ނިމުނު ހަފުތާ: ދަރަނި ދެއްކުމުގެ ޔަގީންކަން، މަޝްރޫއުތައް ކުރިއަށް

ނިމުނު ހަފުތާގައިވެސް ތަފާތު އެކި ދާއިރާތަކުން މުހިއްމު ކަންތައްތަކެއް ހިނގާދިޔައެވެ. (28 ފެބުރުވަރީ) މެދުއިރުމަތީގައި ހިނގަމުންދާ ހަމަނުޖެހުންތަކާއި ގުޅިގެން ރާއްޖެއަށް ދިމާވެދާނެ ކަންކަމަށް ފިޔަވަޅުތައް އެޅުމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވަޒީރުންގެ ޚާއްސަ ކޮމިޓީއެއް އުފައްދަވައިފައިވަނީ މިދިޔަ ހޮނިހިރު ދުވަހުއެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ މެދުއިރުމަތީގައި ހިނގަމުންދާ ހަމަނުޖެހުންތަކާއި ގުޅިގެން ދިވެހި ރައްޔިތުންނަށް ކުރިމަތިވެދާނެ ދަތިތަކާއި ކުރިމަތިވާ ކަންކަން ޙައްލުކުރުމަށް ގުޅިގެން ފިޔަވަޅުތައް އެޅުމަށް ރައީސުލްޖުމްހޫރިއްޔާ ވަޒީރުންގެ ޚާއްސަ ކޮމިޓީއެއް އުފައްދަވާފައިވާކަމަށެވެ.

(1 މާރިޗު) ކީރިތި ޤުރުއާން ހިތުދަސްކުރި 31 ޙާފިޡުން ދަސްވެނިވެނި ހަފުލާވެސް ބާއްވާފައިވަނީ މި ނިމުނު ހަފުތާގައެވެ. ދަސްވެނިވި ދަރިވަރުންނަށް މެޑައްޔާއި އިނާމް ދެއްވީ އެކަމަށްޓަކައި ބޭއްވި ޚާއްސަ ރަސްމިއްޔާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. މި ރަސްމިއްޔާތުގައި އެމަނިކުފާނުގެ އަނބިކަނބަލުން ފަސްޓު ލޭޑީ ސާޖިދާ މުޙައްމަދުވެސް ބައިވެރިވެވަޑައިގެންނެވިއެވެ.

(6 މާރިޗު) މާޅޮސްމަޑުލު އުތުރުބުރީ "އުނގުލު" އެ އަތޮޅު "އުނގޫފާރު"ގެ ބައެއް ކަމުގައި އަދި ތިލަދުންމަތީ އުތުރުބުރީ "ކަނޑާލިފިނޮޅު" އެ އަތޮޅު "ވަށަފަރު" ގެ ބައެއް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަނޑައެޅުއްވީ ބުރާސްފަތި ދުވަހުއެވެ.

(2 މާރިޗު) ރައީސުލްޖުމްހޫރިއްޔާ ޑރ މުހައްމަދު މުއިއްޒު، ނޫސްވެރިންނާއި ބައްދަލުކުރައްވާފައިވަނީ ނިމުނު ހަފުތާގެ ހޯމަ ދުވަހުއެވެ. މިމަހުން ފެށިގެން ކޮންމެ ހޯމަ ދުވަހަކު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނޫސްވެރިންނާ ބައްދަލުކުރައްވާނޭކަން މިއަހަރުގެ ރިޔާސީ ބަޔާނުގައި އެމަނިކުފާނު ވަނީ ހާމަކުރައްވާފައެވެ.

މި ނޫސްވެރިންގެ ބައްދަލުވުމުގައި އެމަނިކުފާނުވަނީ މުހިއްމު މައުލޫމާތުތަކެއް ހިއްސާކުރައްވާފައެވެ.

ނޫސްވެރިންގެ ބައްދަލުވުމުގައި ހާމަކުރެއްވި ބައެއް ކަންކަން:

- ސުކޫކަށް ދައްކަންޖެހޭ ފައިސާ މިވަގުތު ދައްކަން ޖެހުނަސް އެކަންކުރާވަރަށް ފައިސާ ހުރިކަމަށް ރައީސް ވިދާޅުވުން
- ރާއްޖެއަށް ތެލާއި ކާބޯތަކެތި ގެނައުމުގައި ދައްޗެއް ނެތްކަމަށް ރައީސް ވިދާޅުވުން
- ކުދި ވިޔަފާރިތަކަށް އަންނަ ހަފުތާގައި އެކަނިވެސް 200 މިލިޔަން ރުފިޔާ ދޫކުރާނެކަމަށް ރައީސް ވިދާޅުވުން
- ހުދުމުޚުތާރު އެބަސް ބޭނުންކުރަންޏާ ބޭނުން ކުރަންވާނީ ކުރީ ސަރުކާރުތަކަށް ކަމުގައި ރައީސް ވިދާޅުވުން
- މޮރިޝަސް އިން ގުޅުން ކަނޑާލިޔަސް، ފޯޅަވެހިގެ ހައްޤުވެރި ފަރާތަކީ ރާއްޖެކަމަށް ރައީސް ވިދާޅުވުން

އުމްރާނީ ތަރައްޤީ

(1 މާރިޗު) އުމްރާނީ ތަރައްޤީގެ ދާއިރާއިން ފާހަގަކޮށްލެވޭ ޚަބަރުތަކަށް ބަލާލާއިރު، ކ. މާފުށްޓާއި އެރަށުން އަލަށް ހިއްކާފައިވާ ސަރަޙައްދު ގުޅުވާލަދޭ ކޯޒްވޭގެ ޢަމަލީ މަސައްކަތް ފަށާފައިވަނީ މިދިޔަ އާދީއްތަ ދުވަހުއެވެ. މި މަޝްރޫޢުގެ ދަށުން މާފުށްޓާއި އެރަށުގެ ހިއްކާފައިވާ ސަރަޙައްދު ގުޅާލުމަށް 137 މީޓަރުގެ ކޯޒްވޭއެއް އެޅުމަށް ވަނީ ހަމަޖެހިފައެވެ.

(1 މާރިޗު) ވެލާނާގެ ސަރަޙައްދުގައި އިތުރު ސައިކަލު ޕާކިން ޒޯނެއް ހުޅުވާފައިވަނީވެސް އާދިއްތަ ދުވަހުއެވެ. މި ޕާކިން ޖާގަ ތަރައްޤީކޮށްފަވަނީ ވެލާނާގެ ކުރިމަތިން އޮންނަ ހުސް ޖާގައިގައެވެ. މި ޕާކިން ޒޯންގައި ޖުމުލަ 224 ސައިކަލު ޕާކިން ސްލޮޓް ހިމެނެއެވެ.

(3 މާރިޗު) ތިލަމާލެ ބުރިޖުގެ މުޅި މަޝްރޫގެ %70 މަސައްކަތް ނިމުނު ޚަބަރަކީވެސް ނިމުނު ހަފުތާގައި ފާހަގަކޮށްލެވޭ ޚަބަރެކެވެ. ބްރިޖުގެ މަސައްކަތާ އެކުއެކީގައި، ހައިވޭތަކުގެ މަސައްކަތްވެސް ދަނީ ކުރިއަށްގެންދަމުންނެވެ. ބްރިޖު ޑެކަށް ބޭނުންވާ 1222 ސެގްމަންޓްގެ ތެރެއިން މިހާތަނަށް %80 ސެގްމަންޓް ކާސްޓްކޮށް ވަނީ ނިމިފައެވެ. އަދި ބްރިޖުގެ ތަނބުތައް ގުޅާލުމުގެ މަސައްކަތުގެ %46 ސެގްމަންޓް އިންސްޓޯލްކޮށް ވަނީ ނިމިފައެވެ.

(4 މާރިޗު) ފިރިމީހާ ނުވަތަ އަނބިމީހާގެ ބޯހިޔާވަހިކަމެއް އޮތް ނަމަވެސް، ގޯއްޗަކަށް ކުރިމަތިލުމުގެ ފުރުސަތު ދޭން ބޯހިޔާވަހިކަމުގެ އައު ޕްރޮގްރާމެއް ވަނީ ނިމުނު ހަފުތޔާގައި އިޢުލާންކޮށްފައެވެ. މިކަމާގުޅޭ އުޞޫލު އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވުޒާރާއިން މިހާރު ވަނީ ގެޒެޓުގައި އާންމުކޮށްފައެވެ. މި އުޞޫލުގެ ދަށުން ގޯއްޗަށް އެދި ހުށަހެޅުމުގެ ފުރުޞަތު މިމަހުގެ 8 ވަނަ ދުވަހު ހުޅުވާލާނެއެވެ.

(4 މާރިޗު) ފ.ނިލަންދޫ އެއާޕޯޓް ތަރައްޤީކުރުމަށް ބޭނުންވާ ބިން ހިއްކުމުގެ މަސައްކަތް ނިމިފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމްޓީސީސީއިން ހާމަކޮށްފައިވަނީ މިދިޔަ ބުދަ ދުވަހުއެވެ. ނިލަންދޫ އެއާޕޯޓު ތަރައްޤީކުރުމަށް 45.6 ހެކްޓަރުގެ ބިން ވަނީ ހިއްކާފައެވެ.

އިޤްތިޞާދީ ދާއިރާ

(3 މާރިޗު) ދައުލަތުގެ މާލީ ހާލަތު ރަނގަޅުވެ، ބޭރު ފައިސާގެ އާމްދަނީ 222.8 މިލިޔަން ޑޮލަރަށް އަރާފައިވާކަމަށް މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާއިން އާންމުކޮށްފައިވާ މާލީ ރިޕޯޓުންވަނީ ދައްކާފައެވެ. މިއަހަރުގެ ފެބުރުވަރީ 26ގެ ނިޔަލަށް ދައުލަތަށް އާމްދަނީއާއި ހިލޭ އެހީގެ ގޮތުގައި ޖުމްލަ 7.8 ބިލިޔަން ރުފިޔާ ލިބިފައިވާއިރު، ޖުމްލަ ޚަރަދަކީ 5.9 ބިލިޔަން ރުފިޔާކަމަށް މި ރިޕޯޓްގައި ވަނީ ބުނެފައެވެ. އެހެންކަމުން، މި މުއްދަތުގެ ނިޔަލަށް ދައުލަތުގެ ބަޖެޓުން 1.9 ބިލިޔަން ރުފިޔާގެ ސާޕްލަސްއެއް ވަނީ ރެކޯޑުކުރެވިފައެވެ.

(3 މާރިޗު) މިއަހަރުގެ އައިޓީބީ ބާލިން ފެއާ ފަށާފައިވަނީ މިދިޔަ އަންގާރަ ދުވަހުއެވެ. ފަތުރުވެރިކަން އިޝްތިހާރު ކުރަން ދުނިޔޭގައި ބާއްވާ އެންމެ ބޮޑު އެއް ފެއާ، އައިޓީބީ ބާލިންގައި ވިޒިޓް މޯލްޑިވްސް ކޯޕަރޭޝަން، ވީއެމްސީއާއެކު ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ 67 ކުންފުންޏަކުން ޖުމްލަ 159 މީހުން ބައިވެރިވިއެވެ.

(4 މާރިޗު) ބޭންކް އޮފް މޯލްޑިވްސްއިން ލޯންޗުކުރި މަލްޓި ކަރަންސީ ޑިޖިޓަލް ވޮލެޓް "ސްވައިޕް" ރަސްމީކޮށް އިފުތިތާޙުކޮށްފައިވަނީ މިދިޔަ ބުދަ ދުވަހުއެވެ. އައިޓީބީ ބާލިންގެ ތެރެއިން ޑިޖިޓަލް ވޮލެޓް ރަސްމީކޮށް އިފްތިތާޙު ކޮށްދެއްވީ، މަޓީގެ ޗެއަރމަން ޙުސެއިން އަފީފެވެ.

(5 މާރިޗު) ދުނިޔޭގެ އެންމެ ބޮޑު ފަތުރުވެރިކަމުގެ މައުރަޒު ކަމަށްވާ އައިޓީބީ ބާލިން އަންނަ އަހަރު ހޯސްޓުކުރާ ގައުމަކަށް ރާއްޖެ ހަމަޖައްސައި، އެކަމުގެ ރަސްމީ އެއްބަސްވުމުގައި ސޮއިކޮށްފައިވަނީ މިދިޔަ ބުރާސްފަތި ދުވަހުއެވެ. ހޯސްޓް ކަންޓްރީގެ ހައިސިއްޔަތުން، މައުރަޒު ހުޅުވުމުގެ ރަސްމިއްޔާތާއި، މައުރަޒުގެ ތެރޭގައި ބާއްވާ އެކި ހަރަކާތްތަކުގައި ރާއްޖެއަށް ހާއްސަ އިސްކަމެއް ދޭނެއެވެ.

(5 މާރިޗު) މަނީ ލޯންޑަރިންގ އާއި ޓެރަރިޒަމަށް ފައިނޭންސްކުރުން ހުއްޓުވުމުގެ މަސައްކަތްތައް ވިލަރެސްކުރުމަށް އެމްއެމްއޭގައި ގާއިމުކޮށްފައިވާ ފައިނޭންޝަލް އިންޓެލިޖެންސް ޔުނިޓް (އެފް.އައި.ޔޫ) ގެ އިސްވެރިޔާގެ މަގާމަށް މުޙައްމަދު އިޝާން އައްޔަންކުރައްވާފައިވަނީވެސް ބުރާސްފަތި ދުވަހުއެވެ. އިޝާން މީގެ ކުރިން ހުންނެވީ އެމް.އެމް.އޭ ގެ ހެޑް އޮފް ފައިނޭންސްގެ މަގާމުގައެވެ. މި މަގާމަށް އޭނާ ހޮވިވަޑައިގަތީ އެފްއައިޔޫގެ އިސްވެރިޔާގެ މަޤާމަށް ކުރިމަތިލުމަށް އެމް.އެމް.އޭގެ މުވައްޒަފުންގެ ތެރެއިން ހުޅުވާލުމުން އެމަޤާމަށް ކުރިމަތިލި ފަރާތްތަކުގެ ތެރެއިން އިންޓަވިއުކޮށްގެންނެވެ.

އެހެނިހެން ދާއިރާތައް

އެހެނިހެން ދާއިރާތަކުން ފާހަގަކޮށްލެވޭ ޚަބަރުތަކަށް ބަލާލާއިރު، (28 ފެބުރުވަރީ) މާފުށީ ޖަލުގައި ފުރަތަމަ ފަހަރަށް ބޮޑީ ސްކޭނަރެއް ގާއިމުކުރީ މިދިޔަ ހޮނިހިރު ދުވަހުއެވެ.
(1 މާރިޗު) ހުޅުމާލެއިން ގޯތި ލިބުނު ކަމަށް ދެއްކުމުގެ ގޮތުން ޞައްޙަނޫން ލިޔުންތަކެއް އުފައްދައި، ހުށައެޅި މައްސަލައެއްގައި 12 މީހެއްގެ މައްޗަށް ދަޢުވާ ކުރުމަށް ކްރިމިނަލް ކޯޓަށް ފޮނުވާފަވާ ކަމަށް ޕްރޮސެކިއުޓަރ ޖެނެރަލްގެ އޮފީހުން ވިދާޅުވީވެސް ނިމުނު ހަފުތާގެތެރޭގައެވެ.

(2 މާރިޗު) ހުޅުމާލެ ހޮސްޕިޓަލުގައި އެންމެ ޒަމާނީ ހިތުގެ ފަރުވާދޭ ވަޞީލަތެއް ގާއިމުކޮށްފައިވަނީ ނިމުނު ހަފުތާގެ ހޯމަ ދުވަހުއެވެ. އަދި މ.ރަތްމަންދޫ ރައްޔިތުން ތުލުދޫއަށް ހިޖުރަ ކުރުމަށް، އެކަމަށް ބޭނުންވާ ބިން އެރަށު ކައުންސިލުން ހަމަޖައްސައިދީފައިވާތީ، އެކަން ރަތްމަންދޫ ކައުންސިލަށް އަންގާފައިވާ ކަމަށް އިމާރާތް ކުރުމާއި ގެދޮރުވެރިކަމާ ބިނަރާ ބެހޭ ވުޒާރާއިން ވިދާޅުވީވެސް ނިމުނު ހަފުތާގެތެރޭގައެވެ.

(3 މާރިޗު) އިންތިޚާބުގައި ވޯޓުލުމަށް 588 ފޮށި ބަހައްޓާނެ ކަމަށް އިލެކްޝަނުން ވިދާޅުވީ މިދިޔަ ބުދަ ދުވަހުއެވެ. (4 މާރިޗު) އެޕްލިކޭޝަން ޑެޑްލައިނެއް ނުބާއްވައި ސްޓޫޑެންޓް ލޯނަށް އެދުމުގެ ފުރުޞަތު މުޅި އަހަރަށް ހުޅުވާލާގޮތަށް ނިންމާފައިވާކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވަޒީރު ޑރ. ޢަލީ ޙައިދަރު އަޙްމަދު ވިދާޅުވީ ނިމުނު ހަފުތާގެ އަންގާރަ ދުވަހުއެވެ.

މަތީ ތަޢުލީމާބެހޭ ވުޒާރާގެ މަސައްކަތްތަކާގުޅޭގޮތުން މަޢުލޫމާތުދިނުމަށް ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ވަނީ 2026 ގެ ލޯނު ސްކީމަށް މުހިންމު ބަދަލުތަކެއް ގެންނަން ސަރުކާރުން ނިންމަވާފައިވާކަން ހާމަކުރައްވާފައެވެ.

(5 މާރިޗު) މިއަހަރުގެ ރަމަޟާން މަހު ރައްޔިތުންނަށް ރޯދަ ހަދިޔާގެ ގޮތުގައި ސަރުކާރުން ދޭން ނިންމާފައިވާ މަސްދަޅު ކޭސް، 113،382 ގޭބިސީއަށް ދޫކޮށްފައިވާކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް އުމަރު ވިދާޅުވީ މިދިޔަ ބުރާސްފަތި ދުވަހުއެވެ.

(5 މާރިޗު) ނިމުނު ހަފުތާގައި ސްޓެލްކޯއިން ރައްޔިތުންނަށް ފޯރުކޮށްދޭ ޚިދުމަތްތައް އެއް ޕްލެޓްފޯމަކުން ފޯރުކޮށްދެވޭނެހެން ފަރުމާކޮށްފައިވާ "ވަށަނި" ޕޯޓަލް ވަނީ އިފްތިތާހުކޮށްފައެވެ. ޒަމާނީ ފަސޭހަތަކާއެކު، ސްޓެލްކޯގެ ކަރަންޓާއި ގުޅުންހުރި ހުރިހާ ޚިދުމަތަކަށް އެދެވޭގޮތަށް ފަރުމާކޮށްފައިވާ މި ޕޯޓަލް އިފްތިތާހުކޮށްދެއްވީ އެކަމަށްޓަކާ ބޭއްވި ޚާއްސަ ރަސްމިއްޔާތުގައި ސްޓެލްކޯ ހިންގެވުމާއި ހަވާލުވެވަޑައިގެން ހުންނެވި، ޑެޕިއުޓީ މެނޭޖިންގ ޑިރެކްޓަރ ޑރ. އަލީ އަޒުވަރެވެ.

މި ރަސްމިއްޔާތުގައި ވާހަކަދައްވަމުން ޑރ. އަލީ އަޒުވަރު ވިދާޅުވީ "ވަށަނި"އަކީ ސްޓެލްކޯއިން ފޯރުކޮށްދޭ ޚިދުމަތްތައް ލުއިފަސޭހަކޮށް ހޯދުމާއި، ޚިދުމަތް ކުރިޔަށްދާގޮތް އަދާހަމަކޮށް އެއް މަންސައަކުން ވަށާޖެހޭ ނިޒާމެއްގެ ތެރެއިން ބޭނުން ކުރެވޭނެހެން ފަރުމާ ކޮށްފައިވާ ޕޯޓަލެއްކަމަށެވެ.