ސުކޫލުތަކަށް ހާއްސަ ވޮލީ މުބާރާތަށް މިހަފްތާގައި ހުޅުވާލަނީ

ހުރިހާ ސަރަހައްދެއްގެ ސުކޫލުތަކަށް ހުޅުވާލައިގެން މިއަހަރު 8 ޒޯނެއްގައި "ރާއްޖެ ޖޫނިއަރ ޗެމްޕިއަންޝިޕް ސުކޫލު އެޑިޝަން"ގެ ނަމުގައި މިއަހަރު ބާއްވަން ނިންމާފައިވާ މުބާރާތްތަކަށް ފެށޭ ހަފްތާގެތެރޭގައި ހުޅުވާލާނެ ކަމަށް ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ބުނެފިއެވެ.

މިއީ 14 އަހަރުން ދަށް، 16 އަހަރުން ދަށް އަދި 19 އަހަރުން ދަށުގެ އުމުރުފުރައަށް ހާއްސަކޮށްގެން ކުރިޔަށް ގެންދިއުމަށް ނިންމާފައިވާ މުބާރާތްތަކެކެވެ.

އެ އެސޯސިއޭޝަނުން މިމަހު އާންމުކޮށްފައިވާ ކަލަންޑަރުގައި ވާގޮތުން ސުކޫލުތަކަށް ހާއްސަ މުބާރާތްތައް ބާއްވާނީ 1-12 އޭޕްރީލްގެ ނިޔަލަށެވެ. އެއީ ހއ، ހދ އަދި ށ އަތޮޅު ހިމެނޭ ޒޯން އެކެއްގެ މުބާރާތާއި، ނ، ރ، ބ އަދި ޅ އަތޮޅު ހިމެނޭ ޒޯން 2 ގެ މުބާރާތާއި އައްޑޫ ސިޓީއާއި ފުވައްމުލައް ސިޓީ ހިމެނޭ ޒޯން 8 ގެ މުބާރާތެވެ. އެއަށްފަހު 15-27 އޭޕްރީލަށް އޮންނާނީ، ގއ އަދި ގދ ހިމެނޭ ޒޯން 7 ގެ މުބާރާތެވެ.

ކ، އއ، އދ އަދި ވ އަތޮޅު ހިމެނޭ ޒޯން 3 ގެ މުބާރާތް އޮންނާނީ 2-14 މޭއިގެ ނިޔަލަށެވެ. މ، ފ އަދި ދ އަތޮޅު ހިމެނޭ ޒޯން 4 އަދި ތ އަތޮޅާއި ލ އަތޮޅު ހިމެނޭ ޒޯން 5ގެ މުބާރާތް އޮންނާނީ 31 މޭއިން 11 ޖޫންގެ ނިޔަލަށެވެ. މާލެ ސަރަހައްދުގެ ސުކޫލުތަކަށް ހުޅުވާލައިގެން ބާއްވާ ޒޯން 6 ގެ މުބާރާތް އޮންނާނީ ޖުލައި 29 ން 13 އޮގަސްޓްގެ ނިޔަލަށެވެ.

މިކަމާގުޅޭ ގޮތުން ޕީއެސްއެމް ނިއުސްއަށް މައުލޫމާތު ދެއްވަމުން ވީއޭއެމްގެ ރައީސް މުޙައްމަދު ލަތީފް ވިދާޅުވީ ޒޯންތަކުން ލިބޭ ތަރުހީބަށް ބަލާފައި މަދުވެގެން 4 ޓީމު ބައިވެރިވާނަމަ ތާވަލާއި އެއްގޮތަށް ހުރިހާ ޒޯނެއްގައިވެސް މުބާރާތްތައް ބާއްވާނެ ކަމަށެވެ.

ހުރިހާ ކުޅިވަރަކުންވެސް ސޫކޫލުތަކުގެ ކުދިންނަށް ހާއްސަ މުބާރާތްތައް ބޭއްވުމަށް، އެޑިއުކޭޝަން މިނިސްޓްރީއާއި އެސޯސިއޭޝަންތަކުން އެއްބަސްވުމަކަށް އާދެވިފައިވަނީ ރާއްޖެ ޖޫނިއަރ ޗެމްޕިއަންޝިޕްގެ ނަމުގައި ކަމަށާއި، އެހެންނަމަވެސް އެންމެ ރަނގަޅު ގޮތަކީ އިންޓަރސުކޫލުގެ ނަމުގައި މުބާރާތްތައް ބޭއްވުމަށް ކަމަށް ވީއޭއެމުން ދެކޭ ކަމަށް ލަތީފް ވިދާޅުވިއެވެ.

"އަސްލުގައި އިންޓަރސުކޫލު ނަމުގައި މި މުބާރާތްތައް ބޭއްވުން އެންމެ ރަނގަޅު ގޮތަކީ. އެކަމަކު އެޑިއުކޭޝަން މިނިސްޓްރީން ހުއްދައެއް ނުދޭ. މިއީ ކުޅިވަރަށް އެޅޭ ވަރަށް ބޮޑު ހުރަހެއް. އެއީ ކުޅިވަރު ޤާނޫނުގެ ދަށުން މުޅި ރާއްޖޭގައި ކުޅިވަރުތައް ކުރިއެރުވުން އެސޯސިއޭޝަންތަކަށް މެންޑޭޓްކޮށްފައި އޮތް ކަމެއްމީ" ލަތީފް ވިދާޅުވިއެވެ.

ސުކޫލުތަކުގެ މި އުމުރުފުރާތަކުގެ މުބާރާތްތަކަކީ ގައުމީ ޓީމުތަކަށް ހުނަރުވެރި ކުޅުންތެރިން ހޯދުމަށް ވަރަށް މުހިންމު މުބާރާތްތަކެއް ކަމަށްވެސް ލަޠީފް ފާހަގަކުރެއްވިއެވެ.

"މިއީ ވަރަށް މުހިންމު މުބާރާތެއް ނޭޝަނަލް ޓީމަށް ކުޅުންތެރިން ހޯދުމަށް. ސުކޫލު މުބާރާތްތަކުން ފާހަގަކޮށްލެވޭ ކުދިން އަޅުގަނޑުމެން މާލެ ގެނެސް، މާލޭގައި ތިބެވޭނެ ގޮތެއް އެ ކުޅުންތެރިންނަށް ހޯދައިދީގެން ކުރިޔަށްދާން ބޭނުންވަނީ. ގައުމީ ޓީމުތަކަށް ފައިދާ ކުރާނެ ގޮތެއް އެއީ" ލަތީފް ވިދާޅުވިއެވެ.

މީގެ އިތުރުން ރާއްޖެ ޖޫނިއަރ ޗެމްޕިއަންޝިޕްގެ ނަމުގައި މިއަހަރުގެ ޑިސެމްބަރުގައި ކައުންސިލުތަކަށް ހުޅުވާލައިގެން ހާއްސަ ވޮލީ މުބާރާތެއް ބޭއްވުމަށްވެސް ވީއޭއެމްއިން ވަނީ ނިންމާފައެވެ. މި މުބާރާތް އޮންނާނީ 16 އހަަރުން ދަށް، 18 އަހަރުން ދަށް އަދި 21 އަހަރުން ދަށުގެ އުމުރުފުރާއަށް ހާއްސަކޮށްގެންނެވެ. މިއީ މިދިޔަ އަހަރުވެސް ވަރަށް ފޯރިއާއެކު ބޭއްވި މުބާރާތެކެވެ.