އެމެރިކާއާއި ޔަހޫދީން ގުޅިގެން އީރާނާ ދެކޮޅަށް ފެށި ހަނގުރާމަ ހަފުތާއަކަށް ދެމިގެން ގޮސްފައިވާއިރު، ރައީސް ޑޮނަލްޑް ޓްރަމްޕް މި ވަނީ އަމިއްލަފުޅަށް އުފެއްދެވި ސިޔާސީ އަދި އަސްކަރީ ކޮޅިގަނޑެއްގެ ތެރޭގައި ތާށިވެވަޑައިގަންނަވާފައެވެ. ހަނގުރާމައިގެ ތެރެއިން އީރާންގެ ރޫހީ އެންމެ މަތީ ވެރިޔާ، އާޔަތުالله ޢަލީ އަލް-ޚާމަނާޢީގެ އިތުރުން އަސްކަރިއްޔާގެ އިސްވާރުންގެ ތެރެއިން ގިނަ އަދަދެއްގެ ބަޔަކު ޝަހީދުކޮށްލުމަކީ ކާމިޔާބީއެއްގެ ގޮތުގައި ޓްރަމްޕް ދެކެވަޑައިގެންނެވި ނަމަވެސް، މިއީ ދާއިމީ ސިޔާސީ މޮޅަކަށް ބަދަލުކުރެވޭނެ ކަމާމެދު މާހިރުން ދަނީ ސުވާލު އުފައްދަމުންނެވެ.
ޖޯންސް ހޮޕްކިންސް ސްކޫލް ފޯ އެޑްވާންސްޑް އިންޓަރނޭޝަނަލް ސްޓަޑީޒްގެ ދާރިސް ލޯރާ ބްލުމެންފެލްޑް ވިދާޅުވީ، ޓްރަމްޕްގެ ހަނގުރާމައާ ގުޅިގެން ދުނިޔޭގެ އިޤުތިޞާދާއި، ސަރަޙައްދީ ހަމަޖެހުމުގެ އިތުރުން އޭނާގެ ރިޕަބްލިކަން ޕާޓީގެ ކުރިމަގު ވެސް ނުރައްކަލަށް ހުށަހެޅިގެން ގޮސްފައިވާ ކަމުގައެވެ. "މިއީ ވަރަށް ބޮޑު އޮޅުންބޮޅުންގަނޑެއް ފަދަ އަސްކަރީ ކެންޕޭނެއް. ކުރިއަށް އޮތް މިޑްޓަރމް [ދައުރުގެ މެދުގައި ބާއްވާ] އިންތިޚާބުގައި ރިޕަބްލިކަން ޕާޓީއަށް މީގެ ނޭދެވޭ އަސަރު ވަރަށް ބޮޑަށް ކުރާނެ،" އޭނާ ވިދާޅުވިއެވެ.
ޚާއްޞަކޮށް، ދުނިޔޭގެ ތެލުގެ ފަސްބައިކުޅަ އެއްބައި ދަތުރުކުރާ ހުރްމުޛް ކަނޑުއޮޅި ބަންދުވުމުގެ ބިރު އޮތުމުން، އެމެރިކާގެ ތެލުގެ އަގު އުފުލި، ޢާންމު ރައްޔިތުންގެ ޝަކުވާތައް ވަނީ އިތުރުވެފައެވެ. ދިރާސާ ކުރާ ޖަމުޢިއްޔާ، އެޓްލާންޓިކް ކައުންސިލްގެ ފަރާތުން ވާހަކަފުޅު ދައްކަވަމުން ދާރިސް ޖޯޝް ލިޕްސްކީ ވިދާޅުވީ، ހަނގުރާމައާ ގުޅިގެން އުފެދިފައި މިވާ އިޤުތިޞާދީ ލޮޅުންތަކަކީ ޓްރަމްޕްގެ ޓީމުން އެންމެ އެދެވޭ ގޮތެއްގައި އަންދާޒާކޮށްފައިވާ ކަންކަން ނޫން ކަމުގައެވެ.
"ކޮސް" ހަނގުރާމައެއްގެ ތެރެއަށް އެމެރިކާ ވައްޓައިނުލެއްވުމަކީ ޓްރަމްޕްގެ ރިޔާސީ ވަޢުދެކެވެ. ނަމަވެސް، އީރާން ހަނގުރާމައަކީ އޭނާގެ އަމިއްލަ އިޚުތިޔާރުގައި ފަށްޓަވާފައިވާ ހަނގުރާމައެއް ކަމުގައި އެމެރިކާގެ ޢާންމުންގެ ތެރެއިން ގިނަ ބަޔަކު ޤަބޫލު ކުރެއެވެ. 'އޮޕަރޭޝަން އެޕިކް ފިޔުރީ'އަކީ 2003 ވަނަ އަހަރަށް ފަހު އެމެރިކާއިން ފަށާފައިވާ އެންމެ ބޮޑު އަސްކަރީ ހަރަކާތެވެ. ނަމަވެސް، މި ހަނގުރާމަ ނިމިގެންދާނެ ގޮތް ޚުދު ޓްރަމްޕަށް ވެސް އަދި އޭނާގެ ވައިޓް ހައުސަށް ވެސް ސާފުކޮށްދެވިފައެއް ނެތެވެ. މިކަމާ ދެކޮޅަށް އަޑުއުފުއްލަވަމުން ޓްރަމްޕްގެ ރިޕަބްލިކަން ޕާޓީގެ އިސްތިރާޖީ ރޭވުންތަކާ ބެހޭ މާހިރެއް ކަމުގައިވާ ބްރަޔަން ޑާލިންގ ވިދާޅުވީ، "އެމެރިކާގެ ރައްޔިތުން ތިބީ ޢިރާޤާއި އަފްޣާނިސްތާނުގައި [އެމެރިކާއިން] ހެދި ގޯސްތައް ތަކުރާރުކުރަން ބޭނުންވެފައެއް ނޫން،" ކަމުގައެެވެ.
ހަނގުރާމައިގައި އެމެރިކާއާއި ޔަހޫދީން ދަނީ އީރާންގެ ގިނަ އަދަދެއްގެ ބަޔަކު ޝަހީދު ކުރަމުންނެވެ. މި ގޮތުން، ޝަހީދު ކޮށްލާފައިވާ މީހުންގެ 1,300އަށްވުރެ މައްޗަށް އުފުލިފައިވާއިރު، އޭގެ ތެރޭގައި ގިނަ އަދަދެއްގެ ޢާންމުންނާއި ކުޑަކުދިން ހިމެނެއެވެ. އީރާނުން ވެސް ވަނީ ރައްދު ޙަމަލާދީ އެމެރިކާ ސިފައިންގެ ހަ މީހުން މަރައިލާފައެވެ. ނަމަވެސް، އެ އަދަދަށް މާ ބޮޑު ސަމާލުކަމެއް ދެއްވުމެއް ނެތި ޓްރަމްޕް ވިދާޅުވީ "ބައެއް މީހުން މަރުވާނެ" ކަމުގައި އޭނާ ކުރިން ވެސް ވިދާޅުވެފައިވާނެ ކަމުގައެވެ. އެމެރިކާގެ ޖާސޫސީ އޮފިސަރެއްގެ ގޮތުގައި ކުރިން ޚިދުމަތް ކުރައްވާފައިވާ ޖޮނެތަން ޕެނިކޮފް ވިދާޅުވީ، ހަނގުރާމަ ހުއްޓުމަކަށް ގެނައުމަށް ޓްރަމްޕްގެ ސަރުކާރުން ތެޅިގަންނާނީ އެމެރިކާގެ ގިނަ އަދަދެއްގެ ސިފައިންގެ ބަޔަކު މަރުވުމުން ކަމަށް ޤަބޫލު ކުރައްވާ ކަމުގައެވެ.