ނިއުޒީލޭންޑްގެ އަމާޒަކީ އިންޑިޔާގެ ސަޕޯޓަރުން ހިތް ހަލާކު ކޮށްލުން ކަމަށް އެ ގައުމުގެ ކެޕްޓަން މިޝޭލް ސަންޓްނާ ބުނެފި އެވެ.
ޓުވެންޓީ20 ކްރިކެޓް ވޯލްޑް ކަޕުގެ ފައިނަލުގައި އިންޑިޔާއާ ދެކޮޅަށް އެ ގައުމުގެ ބޮޑު ވަޒީރު ނަރެންދްރަ މޯދީ އަށް ނިސްބަތްވާ ސްޓޭޑިއަމުގައި މިރޭ އިރުއޮއްސޭއިރު ކުޅޭ މެޗުގެ ކުރިން ވާހަކަ ދައްކަމުން މިޝޭލް ބުނީ އެ މީހުން ތަށި ހޯދުމަކީ އިންޑިޔާގެ ބައެއް މީހުންގެ ހިތްހަލާކުވާނެ ކަމެއް ކަމަށެވެ.
"ޔަގީނުން ވެސް އެ މީހުން ހިމޭންވާނެ އޭރުން. އަހަރުމެން ތަށި ހޯދައިފިނަމަ އެ މީހުންގެ ބައެއް މީހުންގެ ހިތް ހަލާކުވާނެ. އަހަރުމެން މި ތިބީ މިކަން ކުރަން ތައްޔާރަށް،" މިޝޭލް ބުންޏެވެ.
އޭނާ ބުނީ ދެ ގައުމުން މި މުބާރާތުގައި ކުޅެފައިވާ މެޗުތަކަށް ބަލާއިރު ފައިނަލް މެޗަކީ ގިނަ ލަނޑުތަކެއް ފެނިގެންދާނެ މެޗަކަށްވާނެ ކަމަށް ބެލެވޭ ކަމަށެވެ.
"އެ މީހުންގެ ބޯލަރުން ވަރަށް މޮޅު. އެކަމަށް އަހަރުމެން ސަމާލު ވާން ޖެހޭނެ. ދެ ޓީމުގައި ވެސް ވަރަށް މޮޅު ބެޓްސްމަނުން އެބަތިބި. އެހެންވީމާ މިއީ ގިނަ ލަނޑުތަކެއް ފެނިގެންދާނެ މެޗަށްވުން ގާތް،" މިޝޭލް ބުންޏެވެ.
މި މެޗަށް ނުކުންނައިރު ނިއުޒީލޭންޑަށް އޮތް އެއް ހިތްހަމަ ޖެހުމަކީ މުބާރާތުގެ ތާރީހެވެ. އެއީ މުބާރާތް ބާއްވާ ގައުމަށް މި މުބާރާތް ގިނަ ފަހަރު ކާމިޔާބު ކުރެވިފައި ނުވާތީ އެވެ. ނަމަވެސް އިންޑިޔާގެ އަމާޒަކީ ތަށި ދިފާއު ކުރުމެވެ.