ސްރީ ލަންކާގެ ކަނޑުގެ ސަރަޙައްދުގެ ބޭރުން ދަތުރުކުރަމުންދާ އީރާނުގެ އިތުރު އަސްކަރީ މަނަވަރަކަށް ޙަމަލާއެއް އަމާޒުވެދާނެތީ، އެ އުޅަނދުގައި ތިބި ފަޅުވެރިންގެ ފުރާނަ ރައްކާތެރިކުރުމަށް މަސައްކަތް ކުރަމުންދާކަމަށް އެ ޤައުމުގެ ސަރުކާރުން ބުނެފިއެވެ.
ސްރީ ލަންކާގެ ސަރުކާރުން މިހެން ބުނެފައިވަނީ، އިއްޔެގެ ވަގުތެއްގައި ލަންކާގެ ކަނޑުގެ ސަރަޙައްދުގެ ބޭރުން ދަތުރުކުރި އައިރިސް ޑެނާ ނަމަކަށް ކިޔާ އެ އަސްކަރީ މަނަވަރަށް، އެމެރިކާގެ ކަނޑުގެ ސިފައިންގެ ސަބްމެރީނަކުން ޓޯޕީޑޯ ޙަމަލާއެއްދީ، ފައްތާލައިފައެވެ.
އެ މަނަވަރުގައި ތިބި 130 ފަޅުވެރިންގެ ތެރެއިން، 87 މީހުންގެ ހަށިގަނޑު ހޯދާފައިވާކަމަށް ލަންކާ ސަރުކާރުން ވަނީ ބުނެފައެވެ. އެ މަނަވަރުން ސަލާމަތްކުރެވުނު 32 މީހުން ލަންކާގެ ދެކުނުގައި ހުންނަ ގޯލް ހޮސްޕިޓަލަށް ވަނީ ގެންގޮސްފައެވެ. އެ މަނަވަރު ފައްތާލާފައިވަނީ، ލަންކާގެ ގާތްގަނޑަކަށް 40 މޭލު ބޭރުން، ބައިނަލްއަޤުވާމީ ކަނޑުގެ ސަރަޙައްދުން ދަތުރުކުރަމުންދަނިކޮށެވެ.
ލަންކާގެ ވަޒީރުންގެ މަޖިލީހުގެ ތަރުޖަމާނު ނަލިންދަ ޖަޔަތިއްސަ، ޤާނޫނު ހަދާ މަޖިލީހަށް މަޢުލޫމާތު ދެއްވަމުން ވިދާޅުވީ، އީރާނުގެ އިތުރު މަނަވަރެއް، ކޮލޮމްބޯ ޕޯޓުގެ ބޭރުގައި އޮތްކަމުގެ މަޢުލޫމާތު ލިބިފައިވާ ކަމަށެވެ. ނަމަވެސް، އެ އުޅަނދު އޮތީ، ލަންކާގެ އިޤްތިޞާދީ ސަރަޙައްދުން ބޭރުގައި ކަމަށް އޭނާ ވިދާޅުވިއެވެ.
ޖަޔަތިއްސަ ވިދާޅުވި ގޮތުގައި، ލަންކާ ސަރުކާރުގެ މައިގަނޑު ޢަމާޒަކީ އެ އުޅަނދުގައި ތިބި ފަޅުވެރިންގެ ސަލާމަތާއި ރައްކާތެރިކަން ކަށަވަރުކުރުން ކަމަށެވެ.
އޭނާ ވިދާޅުވީ، އައިރިސް ޑެނާއަށް ޙަމަލާދީ ފައްތާލާފައިވަނީ ލަންކާގެ ކަނޑުގެ ސަރަޙައްދުގެ 19 މޭލު ބޭރުން ކަމަށެވެ. އެ ޙަމަލާގައި ޝަހީދުވި މީހުންގެ ހަށިތައް ފޮނުވައިދިނުމަށް އީރާނުން އެދިފައިވާކަމަށް ބުނެފައިވެއެވެ.
އެ މަނަވަރު ދަތުރުކުރަމުންދިޔައީ، އިންޑިއާގެ ކަނޑުގެ ސިފައިންނާއެކު ގުޅިގެން ކުރިއަށް ގެންދިޔަ އަސްކަރީ ތަމްރީނުތަކަކަށްފަހު ކަމަށް އެނގިފައިވެއެވެ.
އީރާނުގެ ޚާރިޖީ ވަޒީރު އައްބާސް ޢާރާޤްޗީ ވަނީ ބައިނަލްއަޤުވާމީ ކަނޑުގެ ސަރަޙައްދުން، އީރާނާ އެތައް ހާސް މޭލު ދުރުން ދަތުރުކުރި މަނަވަރަކަށް އެމެރިކާއިން ޙަމަލާދިނުން ކުށްވެރިކުރައްވައިފައެވެ.
އެމެރިކާ އާއި ޔަހޫދީން ގުޅިގެން، ފެބްރުއަރީ 28ވަނަ ދުވަހުން ފެށިގެން އީރާނަށް ދެމުންދާ ވަރުގަދަ ޙަމަލާތަކުގައި މިހާތަނަށް 1،000އަށް ވުރެ ގިނަ މީހުން ވަނީ ޝަހީދުވެފައެވެ. އޭގެތެރޭގައި އީރާނުގެ ރޫޙީ އެންމެ މަތީ ވެރިޔާ އާޔަތުﷲ ޢަލީ އަލް ޚާމަނާއީ އާއި އެމަނިކުފާނުގެ ޢާއިލާގެ މެމްބަރުންތަކެއް ވެސް ހިމެނެއެވެ.
އެ ޢުދުވާނުގެ ރައްދުގައި އީރާނުން ވެސް ދަނީ ހުއްޓުމެއްނެތި، ޔަހޫދީންގެ ނިރުބަވެރި ދަޢުލަތުގެ އިތުރުން މެދުއިރުމަތީގެ އެކި ޤައުމުތަކުގައި އެމެރިކާ ސިފައިން ތިބޭ މަރުކަޒުތަކަށް ޢަމާޒުކޮށް ވަރުގަދަ ޙަމަލާތައް ދެމުންނެވެ.