ޞިއްޙީ ޚިދުމަތްދޭ ތަންތަނުގައި ލިބެން ހުރި ވަޞީލަތްތައް ބޭނުންކޮށްގެން ތުއްތު ކުދިންނަށް ދެވޭ ފަރުވާގެ ފެންވަރު މަތިކޮށް މޮނިޓަރކުރާނެ ގޮތްތައް ދަސްކޮށްދެއްވުމުގެ މަސައްކަތް ހެލްތު ޕްރޮޓެކްޝަން އެޖެންސީން ފަށްޓަވައިފިއެވެ.
އެޗްޕީއޭއާއި ކަމާ ގުޅުންހުރި ދާއިރާތައް ގުޅިވަޑައިގެން ބާއްވަވާ ބައްދަލުވުން ކުރިއަށް ގެންދަވަނީ ކުރުނބާ މޯލްޑިވްސްގައެވެ.
ޞިއްޙީ ޚިދުމަތްދޭ ތަންތަނުގައި ލިބެން ހުރި ވަޞީލަތްތައް ބޭނުންކޮށްގެން، ތުއްތު ކުދިންނަށް ދެވޭ ފަރުވާގެ ފެންވަރުމަތިކުރައްވައި، މޮނިޓަރކުރައްވާނެ ގޮތްތައް ދަސްކޮށްދެއްވުމުގެ މަސައްކަތު ބައްދަލުވުމަކީ ހެލްތް ޕްރޮޓެކްޝަން އެޖެންސީއާއި،ޑަބްލިޔުއެޗްއޯގެ ސައުތް އީސްޓް އޭޝިޔާ ރީޖަނަލް އޮފީހާއި، އަދި އިންދިރާގާންދީ މެމޯރިއަލް ހޮސްޕިޓަލް ގުޅިވަޑައިގެން ބާއްވަވާ ބައްދަލުވުމެކެވެ.
މި ބައްދަލުވުމުގެ މަޤްޞަދަކީ، ތުއްތުކުދިންނަށް ފަރުވާދެއްވުމުގައި ޞިއްޙީ ޚިދުމަތްދޭ ތަންތަނުން ލިބެން ހުރި ވަޞީލަތްތައް ބޭނުންކުރުމުގެ ހުނަރާއި، ޤާބިލްކަން ޞިއްޚީ ޚިދުމަތްތެރިންގެ ކިބައިގައި އަށަގެންނެވުމެވެ. އަދި ތުއްތު ކުދިންނަށް ދެވޭ ޞިއްޙީ ފަރުވާގެ ފެންވަރު އިތުރަށް ރަނގަޅުކުރައްވައި ރާއްޖޭގައި ތުއްތު ކުދިން މަރުވާ ރޭޓް އިތުރަށް ދަށްކުރެއްވުމާއި، ރާއްޖޭގެ ޞިއްޙީ ދާއިރާއަށް ކުރިއެރުން ހޯއްދަވައިދެއްވުމެވެ.
މި ތަމްރީނު ޕްރޮގްރާމްގައި ބައިވެރިވަޑައިގަންނަވަނީ އައިޖީއެމްއެޗާއި، ހުޅުމާލޭ ހޮސްޕިޓަލާއި، ރީޖަނަލް ހޮސްޕިޓަލްތަކާއި، އަދި އަމިއްލަ ބައެއް ހޮސްޕިޓަލްތަކުން 35 ބޭފުޅުންނެވެ. މި ބައްދަލުވުމުގައި މަޢުލޫމާތު ދެއްވާނީ ކޮލިޓީ ކެއަރއަކީ ކޮބައިކަމާއި، ތުއްތުކުދިންނަށް ފަރުވާ ދިނުމުގައި ދިމާވާ މައްސަލަތައް ދެނެގަނެ، ކުދިކުދި ބަދަލުތައް ގެނެސްގެން، އެފަދަ މައްސަލަތައް ޙައްލުކުރާނެ ގޮތްތަކާ ގުޅޭގޮތުންނެވެ. އަދި ދެމެހެއްޓެނެވި ގޮތެއްގައި ފެންވަރު ރަނގަޅު ޞިއްޙީ ފަރުވާ، ތުއްތު ކުދިންނަށް ދެއްވުމަށްޓަކައި ޚިދުމަތުގެ ފެންވަރު ވަޒަންކުރުމުގެ މިންގަނޑުތަކެއް އެކުލަވާލައްވާނެ ގޮތްތަކާއި ދެމެހެއްޓެނެވި ޚިދުމަތަށް ކުރިއެރުންތައް ގެންނާނެ ގޮތްތަކާއި، ޚިދުމަތަށް ބަދަލުތައް ގެންނައިރު އެބަދަލުތައް ޓެސްޓުކުރާނެ ގޮތްތައްވެސް މި ބައްދަލުވުމުގައި ދަސްކޮށްދެއްވާނެއެވެ.
ތަމްރީނު ޕްރޮގްރާމް ފަށްޓަވައިދެއްވައި، މިނިސްޓަރ އޮފް ހެލްތް ޢަބްދުﷲ ނާޒިމް އިބްރާހީމް ދެއްކެވި ވާހަކަފުޅުގައި، ޞިއްޙީ ދާއިރާގައި ޙަރަކާތްތެރިވެވަޑައިގަންނަވާ ބޭފުޅުންނަށް، މިފަދަ ތަމްރީނު ޕްރޮގްރާމްތަކުގެ ޒަރީޢާއިން ލިބިވަޑައިގަންނަވާ މަޢުލޫމާތު ނަތީޖާ ފެންނަމުން އަންނަކަމަށް ވިދާޅުވިއެވެ. އަދި މިއީ ދާއިރާގެ ތަރައްޤީއަށް ހެޔޮ ބަދަލުތަކެއް ގެނުވާނެ ކަމެއްކަން މިނިސްޓަރ ފާހަގަކުރެއްވިއެވެ.
''މިބައްދަލުވުމުގައި މަޢުލޫމާތު ދެއްވާ ފަންނީ ބޭފުޅުންގެ ޚިޔާލާއި މަޝްވަރާއިން، ރާއްޖޭގައި މި މަސައްކަތުގައި އުޅުއްވާ ފަރާތްތަކާށް ހެޔޮ ބަދަލުތަކެއް ގެނުވާނެ. އަޅުގަނޑު ވަރަށް ބޮޑަށް އިސްކަންދެން އެކި ދާއިރާތަކުން މީހުން ތަމްރީނުކުރުމަށް." ހެލްތް މިނިސްޓަރ ވިދާޅުވިއެވެ.
މިބައްދަލުވުމުގައި ވާހަކަދައްކަވަމުން ހެލްތް ޕްރޮޓެކްޝަން އެޖެންސީގެ ސީނިއަރ މެޑިކަލް އޮފިސަރ ޑރ. ރަޒާނާ ފާއިޒު ވިދާޅުވީ، ޞިއްޙީ ޚިދުމަތްދެއްވާ ތަންތަނުގެ ޚިދުމަތް، ޚާއްޞަކޮށް ތުއްތުކުދިންނަށް ދެއްވާ ޚިދުމަތަކީ، ފެންވަރު މަތީ އަދި އޯގާތެރި ޚިދުމަތަކަށް ވާންޖެހޭކަމަށެވެ.
''ތުއްތު ކުދިންނަށް ދޭ ޚިދުމަތުގެ ފެންވަރު މަތިކޮށް އޯގާތެރި ޚިދުމަތަކަށް ވާންޖެހޭ. އަދި ބަލީގެ ކުރީގައި ޢަލާމާތްތައް އެނގި ކުރީސުއްރެ، ތުއްތު ދަރިފުޅަށް ކުރިމަތިވާ އިތުރު މައްސަލަތައް ދެނެގެނެވި، މިފަދަ މައްސަލަތަކާމެދު ފިޔަވަޅުއެޅުމަކީ މައްސަލަތަކުން ރައްކާތެރިވެ އަދި ދުޅަހެޔޮ ޞިއްޙަތަކަށް ރުޖޫޢަވުމަށް ކުރެވޭ މުހިންމު ކަމެއް." ޑރ. ރަޒާނާ ވިދާޅުވިއެވެ.
މި ތަމްރީނު ޕްރޮގްރާމްގައި މަޢުލޫމާތު ދެއްވަނީ ސިއާރޯއާއި، އިންޑިއާގެ އޯލް އިންޑިއާ އިންސްޓިޓިއުޓް އޮފް މެޑިކަލް ސައިންސްގެ ބޭފުޅުންނެވެ.