އިންޓަރެކްޓިވް މިއުޒިއަމް މިއަހަރު ހުޅުވަން މަސައްކަތް ހަލުވިކުރަނީ
-
މިއުޒިއަމްގެ ޢަމަލީ މަސައްކަތް މިހާރުވެސް ކުރިއަށްދާކަން ވަޒީރު ފާހަގަކުރެއްވި
-
މިއުޒިއަމްގެ ތެރެއިން ޓެކްނޮލޮޖީގެ އެހީގައި ދިވެހިން 4000އެއްހާ އަހަރު ހޭދަކުރި ގޮތް އެނގިގެންދާނެ
-
މިއީ މިފަދަ ކޮންސެޕްޓްއަކަށް ރާއްޖޭގައި ތަރައްޤީކުރެވޭ ފުރަތަމަ ތަން
މާލޭގައި ތަރައްޤީކުރާ އިންޓަރެކްޓިވް މިއުޒިއަމްގެ ޢަމަލީ މަސައްކަތް މިއަހަތެރޭ ނިންމާލުމަށް މަސައްކަތްކުރަމުންދާކަމަށް ދިވެހިބަހާއި ސަޤާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ދިވެހިބަހާއި ސަޤާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވަނީ، އެ ވުޒާރާއިން މިއަހަރަށް ރާވާފައިވާ ބައެއް މަސައްކަތްތަކުގެ މަޢުލޫމާތު ހިއްސާކުރައްވާފައެވެ.
ނޫސްވެރިންގެ ބައްދަލުވުމެއްގައި ވަޒީރު ވިދާޅުވީ، އިޤުތިސާދު ސިންތަފާތު ކުރުމާއި، ފަތުރުވެރިކަން ސިންދަފާތުކުރުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ގެންގުޅުއްވާ ޚާއްސަ ސިޔާސަތުގެ ތެރެއިން ތަރިކައިގެ ފަތުރުވެރިކަން ކުރުމަށް އެ ވުޒާރާއިން ގިނަ މަސައްކަތްތަކެއްކުރައްވަމުންގެންދަވާކަމަށެވެ.
އެގޮތުން މާލޭގައި ތަރައްޤީކުރާ އިންޓަރެކްޓިވް މިއުޒިއަމްގެ ޢަމަލީ މަސައްކަތް މިހާރު ކުރިއަށްދާކަން ފާހަގަކުރައްވާ ވަޒީރު ވިދާޅުވީ، އުއްމީދުކުރައްވަނީ އެ މަޝްރޫޢުގެ މަސައްކަތް މިއަހަރުތެރޭ އެއްކޮށް ނިންމާލުމަށްކަމަށެވެ.
"އިންޓްރެކްޓިވް މިއުޒިއަމްގެ މަސައްކަތް މިހާރު ޢަމަލީ ގޮތުން ކުރިއަށްމިދަނީ. ކުރިއަށްއޮތް މަހެއްހާ ދުވަސްތެރޭ މަސައްކަތް މާބޮޑަށް ހަލުވިވެގެންދާނެ. އަޅުގަނޑުމެން އުއްމީދުމިކުރަނީ މިއަހަރުތެރޭ ބޮޑުބައެއް ނިންމާލާ ނުވަތަ މުޅި މަސައްކަތްވެސް ނިންމާލުމަށް". ވަޒީރު ވިދާޅުވިއެވެ.
މާލޭގައި ތަރައްޤީކުރާ އިންޓަރެކްޓިވް މިއުޒިއަމަކީ، ރާއްޖޭގެ ތާރިޚުގައިވެސް ބިނާކުރެވޭ ފުރަތަމަ ދާރުލްއާސާރުކަން ފާހަގަކުރައްވާ ވަޒީރު ވިދާޅުވީ، މި މިއުޒިއަމްގެ ތެރެއިން، ޒަމާނީ ޓެކްނޮލޮޖީގެ އެހީގައި ދިވެހިން މި ކަނޑުގައި 4000އެއްހާ އަހަރު ހޭދަކުރި ގޮތް އެނގިގެންދާނެކަމަށެވެ.
"މިތަން ނިމޭއިރު މިތަން ވާނެ ރާއްޖޭގެ ތާރީޚުގަ ބިނާކުރެވޭ ފުރަތަމަ ދާރުލްއާސާރަށް. މާނައަކީ ދިވެހިން މި ކަނޑުގަ 4000އެއްހާ ދުވަސް ހޭދަކުރި ގޮތާއި، އޭގަ ދިވެހިން ކުރި ތަޖުރިބާތައް މިތަނުގެ ތެރެއިން ހިއްސާކުރެވޭނެ ތަޖުރިބާކުރެވޭނެ، އަދި ޒަމާނީ ޓެކްނޮލޮޖީގެ އެހީގައި މި ދެންނެވި ކަންކަން ސީދާ އަމިއްލަ އިހުސާސްތަކާ ގުޅުވާލެވޭގޮތަށް މިތަން ތަރައްޤީކުރެވެނީ". ވަޒީރު ވިދާޅުވިއެވެ.
މާލޭގައި ތަރައްޤީކުރާ އިންޓަރެކްޓިވް މިއުޒިއަމަކީ، އުސްގެކޮޅާއި، ކަޅުވަކަރު މިސްކިތް ހުރި ސަރަޙައްދު ހިމެނޭހެން އީޖާދީ ވިސްނުންތަކާ ވަސީލަތްތަކުގެ އެހީގައި ދިވެހި ތާރީޚާއި ތަރިކަ ތަޖުރިބާކުރެވޭނެހެން ތަރައްޤީކުރާ މިއުޒިއަމެކެވެ. މިއީ މިފަދަ ގޮތަކަށް ރާއްޖޭގައި ތަރައްޤީކުރާ ފުރަތަމަ ތަނެވެ.