މާލޭގެ މިންބަރުތަކުން އެއްދުވަހެއްގައި ގިނަ ޒުވާން ޚަޠީބުން

މާލޭގެ ގިނަ މިސްކިތްތަކުގައި މިދިޔަ ހުކުރުދުވަހު އިމާމުވެ ހުކުރު ނަމާދުކުރީ ޒުވާން ޚަތީބުންނެވެ. މާލޭގެ އެންމެ ބޮޑު މިސްކިތްތައްކަމަށްވާ އިސްލާމީ މަރުކަޒާއި ސަލްމާން މިސްކިތް ހިމެނޭހެން 26 މިސްކިތެއްގައި ޒުވާން ޚަޠީބުންވަނީ އިމާމުވެ ހުކުރު ކޮށްފައެވެ.

ޒުވާން ޚަތީބުން ތަމްރީނުކުރުމުގެ ޕްރޮގްރާމަކީ، ރާއްޖޭގެ އެކި ސަރަޙައްދުތަކަށް ކުރިމަތިވެފައިވާ އިމާމުންގެ ދަތިކަމަށް ޙައްލެއް ގެނައުމަށް ސަރުކާރުން ފައްޓަވާފައިވާ ޕްރޮގްރާމެކެވެ.

ކޮންމެ އަހަރަކުވެސް ޚާއްސަކޮށް ރަމަޟާންމަހާ ދިމާކޮށް، މާލެއާއި އަތޮޅުތެރޭގެ ރަށްރަށުގެ މިސްކިތްތަކުގައި ތަރާވީޙް ނަމާދު ކުރުމަށާއި، އަދި އެ ނޫނަސް އެހެނިހެން ނަމާދުތައް އިމާމުވެ ކުރައްވާނެ އިމާމުން ގެންނަނީ ބޭރުގެ ގައުމުތަކުންނެވެ. އަދި މިކަމަށް ސަރުކާރުން އެތައް ފައިސާއެއް ޚަރަދުކުރެއެވެ.

އަހަރުތަކަކަށް ދެމިގެންދިޔަ ދިވެހިންގެ މި އާދަ ބަދަލުކުރުމަށާއި، މުސްތަޤުބަލަށް މިޤައުމު ފަޚުރުވެރިވާ ފަދަ ޒުވާން އިސްލާމީ ޝަޚްޞިއްޔަތުން ނެރުމުގެ މަޤްސަދުގައި ސަރުކާރުން ފެއްޓެވި، ޒުވާން ޚަތީބުން ތަމްރީނު ކުރުމުގެ ޕްރޮގްރާމަށް އާންމުންގެބޮޑު ތަރުޙީބެއް އަންނަނީ ލިބެމުންނެވެ.

ޒުވާން ޚަތީބުން ތަމްރީނުކޮށް، މިސްކިތްތަކުގައި އިމާމުވެ ނަމާދުކުރުމުގެ ފުރުޞަތުތައް އެ ފަރާތްތަކަށް ފަހިކޮށްދެއްވުމަކީ، ދީނީ ކަންކަމަށް ޒުވާނުންގެ ހިތްތަކުގައި ލޯބި ޖައްސައި، ދީނީ ކަންކަމުގެ ކުރީ ސަފުގައި މަސައްކަތްކުރާ ޒުވާނުން އުފެއްދުމުގެ އިތުރުން، ބޮޑުވަމުން އަންނަ ކުދިން ދީނީ ކަންކަމުގައި ޝާމިލުވުމަށް ޝަޢުގުވެރިކަން އުފެއްދުމުގެ މަޤްސަދުގައި އިސްލާމީ ކަންތައްތަކާބެހޭ ވުޒާރާއިން ފައްޓަވާފައިވާ މުހިންމު މަސައްކަތެކެވެ.

އިސްލާމީ ކަންތައްތަކާބެހޭ ވުޒާރާއިން ވިދާޅުވީ، ޒުވާން ޚަޠީބުންނަށް މިސްކިތްތަކުގައި އިމާމުވެ ނަމާދުކުރުމުގެ ފުރުސަތު ދެއްވާފައިވަނީ، އިސްލާމީ ކަންކަން ހިންގުމާއި އިސްލާމީ ޚިދުމަތުގައި އެ ޒުވާނުންނަށް އޮތް ފުރުސަތުގެ ތަނަވަސްކަން ޔަޤީންކޮށްދިނުމަށްކަމަށެވެ.

އެގޮތުން އުމުރުން ވަރަށް ހަގު ކުދިންނަށްވެސް މިސްކިތްތަކުގައި އިމާމުވެ ނަމާދުކުރުމުގެ ފުރުޞަތު ދެމުން އަންނަކަން ފާހަގަކޮށްލެވެއެވެ. މި މަސައްކަތުގެ ތެރެއިން، މިދިޔަ ހުކުރުދުވަހު މާލޭގެ ގިނަ މިސްކިތްތަކުގައި އިމާމުވެ ހުކުރުކުރެއްވުމުގެ ފުރުސަތު ޒުވާން ޚަތީބުންނަށްވަނީ ދެއްވާފައެވެ. މާލޭގެ އެންމެ ބޮޑު މިސްކިތްތައްކަމަށްވާ އިސްލާމީ މަރުކަޒާއި ސަލްމާން މިސްކިތް ހިމެނޭހެން 26 މިސްކިތެއްގައި ޒުވާން ޚަޠީބުން ވަނީ މިދިޔަ ހުކުރުދުވަހު އިމާމުވެ ހުކުރު ކޮށްފައެވެ.

އިސްލާމީކަންތައްތަކާ ބެހޭ ވުޒާރާއިން ފަށާފައިވާ ޒުވާން ޚަޠީބުން ތަމްރީން ކުރުމުގެ ޕްރޮގުރާމުގެ ދަށުން މިހާތަނަށް 500 އަށްވުރެ ގިނަ ޒުވާން ޚަޠީބުންވަނީ ތަމްރީނުކޮށްފައެވެ. އަމާޒަކީ، ކުރިއަށް އޮތް 5 އަހަރު ތެރޭގައި 1000 ޒުވާން ޚަޠީބުން ތަމްރީނުކުރުންކަމަށް އިސްލާމީކަންތައްތަކާ ބެހޭ ވުޒާރާއިން ވިދާޅުވެއެވެ.