ލ. ގަމުގައި އެކްސިޑެންޓެއް ހިނގައި ދެ ޒުވާނަކަށް އަނިޔާވެއްޖެ
-
މި އެކްސިޑެންޓު ހިނގީ ހޮނިހިރު ދުވަހުގެ ރޭ 21:39 ހާއިރު
-
ލިބުނު އަނިޔާތަކުގެ ތަފްސީލު ފުލުހުން ހާމައެއް ނުކުރޭ
ލ. ގަމުގައި ކާރަކާއި ސައިކަލެއް ޖެހި ނުރައްކާތެރި އެކްސިޑެންޓެއް ހިނގައި ދެ ޒުވާނަކަށް އަނިޔާވެެއްޖެއެވެ
ދިވެހި ފުލުހުންގެ ޚިދުމަތުން ވިދާޅުވީ، މި އެކްސިޑެންޓް ހިނގާފައިވަނީ ލ. ގަން، ތުނޑީ އަވަށުގެ މާފަތް މަގާއި އިޖުތިމާއީ ހިންގުން ގުޅުނު ހަތަރު އަނގޮޅީގައިކަމަށެވެ. އަދި އެކްސިޑެންޓުގެ މަޢުލޫމާތު ފުލުހުންނަށް ރިޕޯޓްކޮށްފައިވަނީ ހޮނިހިރު ދުވަހުގެ 21:39 އެހާކަންހާއިރުކަމަށެވެ.
މި އެކްސިޑެންޓްގައި އަނިޔާވެފައިވަނީ ސައިކަލުގައި ތިބި ދެ ޒުވާނުންނަށެވެ. އެ ދެ މީހުންނަށް ހޮސްޕިޓަލުގައި ފަރުވާދެމުންދާކަމަށް ފުލުހުން ވަނީ ވިދާޅުވެފައެވެ. އެހެންނަމަވެސް އެމީހުންނަށް ލިބުނު އަނިޔާގެ ތަފްސީލެއް ހާމަކޮށްފައެއްނުވެއެވެ.
ފުލުހުން ވިދާޅުވި ގޮތުގައި މި ހާދިސާގެ ރިޕޯޓު ލިބުމާއެކު އެ ސަރަހައްދުގައި ފުލުހުން ވަނީ ހަރަކާތްތެރި ވާން ފަށާފައެވެ. އަދި މި އެކްސިޑެންޓް ހިނގަން މެދުވެރިވި ސަބަބު ދެނެގަތުމަށްޓަކައި ކުރަންޖެހޭ ތަހުގީގުތައް ފުލުހުން މިހާރު ވަނީ ފަށާފައެވެ.