އިއްތިހާދު އެއާވޭސްއިން ރާއްޖެއަށް އަލުން ދަތުރުތައް ފަށައިފި

ހަނގުރާމައާ ގުޅިގެން މެދުކަނޑާލާފައިވާ އިއްތިހާދު އެއާވޭސްގެ ދަތުރުތައް، މިއަދުން ފެށިގެން ވަކި މަންޒިލްތަކަކަށް އަލުން ފެށުމަށް އެ އެއަރލައިނުން ނިންމައިފިއެވެ. މި ދަތުރުތައް ކުރުމަށް ނިންމާފައިވަނީ މިމަހުގެ 6އިން 19އަށެވެ.

އިއްތިހާދު އެއަރލައިނުން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ، އެ އެއަރލައިންގެ ދަތުރުތައް އަލުން ފެށުމަށް ނިންމީ ކަމާބެހޭ އިދާރާތަކާ ގުޅިގެން ސަލާމަތީ ގޮތުން ބަލަންޖެހޭ ކަންކަން ފުރިހަމައަށް ކަށަވަރު ކުރުމަށްފަހުގައިކަމަށެވެ.

އެ އެއާލައިނުން އަބޫދާބީއާއި ދުނިޔޭގެ މުހިންމު 25 މަންޒިލަކާ ދެމެދު ދަތުރުތައް ކުރުމަށް ހަމަޖެހިފައިވެއެވެ. އޭގެ ތެރޭގައި ރާއްޖޭގެ އިތުރުން ލަންޑަން، ނިއުޔޯކް، ފްރެންކްފަޓް، މިލާން، ޕެރިސް، ޓޮރޮންޓޯ، ކުއާލަލަމްޕޫރު، ކޮލަމްބޯ އަދި ބެންކޮކް ފަދަ ސިޓީތައް ހިމެނެއެވެ.

އެމެރިކާ-އީރާން ހަނގުރާމައާ ގުޅިގެން ދަތުރުތައް މެދުކަނޑާލުމުގެ ސަބަބުން ދަތުރު ނުކުރެވިފައިވާ ފަރާތްތަކަށް އިސްކަންދީގެން ޖާގަ ހަމަޖައްސައިދިނުމުގެ މަސައްކަތް އެ އެއަރލައިނުން އަންނަނީ ކުރަމުނެނެވެ.

އެގޮތުން ފެބުރުވަރީ 28ގެ ކުރިން ޓިކެޓް ނަގާފައިވާ އަދި 21 މާޗުއާ ހަމައަށް ދަތުރުކުރަން އޮތް ފަރާތްތަކަށް، އެއްވެސް އިތުރު ފީއަކާ ނުލައި 15 މެއި 2026 ގެ ކުރިން ދަތުރުގެ ތާރީޚު ބަދަލުކުރެވޭނެއެވެ.

އަދި މިމަހުގެ 21އާހަމައަށް ދަތުރުކުރަން އޮތް ފަރާތްތަކަށް، ދަތުރު ކެންސަލްކޮށް ރީފަންޑަށް އެދުމުގެ ފުރުސަތު އޮންލައިން ފޯމު މެދުވެރިކޮށް ނުވަތަ ޓްރެވަލް އެޖެންޓުން މެދުވެރިކޮށް ލިބޭނެކަމަށް އެ އެއަރލައިނުން ވިދާޅުވެއެވެ.

މީގެއިތުރުން، ކޯލް ސެންޓަރުތަކަށް ބާރުބޮޑުވެފައިވާތީ، ރީފަންޑަށް އެދޭ ފަރާތްތަކުން އޮންލައިން ފޯމު ބޭނުންކުރުމަށް އެ އެއަރލައިނުންވަނީ އެދިފައެވެ.