5 ލައްކަ ފަތުރުވެރިންނާއެކު 8.8 އިންސައްތައިގެ ކުރިއެރުމެއް

މިއަހަރުގެ މިހާތަނަށް ރާއްޖެއަށް 5 ލައްކައަށްވުރެ ގިނަ ފަތުރުވެރިން ޒިޔާރަތްކޮށްފިއެވެ. މިއީ މިދިޔަ އަހަރުގެ މި މުއްދަތާއި އަޅާބަލާއިރު %8.8 އިތުރު އަދަދެކެވެ.

ފަތުރުވެރިކަމާއި ތިމާވެއްޓާބެހޭ ވުޒާރާގެ ތަފާސްހިސާބުތައް ދައްކާގޮތުން މިމަހުގެ 4 ވަނަ ދުވަހުގެ ނިޔަލަށް ރާއްޖެއަށް 502252 ފަތުރުވެރިން ވަނީ ޒިޔާރަތްކޮށްފައެވެ. މިދިޔަ އަހަރުގެ މި މުއްދަތުގައި ރާއްޖެ ޒިޔާެރަތްކުރީ 461839 ފަތުރުވެރިންނެވެ. އެހެންކަމުން މިއީ %8.8 އިތުރުވުމެކެވެ.

އަހަރުގެ މިހާތަނަށް ރާއްޖެއަށް އެންމެ ގިނަ އަދަދަކަށް ފަތުރުވެރިން އައިސްފައިވަނީ ޗައިނާއިންނެވެ.

އެންމެ ގިނައިން ފަތުރުވެރިން އައިސްފައިވާ 5 ޤައުމު:

• ޗައިނާ: 79681 ފަތުރުވެރިން
• ރަޝިއާ: 57466 ފަތުރުވެރިން
• އިޓަލީވިލާތް: 48417 ފަތުރުވެރިން
• އިނގިރޭސިވިލާތް: 46005 ފަތުރުވެރިން
• ޖަރުމަނުވިލާތް: 31344 ފަތުރުވެރިން

މި މުއްދަތުގެ ތެރޭގައި ރާއްޖެ އައި ފަތުރުވެރިންގެ ތެރެއިން އެންމެ ގިނަ އަދަދެއްގެ ފަތުރުވެރިން ޗުއްޓީ ހޭދަކޮށްފައިވަނީ ރިސޯޓްތަކުގައެވެ. އެއީ 336579 ފަތުރުވެރިންނެވެ. 2 ވަނައަށް އެންމެ ގިނަ ފަތުރުވެރިން ޗުއްޓީ ހޭދަކޮށްފައިވަނީ ގެސްޓްހައުސްތަކުގައެވެ. އެއީ 131261 ފަތުރުވެރިންނެވެ.

ފަތުރުވެރިކަމާ ބެހޭ ވުޒާރާގެ ތަފާސްހިސާބުތައް ދައްކާގޮތުން އެވްރެޖްކޮށް މިހާރު ދުވާލެއްގެ މައްޗަށް ރާއްޖެއަށް ފަތުރުވެރިންގެ އަދަދު ވަނީ ބޮޑަށް ދަށްވެފައެވެ. ސަބަބަކީ މެދުއިރުމަތީގައި މިހާރު ހިނގަމުންދާ ހަނގުރާމައާއި ގުޅިގެން ފަތުރުވެރިން ރާއްޖެ އަންނަ ގިނަ މަންޒިލްތަކެއްގެ ފްލައިޓްތައް ވަނީ ހުއްޓާލާފައިވުމާއި ގުޅިގެންނެއެވެ.

މިހާލަތުން އަރައިގަތުމަށް ސަރުކާރުން މަސައްކަތް ކުރަމުންދާއިރު ހުއްޓިފައިވާ ބައެއް ފްލައިޓްތައް އަލުން އޮޕަރޭޓްކުރުމުގެ މަސައްކަތްވެސް ދަނީ ކުރަމުންނެއެވެ. އަދި އިތުރު މަންޒިލްތަކުން ފްލައިޓްތައް ގެނައުމުގެ މަސައްކަތްވެސް ސަރުކާރާއި ކަމާއި ގުޅުން ހުރި އިދާރާތަކުން ދަނީ ކުރަމުންނެއެވެ.