އެމެރިކާއާއި ޔަހޫދީން ގުޅިގެން ފަށާފައިވާ ހަނގުރާމައިގެ ދަށުން އީރާންގެ ތެޔޮ ރައްކާކުރާ ގުދަންތަކާއި ފެން އުފައްދާ ޕްލާންޓަކަށް ހަމަލާ ދީފިއެވެ. އީރާންގެ ޤަޝަމް އައިލެންޑްގައި ހުންނަ ފެން އުފައްދާ ޕްލާންޓަށް ހަމަލާ ދީފައި ވަނީ އެމެރިކާއިން ކަމަށް އީރާނުން ޤަބޫލު ކުރެއެވެ. ޔަހޫދީންނާއި އެމެރިކާ ގުޅިގެން އީރާނާ ދެކޮޅަށް ހަނގުރާމަ ފަށާފައި ވަނީ ފެބުރުވަރީ 28ވަނަ ދުވަހުއެވެ.
އީރާނުން ވަނީ ޤަޝަމް އައިލެންޑްއަށް ދީފައިވާ ހަމަލާ ކުށްވެރިކޮށް، އެއީ ސަރަޙައްދީ ހަމަޖެހުން ނަގައިލާނެ "ނުރައްކާތެރި ފެށުމެއްގެ" ގޮތުގައި ސިފަކޮށްފައެވެ. އަދި، އިންޒާރު ދީފައެވެ. އީރާންގެ ޚާރިޖީ ވަޒީރު ޢައްބާސް ޢަރާޤިޖީ ވިދާޅުވީ، ފެން ޕްލާންޓަށް ދީފައިވާ ހަމަލާއަކީ އިންސާނިއްޔަތު ކަމާ ޚިލާފު ޖަރީމާއެއް ކަމުގައެވެ. އަދި، އެ ހަމަލާއާ ގުޅިގެން 30 ވަރަކަށް އަވަށުން ފެނުގެ ޚިދުމަތް ކެނޑިފައިވާ ކަން ވެސް އޭނާ ހާމަކުރެއްވިއެވެ.
ޢަރާޤިޖީ ވަނީ، މި ހަމަލާގެ ނަތީޖާ ހިތިވާނެ ކަމުގައި ވިދާޅުވެ، ޔަހޫދީންނާއި އެމެރިކާއަށް އިންޒާރު ދެއްވާފައެވެ. މަސްރަޙު ދިރާސާކުރާ ފަރާތްތަކުން ޤަބޫލުކުރާ ގޮތުގައި، އޭނާ އިޝާރާތް ކުރައްވާފައި އެ ވަނީ ގަލްފުގެ އެހެން ޤައުމުތަކުގައި ހުރި ފެން އުފައްދާ ޕްލާންޓްތަކަށް ބަދަލުހިފުމުގެ ހަމަލާތަކެއް ދިނުމަށެވެ. ޢަރާޤިޖީ ވިދާޅުވި ގޮތުގައި، ޤަޝަމް އައިލެންޑްގައި ހުރި ފެން ޕްލާންޓަށް ދީފައިވާ ޙަަމަލާގެ ފަހަތުގައި އޮތީ އެމެރިކާއެވެ.
އެމެރިކާގެ އަސްކަރިއްޔާއިން ބުނީ، ފެބުރުވަރީ 28 ގައި ފެށި ހަނގުރާމައިގެ ދަށުން މިހާތަނަށް އީރާންގެ 3,000 އަށްވުރެ ގިނަ އަމާޒަށް ހަމަލާ ދީފައިވާނެ ކަމުގައެވެ. މީގެ ތެރޭގައި އީރާނުގެ ކަނޑުގެ ސިފައިންގެ 43 މަނަވަރު ހިމެނެއެވެ. އޭގެ ތެރެއިން އެއް މަނަވަރަށް ހަމަލާދީ، ފައްތައިލާފައި ވަނީ އިންޑިޔާ ކަނޑުގެ ސަރަޙައްދުން ދަތުރު ކުރަމުން ދަނިކޮށެވެ. ޔަހޫދީންނާއި އެމެރިކާ ގުޅިގެން ހިންގަމުންދާ ޖަރީމާތަކުގައި ޝަހީދު ކޮށްލާފައިވާ އީރާންގެ ރައްޔިތުންގެ އަދަދު ވަނީ 1,332 އަށް އުފުލިފައެވެ. އޭގެ ތެރޭގައި ގިނަ އަދަދެއްގެ ޢާންމުންނާއި ކުޑަކުދިން ހިމެނެއެވެ.
ރަޝިޔާގެ ރައީސް ވްލަޑިމިޔަރ ޕުޓިން ދާދިފަހުން ވަނީ އީރާންގެ ރައީސް މަސްޢޫދު ޕީިޒިޝްކިޔާނަށް ފޯނުން ގުޅުއްވައި ތަޢުޒިޔާ ދަންނަވާފައެވެ. ރަޝިޔާއާއި އީރާނަކީ ގާތް ގުޅުންތަކެއް ބާއްވަމުންދާ ދެ ޤައުމެވެ. އެމެރިކާއިން ތުހުމަތު ކުރާ ގޮތުގައި، ޔަހޫދީންނާއި އެމެރިކާގެ މަސްލަޙަތު އޮތް އިމާރާތްތަކަށް އީރާނުން ދެމުންދާ ހަމަލާތަކަށް ރަޝިޔާއިން ދަނީ، ޖާސޫސީ މަޢުލޫމާތު ފޯރުކޮށްދީގެން އެހީތެރިވަމުންނެވެ. ޔަހޫދީ ދައުލަތުގެ ރަށްތަކުގެ އިތުރުން އީރާންގެ ހަމަލާތައް އަމާޒުކުރަމުން ދަނީ ގަލްފާއި ޢަރަބި ޤައުމުތަކުގައި އޮތް އެމެރިކާގެ އަސްކަރީ މަރުކަޒުތަކަށެވެ.
އީރާންގެ އެންމެ ވަރުގަދަ ހަމަލާތައް އަމާޒު ކުރަމުން ދަނީ ޔަހޫދީ ދައުލަތުގެ ވެރިރަށް ތެލް އަވީވާއި ބޮޑެތި ރަށްތަކަށެވެ. ޔަހޫދީންނަށް ހަމަލާ ދިނުމަށް އީރާނުން ދަނީ ބާރުގަަދަ ބެލިސްޓިކް މިސައިލްތަކާއި އަސްކަރީ ޑްރޯން ފަދަ ހަތިޔާރު ބޭނުން ކުރަމުންނެވެ. އަސްކަރީ ދާއިރާގެ މާހިރުން ބުނީ، އީރާންގެ އަމާޒަކީ، އެ ޤައުމުގެ ހަމަލާތައް ދިފާޢު ކުރުމަށް ޔަހޫދީން ބޭނުން ކުރާ ވައިގެ ދިފާޢީ ނިޒާމުގެ އިންޓަރސެޕްޓަރ މިސައިލްތައް ހުސްކޮށްލުން ކަމުގައެވެ. އަދި، ވައިގެ ދިފާޢީ ނިޒާމު ބަލިކަށި ކޮށްލުމެވެ.