ކުރިއަށް އޮތް ބާސެލޯނާގެ އިންތިހާބަށް ކުރިމަތިލި ކެނޑިޑޭޓުންގެ ތެރެއިން ޝަރުތު ހަމަވީ މިހާރުގެ ރައީސް ޖޯން ލަޕޯޓާ އާއި ވިޔަފާރިވެރިޔާ ވިކްޓަރ ފޮންޓް ކަމަށް ނިންމައިފި އެވެ.
ބާސެލޯނާގެ އަސާސީ ގަވާއިދު ބުނާ ގޮތުން އިންތިހާބުގައި ވާދަ ކުރުމަށް ކޮންމެ ކެނޑިޑޭޓަކު ވެސް މަދުވެގެން 2337 ތާއީދު ފޯމު ހުށަހަޅަން ޖެހެ އެވެ. ނަމަވެސް މި އަދަދަށް ތާއީދު ފޯމު ހަމަކުރެވުނީ ފޮންޓާއި ލަޕޯޓާ އަށް އެކަންޏެވެ.
އިންތިހާބަށް ކުރިމަތިލުމުގެ މުއްދަތު ހަމަވީ ހޯމަ ދުވަހު އެވެ. އަންނަ ހަފުތާގެ އާދީއްތަ ދުވަހު އޮންނަ އިންތިހާބަށް އެންމެ ގިނަ ތާއީދު ފޯމު ހުށަހެޅީ ލަޕޯޓާ އެވެ. އޭނާ ހުށަހެޅި 8170 ތާއީދު ފޯމުގެ ތެރެއިން ސައްހަ ކަމަށް ނިންމީ 7226 ފޯމެވެ. ދެ ވަނަ އަށް އެންމެ ގިނަ ފޯމު ހުށަހެޅީ މީގެ ފަސް އަހަރު ކުރިން ބޭއްވި އެންމެ ފަހުގެ އިންތިހާބުގައި ވެސް ލަޕޯޓާއާ ވާދަކުރެއްވި ވިކްޓަރ ފޮންޓެވެ. އޭނާ ހުށަހެޅި 5144 ފޯމުގެ ތެރެއިން ސައްހަވީ 4440 ފޯމެވެ. އިންތިހާބުގައި ވާދަ ކުރަން ދެން ފޯމު ހުށަހެޅީ މާކް ސިރިއާ އެވެ. އޭނާ ހުށަހަޅާފައިވަނީ 2845 ފޯމުގެ ތެރެއިން ސައްހަވީ 2247 ފޯމެވެ. އިންތިހާބުގައި ވާދަ ކުރައްވަން ޒަވިއާ ވިލަޖޯނާ މަސައްކަތް ކުރި ނަމަވެސް އޭނާ އަށް ހޯދުނީ 1593 ތާއީދު ފޯމެވެ. މިހެންވެ އޭނާއާއެކު ސިރިއާ ވެސް ވަނީ އިންތިހާބުގައި ވާދަ ކުރަން ޝަރުތު ހަމަނުވާ މީހެއް ކަމަށް ނިންމައިފަ އެވެ.
ގިނަ ބަޔަކު މިހާރު ބުނަމުންދަނީ މި ތަފާސް ހިސާބުތަކަށް ބަލާއިރު މި ފަހަރުގެ އިންތިހާބު ވެސް ކާމިޔާބު ކުރުން ގާތީ ލަޕޯޓާ ކަމަށެވެ. ނަމަވެސް ދެ ވަނަ އަށް އެންމެ ތާއީދު ބޮޑު ވިކްޓަ ފޮންޓް ވަނީ ލަޕޯޓާ ބަލި ކުރުމަށް އިދިކޮޅު ހުރިހާ ކެނޑިޑޭޓުން އޭނާ އަށް ތާއީދު ކުރުމަށް ގޮވާލައިފަ އެވެ. ފޮންޓްގެ ކެމްޕޭން ޝިއާރަކީ ވެސް ގުޅިގެން ކުރި އަށް ދިއުމެވެ. ހުރިހާ ކެނޑިޑޭޓުން ލަޕޯޓާގެ ފޮންޓްގެ ފަހަތަށް އަރައިފިނަމަ ތާއީދު ފޯމުގެ ގޮތުން ފޮންޓަށް ކުރި ލިބޭނެ އެވެ.
ނަމަވެސް ލަޕޯޓާ ވިދާޅުވީ އިދިކޮޅު އެންމެން ގުޅުނަސް އޭނާގެ އަޒުމަކަށް ބަދަލެއް ނާންނާނެ ކަމަށާއި އިންތިހާބު ކާމިޔާބު ކުރެވޭނެ ކަމުގެ ފުރިހަމަ ޔަގީންކަން އެބައޮތް ކަމަށެވެ. އަދި އޭނާ ވަނީ ފޮންޓް ޓީމުގެ ކުޅުންތެރިންނާއި ކޯޗާއި ސްޕޯޓިން ޑައިރެކްޓަރު ޑެކޯއާ ބެހޭ ގޮތުން ދައްކާ ވާހަކަތަކަށް ރައްދު ދީފަ އެވެ. ލަޕޯޓާ ބުނީ ފޮންޓް ދައްކާ ވާހަކަތަކަށް ބަލާއިރު ބާސެލޯނާގެ ރައީސް ކަމަށް ފޮންޓް ކުފޫ ހަމަނުވާ ކަމަށެވެ.