ޤުރުއާން ކިޔެވުމުގެ ޤައުމީ މުބާރާތް އަންނަ އޮކްޓޯބަރު މަހުގެ ދެވަނަ ދުވަހު ބޭއްވެވުމަށް ޤުރުއާނާބެހޭ މަރުކަޒުން ނިންމަވައިފިއެވެ.
މިއަހަރުގެ މުބާރާތުގައި 183 ބައިވެރިން ކިޔެވުމަށް ހަމަޖެހިފައިވާ ކަމަށް ޤުރުއާނާބެހޭ މަރުކަޒުން ވިދާޅުވެއެވެ. މިއީ އަންހެން، ފިރިހެން ދެ ޖިންސުގެ މީހުންނަށް އަމާޒުކުރައްވައިގެން ވަކިވަކިން މުބާރާތް ބާއްވަވާ ފުރަތަމަ ފަހަރެވެ.
ޤުރުއާން ކިޔެވުމުގެ ޤައުމީ މުބާރާތަކީ 1981 ވަނަ އަހަރުން ފެށިގެން ސަރުކާރުން ބާއްވަވަމުން ގެންދަވާ މުބާރާތެކެވެ. އޭރު މި މުބާރާތް ބާއްވަވާފައިވަނީ މަޢުހަދުއްދިރާސާތުއް އިސްލާމިއްޔާއިންނެވެ. އެހެންނަމަވެސް 1985 ވަނަ އަހަރު ސަރުކާރުން ވަނީ ޤުރުއާން މުބާރާތް ރާއްވަވާ އިންތިޒާމުކުރެއްވުމަށް މިހާރުގެ ޤުރުއާނާބެހޭ މަރުކަޒާ ޙަވާލުކުރައްވާފައެވެ. ޤުރުއާނާބެހޭ މަރުކަޒު ސަރުކާރުން އުފައްދަވާފައިވަނީ 2000 ވަނައަހަރުއެވެ.
ޤުރުއާން ކިޔެވުމުގެ ޤައުމީ މުބާރާތް ބޭއްވެވުމުގެ މައިގަނޑު މަޤްޞަދަކީ، ކީރިތި ޤުރުއާނާމެދު ޢާންމުންގެ ހިތުގައި ލޯބިޖައްސުވައި، ޤުރުއާން ކިޔެވުމުގެ ފަންނު އާލާކުރައްވައި، އިސްލާމީ ވަޙްދަތު ދިރުވައި ކުރިއެރުއްވުމެވެ.
ޤުރުއާން ކިޔެވުމުގެ ޤައުމީ މުބާރާތް އަންނަ އާދީއްތަދުވަހުގެ ރޭ ފެއްޓެވުމަށް ޤުރުއާނާބެހޭ މަރުކަޒުން މިހާރު ގެންދަނީ ތައްޔާރުވެވަޑައިގަންނަވަމުންނެވެ. މިމުބާރާތް ބޭއްވެވުމަށް ހަމަޖެހިފައިވަނީ އިސްލާމީ މަރުކަޒުގައެވެ. މާލެއާ އަތޮޅުތަކުން ޖުމްލަ 183 ބައިވެރިން މިމުބާރާތުގައި ވާދަކުރާނެއެވެ.
ޤުރުއާނާބެހޭ މަރުކަޒުން ވިދާޅުވީ، މިއަހަރުގެ މުބާރާތުގައި އަތޮޅުތަކުން ބައިވެރިވާ ކެންޑިޑޭޓުންގެ ދަތުރުގެ ހުރިހާ ޚަރަދެއް ހަމަޖައްސަވައިދެއްވަނީ ސަރުކާރުންކަމަށެވެ. އެހެން އަހަރުތަކާ ޚިލާފަށް މިއަހަރުގެ މުބާރާތުގައި ކެންޑިޑޭޓުން ބައިވެރިކުރައްވާފައިވަނީ އަތޮޅު ކައުންސިލްތަކާއި، ސިޓީ ކައުންސިލްތަކާއި، އިސްލާމް ދީނަށް ޚިދުމަތްކުރާ ކްލަބް ޖަމްޢިއްޔާ ޖަމާޢަތްތައް މެދުވެރިކޮށެވެ. މިއަހަރުގެ މުބާރާތްވެސް ބައްސަވާލައްވާފައިވަނީ 2 ބަޔަކަށެވެ. އޭގެތެރޭގައި ހިމެނެނީ ހިތުން ކިޔެވުމުގެ ބަޔާއި ބަލައިގެން ކިޔެވުމުގެ ބައެވެ.
ޤުރުއާނާބެހޭ މަރުކަޒުގެ ރައީސް އަލްއުސްތާޛު އިބްރާހީމް ރަޝީދު މޫސާ ވިދާޅުވީ، ހިތުން ކިޔެވުމުގެ ބައިގައި 52 ކެންޑިޑޭޓުން އަދި ބަލައިގެން ކިޔެވުމުގެ ބައިގައި 131 ކެންޑިޑޭޓުން ވާދަކުރާނެ ކަމަށެވެ.
''ދެ ގޮފިން، ހިތުން ކިޔެވުމުގެ ބައިން 52 ބައިވެރިން، ފޮތުން ކިޔެވުމުގެ ބައިން 131 ބައިވެރިން ވާދަކުރާނެ. ފޮތުން ކިޔެވުމުގެ ބައިން ކިޔަވާނީ 10 ފޮތް ނުވަތަ 20 ފޮތް ނުވަތަ ވިދިވިދިގެން ޤުރުއާން ކިޔެވުން. ހިތުން ކިޔެވުމުގެ ބައިން 05 ފޮތް ނުވަތަ 10 ފޮތް ނުވަތަ 20 ފޮތް ކިޔަވާނީ'' ޤުރުއާނާ ބެހޭ މަރުކަޒުގެ ރައީސް އަލްއުސްތާޛު އިބްރާހީމް ރަޝީދު މޫސާ ވިދާޅުވިއެވެ.
ޤުރުއާނާބެހޭ މަރުކަޒުގެ ރައީސް އަލްއުސްތާޛު އިބްރާހީމް ރަޝީދު މޫސާ ވިދާޅުވީ، އެހެން އަހަރުތަކާ ޚިލާފަށް މިއަހަރުގެ މުބާރާތުގައި ބައިވެރިވުމަށް އެއްވެސް ޢުމުރުފުރާއެއް ކަނޑައަޅުއްވާފައި ނުވާކަމަށާއި މުބާރާތުގައި ޢާންމުކޮށް އެންމެންނަށް ބައިވެރިވެވޭނެ ކަމަށެވެ. އަދި އެގޮތަށް ހަމަޖެއްސެވީ ވީހާވެސް ގިނަބަޔަކަށް މުބާރާތުގައި ބައިވެރިވުމުގެ ފުރުޞަތު ދެއްވުމުގެ ގޮތުން ކަމަށް ވިދާޅުވިއެވެ. ޤުރުއާނާބެހޭ މަރުކަޒު ރައީސް ވިދާޅުވީ، މުބާރާތުގެ އަންހެން ފިރިހެން މި ދެބައިން ވަކިވަކިން ވަނަ ދިނުމަށް ހަމަޖެހިފައިވާ ކަމަށެވެ.
''އެއްވަނަ އަތޮޅާއި، ސިޓީއާއި، ޖަމްޢިއްޔާއިންވެސް ވަކިން ހޮވާނެ. ފޮތުން ކިޔެވުމުގެ ބަޔާ ހިތުން ކިޔެވުމުގެ ބައިން ކޮންމެ ބަޔަކުން އެއްވަނަ ދެވަނަ ތިންވަނަ ހޮވާ ގޮތަށް ހަމަޖެހިފައިވަނީ. އެއްވަނައަށް ހޮވޭ ފަރާތަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމު ލިބިވަޑައިގަންނަވާނެ." އަލްއުސްތާޛު އިބްރާހީމް ރަޝީދު މޫސާ ވިދާޅުވިއެވެ.
މިއީ ޤުރުއާން ކިޔެވުމުގެ ޤައުމީ މުބާރާތް ބާއްވަވާ 31 ވަނަ ފަހަރެވެ. މިމުބާރަތަކީ ރާއްޖޭގެ ސްކޫލްތަކާއި ވަކިވަކި ފަރުދުން ނިކަން ޝައުޤުވެރިކަމާއެކު ކޮންމެ އަހަރަކުވެސް ބައިވެރިވަމުން އަންނަ މުބާރާތެކެވެ.