އެސްޓީއޯއިން ވިއްކާ ތެލުގެ އަގަށް ބަދަލު ގެނެސްފި

ދުނިޔޭގެ ބާޒާރުގައި ތެލުގެ އަގު އުފެލެމުންދިއުމާއެކު ސްޓޭޓް ޓްރޭޑިންގ އޯގަނައިޒޭޝަން ވިއްކާ ތެލުގެ އަގަށް ބަދަލު ގެނެސްފިއެވެ.

އެސްޓީއޯގެ ދަށުން ހިންގާ ފިއުލް ސަޕްލައި މޯލްޑިވްސްއިން ވިއްކާ ތެލުގެ އަގަށް ބަދަލު ގެނެސް އެތަންތަނުން ޕެޓްރޯލް އަދި ޑީސަލް ވިއްކާނެ އައު އަގުތައް އެސްޓީއޯއިން ވަނީ އާންމުކޮށްފައެވެ. އެސްޓީއޯއިން ތެލުގެ އަގަށް ބަދަލު ގެނެސްފައިވަނީ މިވަނީ، މެދުރިއިރުމަތީގައި ހިންގަމުންދާ ހަނގުރާމައާއި ގުޅިގެން ދުނިޔޭގެ ބާޒާރުގައި ތެލުގެ އަގަށް އުފުލިފައިވާ ދަނޑިވަޅެއްގައެވެ.

އެސްޓީއޯއިން އާންމުކޮށްފައިވާ އަގުތަކަށް ބަލާއިރު ޕެޓްރޯލް ލީޓަރެއް މިއަދުން ފެށިގެން ވިއްކާނީ 16.01 ރުފިޔާއަށެވެ. މީގެ ކުރިން ޕެޓްރޯލް ލީޓަރެއް ވިއްކަމުން ދިޔައީ 13.50 ރުފިޔާއަށެވެ. އެހެން ކަމުން މިއީ 2.51 ރުފިޔާގެ އިތުރުވުމެކެވެ. ޑީސެލް ލީޓަރެއް މިއަދުން ފެށިގެން ވިއްކާނީ، 17.54 ރުފިޔާއަށެވެ. މީގެ ކުރިން 13.92 ރުފިޔާއަށް ޑީސެލް ލީޓަރެއް ވިއްކި ނަމަވެސް މި ގެނެވުނު ބަދަލާއެކު މިއީ 3.62 ރުފިޔާގެ އިތުރުވުމެއް ކަމަށް އެސްޓީއޯއިން ވިދާޅުވެއެވެ.

ދުނިޔޭ ބާޒާރުގައި ތެލުގެ އަގު އުފެލެމުންދާއިރު، ސަރުކާރުން ތެލުގެ އަގު އުފުލުނު ކަމުގައިވިއަށް ދިވެހިންނަށް ދަތިކަމެއް ނެތި ތެލާއި ގޭސް ލިބޭނެ ކަމުގެ ޔަޤީންކަން ދެއްވާފައެވެ. އަންގާރަ ދުވަހު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އިޤްތިޞާދީ ވަޒީރު މުހައްމަދު ސަޢީދު ވަނީ ދުނިޔޭގެ ބާޒާރުގައި ތެލުގެ އަގު %25 އާއި %30 އުފުލުނު ކަމަށް ވިދާޅުވެފައެވެ. ވަޒީރު ވިދާޅުވީ ބާޒާރުގައި ތަކެތީގެ އަގަށް އަންނަ ބަދަލާއެކު ސަރުކާރުން އެކަމަށް އެއްވެސް ފިޔަވަޅެއް އަޅާނީ ބާޒާރަށް އަންނަ ބަދަލަށް ރިއާޔަތްކޮށްގެން ކަމަށެވެ.

ވަޒީރު ވިދާޅުވީ ތެޔޮ ރައްކާކުރާނެ ކެޕޭސިޓީ އިތުރު ކުރުމަށް ވެސް ސަރުކާރުން މަސައްކަތް ކުރަމުން އަންނަ ކަމަށެވެ. އެގޮތުން ރާއްޖެ އަންނަ ފަތުރުވެރިންނާއި ރާއްޖޭގައި މަސައްކަތް ކުރާ އާބާދީ ވެސް އިތުރުވަމުން އަންނައިރު އެ ހުރިހާ އެންމެންނަށް ކޭޓާ ކުރެވޭ ވަރަށް ތެލާއި ކާބޯތަކެތީގެ ރައްކާތެރިކަން ކަށަވަރު ކުރުމަށް މަސައްކަތް ކުރާ ކަމަށް ވިދާޅުވިއެވެ