒުތަކުގެ ފެންވަރު މަތިކުރުމުގެ މަސައްކަތް ކުރަމުންނެވެ. އަދި އެތަންތަނުގައި މަސައްކަތްކުރާ މުވައްޒަފުންނަށް ބޭނުންވާ ތަމްރީނުތައް ދިނުމުގެ ޕްރޮގްރާމްތައް މިއަހަރުގެ ތެރޭގައި ކުރިއަށްދާނެއެވެ.

މީގެ އިތުރުން، ދައުލަތުގެ ބެލުމުގެ ދަށުގައި ތިބެ ބޮޑުވާ ކުދިން މުޖުތަމަޢަށް ނުކުންނަ އުމުރަށް އެޅުމުން، އެކުދިންނަށް ބޭނުންވާ ދިރިއުޅުމުގެ ހުނަރުތަކާއި ވަޒީފާގެ ފުރުޞަތުތައް ފަހިކޮށްދިނުމަށް ސަރުކާރާއި އަމިއްލަ ވިޔަފާރިތައް ގުޅިގެން މުހިންމު މަސައްކަތްތަކެއް ދަނީ ކުރަމުންނެވެ.

މިކަމުގެ ސަބަބުން، ދައުލަތުގެ މަރުކަޒުތަކަކީ އެކުދިން ދާއިމީކޮށް ތިބެންޖެހޭ ތަނެއްގެ ގޮތުގައި އޮތް އޮތުން ބަދަލުވެ، އަމިއްލަ ފައިމައްޗަށް ތެދުވެ މުޖުތަމަޢުގެ ބޭނުންތެރި ފަރުދުންނަށްވުމުގެ ފުރުޞަތު އެކުދިންނަށް ވަނީ ހުޅުވިފައެވެ.