މާލެ ނޫން އެހެން ސަރަހައްދެއްގައި ނެރުނު ފުރަތަމަ އޮޑިޓް ރިޕޯޓް

އައްޑޫސިޓީގައި ޤާއިމްކުރައްވާފައިވާ އޮޑިޓަރ ޖެނަރަލްގެ އޮފީހުގެ ސަރަޙައްދީ ގޮފިން 6 ކައުންސިލެއްގެ އޮޑިޓް ރިޕޯޓް ނެރުއްވައިފިއެވެ.

މާލެ ފިޔަވައި ރާއްޖޭގެ އެހެން ސަރަޙައްދެއްގައި ފުރަތަމަ ފަހަރަށް ނެރުއްވި މިއޮޑިޓް ރިޕޯޓް ނެރެދެއްވީ އޮޑިޓަރ ޖެނަރަލް ޙަސަން ޒިޔާތުއެވެ. މި ރިޕޯޓް ނެރެދެއްވާފައިވަނީ، އައްޑޫ އަދި ފުވައްމުލަކު ސިޓީގެ ދައުލަތުގެ މުއައްސަސާތަކުގެ ބައެއް މުވައްޒަފުންނަށް ޚާއްޞަކުރައްވައިގެން މިއަދު ފެއްޓެވި ލީޑަރޝިޕް ޓްރެއިނިންގ ޕްރޮގްރާމްގެ ތެރެއިންނެވެ.

މިއަދު ނެރުއްވާފައިވަނީ، ޏ. އަތޮޅު ކައުންސިލާއި، ގދ. އަދި ގއ. އަތޮޅު ކައުންސިލާއި، ގއ. މާމެންދޫގެ އިތުރުން އެއަތޮޅު ވިލިނގިލީ ކައުންސިލް އަދި ގދ. ތިނަދޫ ކައުންސިލްގެ 2015 ވަނަ އަހަރުގެ މާލީ އޮޑިޓް ރިޕޯޓެވެ. މި 6 އޮޑިޓް ރިޕޯޓަކީ، ކައުންސިލަތަކަށް ލިބިފައިވާ 7 މިލިޔަންވުރެ ގިނަ ރުފިޔާއާއި ކައުންސިލްތަކުން ހޭދަކޮށްފައިވާ 32 މިލިއަނަށްވުރެ ގިނަ ރުފިޔާގެ ތަފްޞީލް ހާމަކުރައްވާފައިވާ ރިޕޯޓްތަކެކެވެ.

މިއަދު ނެރުއްވި 6 އޮޑިޓް ރިޕޯޓަކީ، މިއަހަރަށް އޮޑިޓަރ ޖެނަރަލްގެ އޮފީހުގެ ސަރަޙައްދީ ގޮފިން ނެރުއްވަން ކަނޑައެޅުއްވި 69 އޮޑިޓް ރިޕޯޓްގެ ތެރެއިން މިހާތަނަށް ފީލްޑް މަސަކަތް ނިމި ރިޕޯޓިންގ މަރުޙަލާގައިވާ 40 އޮޑިޓް ރިޕޯޓްގެ ތެރޭގައި ހިމެނޭ ރިޕޯޓުތަކެއްކަމަށް އޮޑިޓަރ ޖެނެރަލްގެ އޮފީހުން ވިދާޅުވެއެވެ.

އައްޑޫ ސީޓީގައި މިއަދު ބޭއްވެވި ރަސްމިއްޔާތުގައި އޮޑިޓަރ ޖެނަރަލް ޙަސަން ޒިޔަތު ވަނީ ފިނޭންސް މިނިސްޓްރީން ނެރުއްވާފައިވާ ކައުންސިލްތަކުގެ މާލީ ހިސާބު ތައްޔާރުކުރާނެ ގޮތުގެ ފޯމެޓްތަކަށް އަހްލުވެރިކުރުމުގެ މަސައްކަތް އެ އޮފީހުން ފެއްޓެވިކަންވެސް އިއުލާންކުރައްވާފައެވެ.