މެދުއިރުމަތީގައި ހިނގަމުންދާ ހަނގުރާމައިގެ ސަބަބުން އެއްގަމާއި ކަނޑާއި ވައިގެ މަގުން އިންސާނީ އެހީ ފޯރުކޮށްދޭ މައި މަގުތަކަށް ބުރޫއަރައި، ދުނިޔޭގެ އެންމެ ބޮޑު އިންސާނީ ކާރިޘާތައް ތަޙައްމަލު ކުރަމުންދާ މީހުންނަށް ބޭނުންވާ ކާބޯތަކެއްޗާއި ބޭސްފަރުވާގެ އެހީ ފޯރުކޮށްދިނުމުގައި ބޮޑެތި ލަސްތަކެއް ކުރިމަތިވަމުންދާ ކަމަށް ބައިނަލްއަޤުވާމީ އެހީދޭ ޖަމްޢިއްޔާތަކުން ބުނެފިއެވެ.
އެމެރިކާއާ ގުޅިގެން ޔަހޫދީންގެ ނިރުބަވެރި ދަޢުލަތުން އީރާނަށް ޙަމަލާދިނުމާއެކު، މެދުއިރުމަތީގައި ހިނގަމުންދާ ކުރިމަތިލުންތަކަށް މިހާރު ހަތް ދުވަސް ވެފައިވާއިރު، މީގެ ސަބަބުން ދުނިޔޭގެ ބާޒާރަށް ބޮޑެތި ލޮޅުންތަކެއް އަރައި، މެދުއިރުމަތީގެ ވައިގެ ސަރަޙައްދުތައް ބަންދުކުރުމާއި މުޙިންމު ކަނޑުއޮޅިއެއް ކަމަށްވާ ހޮރްމުޒް ކަނޑުއޮޅިން ދަތުރުފަތުރު ކުރުން ހުއްޓުމަކަށް އައުމުގެ ސަބަބުން، މުދާ އުފުލުމުގެ ނިޒާމަށް ވަނީ ބޮޑެތި ހުރަސްތަކެއް ކުރިމަތިވެފައެވެ.
ދުނިޔޭގައި މިވަގުތު އެހީއަށް އެންމެ ބޮޑަށް ބޭނުންޖެހިފައިވާ ފަލަސްޠީނުގެ ޣައްޒާ އާއި ސޫދާނަށް ފޯރުކޮށްދޭ އެހީތައް ގާތްގަނޑަކަށް ހުއްޓުމަކަށް އައިސްފައިވާއިރު، ދުނިޔޭގެ އެކި ކަންކޮޅުތަކުގައި ހައިހޫނުކަން ކުރިމަތިވެފައިވާ އެތައް މިލިއަން ބަޔަކަށް އެހީތެރިކަން ފޯރުކޮށްދިނުމުގެ ޚަރަދުތައް ވަނީ އިންތިހާއަށް އުފުލިފައެވެ.
ވޯލްޑް ފުޑް ޕްރޮގްރާމްގެ ފުޑް ސެކިއުރިޓީ ޑިރެކްޓަރު ޖީން-މާޓިން ބައުއާ ވިދާޅުވި ގޮތުގައި، އެހީއަށް ނުހަނު ބޭނުންވެފައިވާ މީހުންނަށް ކާބޯތަކެތި ލިބުމަށް ކުރަންޖެހޭ އިންތިޒާރު މިހާރު އިހުނަށްވުރެ ދިގުވެފައިވާ ކަމަށެވެ.
އިންޓަނޭޝަނަލް އޯގަނައިޒޭޝަން ފޯ މައިގްރޭޝަން (އައިއޯއެމް) އިން ހާމަކުރި ގޮތުގައި، ޔަހޫދީން އިސްތިޢުމާރުކޮށްފައިވާ ޣައްޒާއި ހުޅަނގު އައްސޭރިއަށް ފޮނުވަން ހަމަޖެހިފައިވާ ފޭލިގެތަކާއި، ސަތަރި އަދި ބައްތި ފަދަ ތަކެތި ވަނީ މުދާ އުފުލުމުގެ ނިޒާމުގެ ތެރޭގައި ތާށިވެފައެވެ.
އެހީދޭ ޖަމްޢިއްޔާތަކުން ބުނާ ގޮތުގައި، ދުނިޔޭގެ ބޮޑެތި ޤައުމުތަކުން އެހީދޭ މިންވަރު އެތައް ގުނައަކުން މަދުވެފައިވާ ދަނޑިވަޅެއްގައި، އެހީ ފޯރުކޮށްދިނުމުގެ ޚަރަދުތައް އިތުރުވުމަކީ ބަޖެޓަށް ބޮޑު ބުރައެކެވެ. އައިއޯއެމްއިން ބުނި ގޮތުގައި، މުދާ އުފުލާ ކުންފުނިތަކުން ކޮންމެ ކޮންޓޭނަރަކަށް ގާތްގަނޑަކަށް 3,000 އެމެރިކާ ޑޮލަރުގެ އިތުރު ފީއެއް މިހާރު ދަނީ ނަގަމުންނެވެ.
ދުބާއީގެ ހިއުމަނިޓޭރިއަން ހަބްގައި ހުންނަ ގުދަންތަކުގައި، ކާރިޘާތަކުގައި އަވަހަށް ފޯރުކޮށްދިނުމަށް ރައްކާކޮށްފައިވާ މުދާތައް އެހެން ސަރަޙައްދުތަކަށް ފޮނުވުމަށް އެހީދޭ ޖަމްޢިއްޔާތަކަށް ވަނީ ބޮޑެތި ގޮންޖެހުންތަކާ ކުރިމަތިލާން ޖެހިފައެވެ.
ރެޑް ކްރޮސް އަދި ރެޑް ކްރެސެންޓުން ބުނީ، އީރާނަށް ދެމުންދާ ޙަމަލާތަކުގައި ވެއްޓިފައިވާ ޢިމާރާތްތަކުގެ ދަށުން މީހުން ސަލާމަތް ކުރުމުގެ މަސައްކަތަށް އެހީވުމަށް ބޭނުންވާ، ގާތްގަނޑަކަށް 13 މިލިއަން ޑޮލަރު ސާމާނު ވެސް ދުބާއީގެ އެހީ ގުދަންތަކުގައި ތާށިވެފައިވާ ހުރި ކަމަށެވެ.
ދުނިޔޭގެ ސިއްޙަތު ޖަމްޢިއްޔާ، ޑަބްލިޔުއެޗްއޯއިން ވެސް މެދުއިރުމަތީގެ އޮޕަރޭޝަން ހުއްޓުމަކަށް އައުމުގެ ސަބަބުން، ތަފާތު 25 ޤައުމަކުން އެދިފައިވާ އެހީއަށް އިޖާބަ ދިނުމުގައި ހުރަސްތައް ކުރިމަތިވެފައިވާ ކަމަށެވެ. އޭގެތެރޭގައި ޕޯލިއޯ ފަދަ ވެކްސިންތައް ވެސް ނުފޮނުވި، ތާށިވެފައިވާ ހުރި ކަމަށް އެ ޖަމްޢިއްޔާއިން ބުންޏެވެ.
މެދުއިރުމަތީގެ ކުރިމަތިލުންތަކުގެ އަޞަރުތައް ސޫދާނަށް އެހީ ފޯރުކޮށްދިނުމުގެ މަސައްކަތަށް ވެސް ވަނީ ފޯރައިފައެވެ. މިގޮތުން، މެދުއިރުމަތީގެ މަގުތަކުން އެފްރިކާ ބައްރުގެ ޤައުމުތަކަށް އާންމުކޮށް މުދާ ފޮނުވުމަށް ބޭނުންކުރާ މަގުތަކަށް ކުރިމަތިވެފައިވާ ހުރަސްތަކާއެކު، އެހެން މަގަކުން އެހީ ފޮނުވުމުގައި އިތުރު ތިން ހަފްތާ ހޭދަވާނެކަމަށް އެހީދޭ ޖަމްޢިއްޔާތަކުން ވަނީ ބުނެފައެވެ.