ގެދޮރާއި މަގުހެދުމަށް އީއައިއޭ ހަދާކަށް ނުޖެހޭނެ

ގެދޮރު އިމާރާތްކުރުމާއި މަގު ހެދުމުގެ މަސައްކަތްތަކަށް އީ.އައި.އޭ ހަދަން ނުޖެހޭގޮތަށް ޤަވާއިދަށް އިސްލާޙު ގެނެސްފިއެވެ.

ތިމާވެއްޓަށް ގެއްލުންވާ މިންވަރު ބަލާ ރިޕޯޓް ހެދުމާއި ގުޅޭގޮތުން ގެނައި އިސްލާހުތައް ގެޒެޓުގައި ވަނީ އާއްމުކޮށްފައެވެ. ތިމާވެއްޓަށް އަސަރުފޯރާ މިންވަރު ބަޔާންކުރާ ރިޕޯޓު ހެދުމުގެ ޤަވާއިދަށް ގެނައި 7ވަނަ އިސްލާހު މިހާރު ވަނީ ގެޒެޓުކޮށްފައެވެ.

މި އިސްލާހުގައި ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓް، 31 މަޝްރޫޢުއެއް ކުރިއަށްގެންދާއިރު ހަދަންޖެހޭނެއެވެ. އަދި ތިމާވެއްޓަށް އަސަރުފޯރާ މިންވަރު ބަޔާންކުރާ ރިޕޯޓަކާ ނުލައި ކުރިއަށް ގެންދެވިދާނެ މަޝްރޫޢުގެ ގޮތުގައި 25 ކަމެއް ވަނީ ހިމަނާފައެވެ.

އެގޮތުން ގެނެސްފަވާ ބަދަލުގައި، މަގު ހެދުމުގެ މަޝްރޫޢުތަކާއި ގެދޮރު އިމާރާތްކުރުމުގެ މަޝްރޫޢުތަކަށް އީއައިއޭ ހަދަން ނުޖެހޭގޮތަށް ވަނީ ބަދަލު ގެނެސްފައެވެ. އަދި ކުނި މެނޭޖުކުރާ މަރުކަޒުތައް ޤާއިމުކުރުމުގެ މަސައްކަތް ހިމެނެއެވެ.

އީއައިއޭ ހެދުމަށް ފަހުގައި ކުރިއަށް ގެންގޮސްފައިވާ ފެނާއި ނަރުދަމާގެ މަސައްކަތްތަކާއި، ރަށްރަށުގައި ރައްކާތެރިކަމަށް އަޅާފައި އޮންނަ އެއްގަމު ތޮއްޓާއި ބޭރު ތޮށި އިތުރަށް މަރާމާތުކުރާއިރު އީއައިއޭ ހަދަން ނުޖެހޭގޮތް ވަނީ ހަދާފައެވެ. ނަމަވެސް ހަލާކުވެފައިވާ ތޮށި ނަގާ، އައު ތޮއްޓެއް ލާނަމަ އީއައިއޭ ހަދަން ޖެހޭނެއެވެ.

އިމާރާތް ނިމިފައިވާ ތަންތަނުގައި ފުރާޅުގައި ސޯލާ ޕެނަލް ހަރުކުރުމަށްވެސް އީއައިއޭ ހަދަން ނުޖެހޭނެކަމަށް ގަވާއިދަށް ގެނައި ބަދަލުގައި ވަނީ ބަޔާންކޮށްފައެވެ.

ރަށްގިރުމުގެ ސަބަބުން ގޯތިގެދޮރު ޙިމާޔަތްކުރުމުގެ ގޮތުން ރައްކާތެރިކަމުގެ ފިޔަވަޅު އެޅުމާއި ކުއްލި ހާލަތެއް ދިމާވުމުން ފަރުދުންގެ ފުރާނައާއި ގެދޮރާއި މުދާ ރައްކާތެރިކުރުމަށް ވަގުތީގޮތުން އަޅަންޖެހޭ ފިޔަވަޅުތައް އެޅުމަށްވެސް ހުއްދައަށް މަޑުކުރަން ނުޖެހޭނެއެވެ. ކުރިން އުސޫލު އޮތްގޮތުން، މިގޮތަށް ކުއްލި ޙާލަތްތަކުގައި ފިޔަވަޅުއެޅުމަށްވެސް، ހުރަހަކަށްވެގެންދެއެވެ.

މިކަންކަމުގެ އިތުރުން، 300 ކިލޯވޮޓަށް ވުރެ ދަށް ކެޕޭސިޓީގެ ވަގުތީ ޖަނަރޭޓަރު ބަހައްޓައި ބޭނުންކުރުމުގެ ހުއްދަވެސް މިހާރު ވަނީ ދީފައެވެ.

މި ޤަވާއިދު ތަންފީޒުކުރާނީ އެންވާރަމަންޓަލް ރެގިއުލޭޝަން އޮތޯރިޓީންނެވެ. ގަވާއިދަށް ގެނައި ބަދަލުތަކުގެ ތަފްސީލްތައް ގެޒެޓުގައި ވަނީ ހިމަނާފައެވެ.