އީރާނުގެ ދެކުނުގެ ސިޓީއެއް ކަމަށްވާ މިނާބްގައި ހުންނަ އަންހެން ކުދިންގެ މަދަރުސާއަކަށް ބޮންއަޅައި، 180އެއްހާ ދަރިވަރުން ޝަހީދުކޮށްލި ނިރުބަވެރި ޙަމަލާގެ ޒިންމާ އުފުލަންޖެހެނީ އެމެރިކާގެ އަސްކަރިއްޔާއިން ކަމަށް ބެލެވޭ ކަމުގައި އެމެރިކާގެ އަސްކަރިއްޔާގެ ތަޙުޤީޤީ އިދާރާއިން ހާމަކޮށްފިއެވެ. ނަން ހާމަކޮށްފައި ނުވާ އެމެރިކާގެ ދެ އޮފިޝަލަކު ވިދާޅުވީ، މިހާތަނަށް ލިބިފައިވާ ހެކިތަކުން މި ޙަމަލާއަކީ އެމެރިކާގެ ފައުޖުތަކުން ދީފައިވާ ޙަމަލާއެއް ކަމަށް ބެލެވޭ ކަމުގައެވެ. ނަމަވެސް، އެ ކަން ކަށަވަރު ކުރެވޭނީ ތަޙުޤީޤު ނިމުމުން ކަމުގައި ވެސް އޮފިޝަލުން ފާހަގަކުރެއްވިއެވެ.
މިނާބްގެ މަދަރުސާއަކަށް ބޮންއަޅައި ކުޑަކުދިންތަކެއް ޝަހީދު ކޮށްލާފައި ވަނީ ފެބުރުވަރީ 28ވަނަ ދުވަހު އެމެރިކާއާއި ޔަހޫދީން ގުޅިގެން އީރާނާ ދެކޮޅަށް ފެށި ޣައިރުޤާނޫނީ ހަނގުރާމައިގެ ފުރަތަމަ ދުވަހުއެވެ. އެ ދުވަހު ޝަހީދު ކޮށްލާފައިވާ 180 ކުދިންގެ ޖަނާޒާ ބާއްވާފައި ވަނީ މާރިޗު 3ވަނަ ދުވަހުއެވެ. އެ ޙަމަލާގެ މިނިވަން އަދި ފުރިހަމަ ތަޙުޤީޤެއް ހިންގުމަށް އެކުވެރި ދައުލަތްތައް (އދ)ގެ އިންސާނީ ޙައްޤުތަކާ ބެހޭ އިދާރާއިން ހަމަ އެ ދުވަހު ވަނީ ގޮވައިލާފައެވެ.
މަދަރުސާއަށް ދިން ނިރުބަވެރި ޙަމަލާގެ ތުހުމަތު އެމެރިކާއަށް އަމާޒުވުމުން، ރައީސް ޑޮނަލްޑް ޓްރަމްޕްގެ ސަރުކާރުން ދަނީ އެ ކަމުންރެކެން މަސައްކަތް ފަށާފައެވެ. ޓްރަމްޕްގެ ހަނގުރާމައާ ބެހޭ ވަޒީރު ޕީޓް ހެގްސެތު ވިދާޅުވީ، އެމެރިކާގެ އަސްކަރިއްޔާއިން ދުވަހަކު ވެސް ޢާންމުންނަށް އަމާޒުކޮށް ޙަމަލާ ނުދޭނެ ކަމުގައެވެ. ނަމަވެސް، މިނާބްގެ މަދަރުސާއަށް ދީފައިވާ ޙަމަލާ ތަޙުޤީޤު ކުރަމުންދާ ކަން އޭނާ ކަށަވަރު ކޮށްދެއްވިއެވެ. ތަޙުޤީޤާ ގުޅޭ ގޮތުން ސީދާ ޖަވާބެއް ދެއްވުމަށް އިންކާރު ކުރައްވައި ވައިޓް ހައުސްގެ ތަރުޖަމާނު ކެރޮލައިން ލެވިޓް ވަނީ، ކުޑަކުދިންނަށް ޙަމަލާ ދެމުން ދަނީ އީރާންގެ ސަރުކާރުން އެކަނި ކަމުގައި ތުހުމަތު ކުރައްވާފައެވެ.
ޚާރިޖީ ވަޒީރު މާކޯ ރޫބިޔޯ ވެސް ވަނީ ޒިންމާއިން ސަލާމަތްވުމަށް މަސައްކަތް ކުރައްވާފައެވެ. އޭނާ ވިދާޅުވީ، މަދަރުސާއަކަށް ޙަމަލާ ދިނުމަކީ އެމެރިކާގެ އަސްކަރިއްޔާއިން ކުރާނެ ފަދަ ކަމެއް ނޫން ކަމުގައެވެ. ޢާންމުން ދިރިއުޅޭ ތަންތަނަށް ޙަމަލާ ދިނުމަކީ ބައިނަލްއަޤުވާމީ ޤާނޫނުތަކުގެ ދަށުން މަނާ، ހަނގުރާމައިގެ ކުށެކެވެ. މިނާބްގެ މަދަރުސާއަށް ދިން ޙަމަލާގައި އެމެރިކާ ސިފައިންގެ ބައިވެރިވުން ނެތް ކަން ކަށަވަރު ކުރެވިއްޖެ ނަމަ، ދެން އެ ޙަމަލާގެ ޒިންމާ އުފުލަން ޖެހޭނީ ޔަހޫދީ ފައުޖުންނެވެ. ނަމަވެސް، ޔަހޫދީންނަކީ އެއްވެސް ޖެހިލުމެއް ނެތި، ގަސްދުގައި މުސްލިމް ޤައުމުތަކުގެ ޢާންމުންނާއި ކުޑަކުދިން ޝަހީދު ކުރަމުންދާ ޤައުމެކެވެ.