އެފްއޭއެމް އިން މި އަހަރަށް 48 މިލިޔަން ރުފިޔާގެ ބަޖެޓެއް ފާސްކޮށްފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ހިނގަމުން މިދާ 2026 ވަނަ އަހަރަށް 48 މިލިއަން ރުފިޔާގެ ބަޖެޓެއް ފާސްކޮށްފިއެވެ.

މި ބަޖެޓު ފާސްކޮށްފައި ވަނީ، ތިން އަހަރަށްފަހު ބޭއްވި އެ އެސޯސިއޭޝަންގެ އޯޑިނަރީ ކޮންގްރެސްގެ ތެރެއިންނެވެ. ބަޖެޓު ފާސްކޮސްފައި ވަނީ ކޮންގްރެސްގައި ބައިވެރިވި މެމްބަރުންގެ އަގުލަބިއްޔަތުންނެވެ.

މި އަހަރަށް ފާސްކުރި ބަޖެޓުގެ ޖުމްލަ އަދަދަކީ 48،458،511ރ (ސާޅީސް އަށް މިލިއަން ހަތަރުލައްކަ ފަންސާސް އަށްހާސް، ފައްސަތޭކަ އެގާރަ ރުފިޔާ) އެވެ.

މީގެ ތެރެއިން އެންމެ ބޮޑު ހިއްސާއެއް އަދާކުރަނީ ދުނިޔޭގެ ފުޓުބޯޅައިގެ މައި އިދާރާ، ފީފާއިން ދޭ އެހީއެވެ. އެގޮތުން ފީފާއިން ޖުމްލަ 32،703،111ރ (ބައްތިރީސް މިލިއަން ހަތްލައްކަ ތިންހާސް، ސަތޭކަ އެގާރަ ރުފިޔާ) އެހީގެ ގޮތުގައި ދެއެވެ.

މީގެއިތުރުން، ސްޕޮންސަރޝިޕުން ޖުމްލަ 8،750،000ރ (އަށް މިލިއަން ހަތްލައްކަ ފަންސާސް ހާސް ރުފިޔާ) އެފްއޭއެމް އަށް މި އަހަރު ލިބޭނެކަމަށް ބަޖެޓުގައި ހިމަނާފައިވެއެވެ.

އަދި އެފްއޭއެމް އިން ހިންގާ އެކިއެކި ހަރަކާތްތަކުން ޖުމްލަ 4،897،000ރ (ހަތަރު މިލިއަން އަށްލައްކަ ނުވަދިހަ ހަތްހާސް ރުފިޔާ) ލިބޭނެ ކަމަށާއި، ކުޅިވަރާ ބެހޭ ވުޒާރާއިން ޖުމްލަ 1،8 މިލިއަން ރުފިޔާ ދޭކަމަށް ބަޖެޓުގައި ހިމަނާފައިވެއެވެ.

މީގެއިތުރުން، ޖަޕާނުގެ ފުޓުބޯޅަ އެސޯސިއޭޝަނުން 308،400ރ (ތިން ލައްކަ އަށް ހާސް ހަތަރު ސަތޭކަ ރުފިޔާ) ދޭނެކަމަށް ވެސް ބަޖެޓުގައި ހިމަނާފައިވެއެވެ.

މި އަހަރު ޚަރަދުގެ ގޮތުގައި 48،385،770ރ (ސާޅީސް އަށް މިލިއަން ތިންލައްކަ އަށްޑިހަ ފަސްހާސް ހަތްސަތޭކަ ހަތްދިހަ ރުފިޔާ) ހިނގާނެކަމަށް ބަޖެޓުގައި ހިމަނާފައިވެއެވެ.

އޭގެތެރެއިން އެންމެ ބޮޑު ޚަރަދެއް ހިނގާނެކަމަށް ހިމަނާފައިވަނީ ބާއްވާ މުބާރާތްތަކާއި އެކިއެކި ހަރަކާތްތަކަށެވެ. އެ ކަންކަމަށް ޖުމްލަ 27،299،229ރ (ހަތާވީސް މިލިއަން ދެލައްކަ ނުވަދިހަ ނުވަހާސް ދުއިސައްތަ ނަވާވީސް ރުފިޔާ) ހިނގާނެކަމަށް އަންދާޒާކޮށްފައިވެއެވެ.

އެއަށްފަހު އެންމެ ބޮޑު ޚަރަދެއް، ހިންގުމުގެ ޚަރަދުގެ ގޮތުގައި ހިނގާއިރު އެކަމަށް 10،054،167ރ (ދިހަ މިލިއަން ފަންސާސް ހަތަރުހާސް ސަތޭކަ ފަސްދޮޅަސް ހަތް ރުފިޔާ) ހިނގާނެކަމަށް ބަޖެޓުގައި ހިމަނާފައިވެއެވެ.

އަދި ޤައުމީ ޓީމުތަކަށް ކުރާ ޚަރަދުގެ ގޮތުގައި 6،370،860ރ (ހަ މިލިއަން ތިންލައްކަ ހަތްދިހަ ހާސް އަށްސަތޭކަ ފަސްދޮޅަސް ރުފިޔާ) ހިނގާނެ ކަމަށާއި، ކެޕިޓަލް ޚަރަދުގެ ގޮތުގައި އާއި ވަސީލަތްތަކާއި މެއިންޓަނަންސް ޚަރަދުގެ ގޮތުގައި 3،341،514ރ (ތިން މިލިއަން ތިންލައްކަ ސާޅީސް އެއް ހާސް، ފައްސަތޭކަ ސާދަ ރުފިޔާ) ހިނގާނެ ކަމަށް އަދި މާކެޓިން އާއި އިސްތިހާރު ކުރުމަށް އަށްލައްކަ ރުފިޔާ އާއި ޓެކްނިކަލް ޑިވެލޮޕްމަންޓާއި ފުޓުބޯޅަޔާ ގުޅުންހުރި ތައުލީމީ ކަންކަމަށް 520،000ރ (ފަސް ލައްކަ ވިހި ހާސް ރުފިޔާ) ހިނގާނެ ކަމަށް ވެސް ބަޖެޓުގައި ވެއެވެ.

ޚަރަދު ކެނޑުމަށްފަހު ބަޖެޓުގެ ބާކީގެ ގޮތުގައި ވާނީ ‭72,741‬ރ (ހަތްދިހަ ދެހާސް ހަތްސަތޭކަ ސާޅީސް އެއް ރުފިޔާ) އެވެ.

ކުރީގެ ޒައާމަތުގައި ހިންގުން ދޯދިޔާވެ، ހިންގި މާލީ އެތައް ކުށްތަކެއްގެ ސަބަބުން މާލީގޮތުން ބޮޑެތި ގޮންޖެހުންތަކަކާ ކުރިމަތިވެ، ފުން އަނދަވަޅެއްގައި ގިނަ ދުވަސްތަކެއް ހޭދަކުރުމަށްފަހު، އައު ޒައާމަތަކުން އެފްއޭއެމްގެ ހިންގުމާ ހަވާލުވެ ކުރަމުން އަންނަ ކާމިޔާބު މަސައްކަތްތަކާއެކު، ދިވެހި ފުޓުބޯޅައަށް ދިރުމެއް އައިސް، ބޮޑެތި ކުރިއެރުންތަކެއް އަންނަމުންދާކަން ކުޅިވަރު އާއިލާއިން އުފަލާއެކު ފާހަގަކުރެއެވެ.