ކެޓިޔަސް ކުޅުންތެރިން ދެއްކި ކުޅުމާމެދު ފަޚުރުވެރިވަން: ފްލިކް

ކޮޕާ ޑެލްރޭގެ ސެމީ ފައިނަލުގައި އެގްރިގޭޓް ނަތީޖާއިން ބަލިވެ މުބާރާތުގެ ފައިނަލަށް ދިއުމުގެ ފުރުސަތު ބާސެލޯނާއަށް ގެއްލުނު ނަމަވެސް، ޓީމުން ދެއްކި ކުޅުމާމެދު ވަރަށް ބޮޑަށް ފަޚުރުވެރިވާކަމަށް އެ ޓީމުގެ ކޯޗު ހާންސް ފްލިކް ބުނެފިއެވެ.

ސެމީގެ ފުރަތަމަ ލެގުގައި އެތުލެޓިކޯ މެޑްރިޑާ ދެކޮޅަށް ކުޅެ ބާސާ ވަނީ 0-4 ގެ ފަރަގު ބޮޑު ނަތީޖާއަކުން ބަލިވެފައެވެ. އެހެންނަމަވެސް ދެވަނަ ލެގުގައި، އަމިއްލަ ދަނޑުގައި ކުޅެ، ތަފާތު މޮޅު ކުޅުމެއް ދައްކައި ބާސާއިން ވަނީ 0-3 ގެ ނަތީޖާއަކުން އެތުލެޓިކޯ ބަލިކޮށްފައެވެ.

ނަތީޖާ ހަމަހަމަކޮށް އަލުން ފައިނަލަށް ދިއުމުގެ ފުރުސަތު ބޮޑުކުރަން ބާސާއަށް މަދުވީ އެންމެ ލަނޑެކެވެ. ފަހު ވަގުތާ ޖެހެންދެން ވެސް އެޓޭކިން މޮޅު ގޭމެއް ކުޅުނު ނަމަވެސް ބާސާއަށް ބޭނުންވާ ނަތީޖާ ހޯދޭ ގޮތެއް ނުވިއެވެ.

މެޗަށްފަހު ވާހަކަދައްކަމުން ފްލިކް ބުނީ، ފައިނަލުގައި ސެވިއްޔާ އާ ދެކޮޅަށް ކުޅުމަށް ކަނޑައެޅި ލަނޑުދަނޑި ހާސިލްނުވި ނަމަވެސް، ޓީމުން ދެއްކި ކުޅުމާމެދު ވަރަށް ފަޚުރުވެރިވާ ކަމަށާއި ޓީމުގެ ހުރިހާ އެންމެންވެސް އެކަމާ މެދު ފަޚުރުވެރިވެވޭނެ ކަމަށެވެ.

މެޗުގައި ހަތަރު ފަސް ލަނޑު ޖަހާނެ ފުރުސަތު ބާސާއަށް ލިބުނު ނަމަވެސް އެ ފުރުސަތުތަކުގެ ބޭނުން ނުހިފުނީ ކަމަށާއި، ކުރިއަށް ހުރި މެޗުތަކުގައި އެކަންކަން ރަނގަޅުކުރަން މަސައްކަތްކުރަން ޖެހޭކަމަށް ވެސް ފްލިކް ބުންޏެވެ.

މެޗުގައި ޓީމުގެ ހުރިހާ ކުޅުންތެރިން ވެސް ކުޅުނީ އެ ކުޅުންތެރިއެއްގެ އެންމެ މޮޅު ކުޅުން ކަމަށާއި ކޮންމެ ކުޅުންތެރިއަކު ވެސް 100 އިންސައްތައަށް ވުރެ ގިނައިން މެޗުގައި ދެއްކި ކަމަށްވީ ނަމަވެސް، ބޭނުންވި ނަތީޖާ ނުނެރެވުނީކަމަށް އޭނާ ބުންޏެވެ. އަދި އެ ހަގީގަތް ގަބޫލުކޮށް އައު ހިތްވަރަކާއެކު މަސައްކަތް ކުރަން ޖެހޭކަމަށް ވެސް އޭނާ ބުންޏެވެ.

ޓީމުގެ ޒުވާން ކުޅުންތެރިން ދެއްކީ މޮޅު ކުޅުމަށް ވެސް ފްލިކް ތައުރީފުކުރިއެވެ. ދެވަނަ ލެގުގައި ހޯދުނު މޮޅުގެ ފަހަތުގައި ވަނީ، ބާސާގެ "ލަ މާސިއާ" އެކަޑަމީން ނުކުމެގެން އައި ހުނަރުވެރި ކުޅުންތެރިންގެ ސަބަބުންކަން އޭނާ ފާހަގަކުރިއެވެ.

ވާހަކަ ނިންމާލަމުން ފްލިކް ވަނީ، ކުރިއަށް އޮތީ ވެސް ވަރަށް މުހިންމު ދެ މުބާރާތެއްކަން ފާހަގަކޮށް، ޗެމްޕިއަންސް ލީގާއި ލަލީގާގެ މެޗުތަކަށް ތައްޔާރުވެ ނަތީޖާ ނެރުމުގެ ވަރުގަދަ އަޒުމުގައި އެނބުރި އަންނާނެ ކަމުގެ ޔަގީންކަން ޓީމުގެ ސަޕޯޓަރުންނަށް ދީފައެވެ.

ބާސެލޯނާއިން މިވަގުތު ލަލީގާގެ ތާވަލުގެ އެއްވަނައިގައި އޮތީ 26 މެޗުން 64 ޕޮއިިންޓާއެކުއެވެ. ދެވަނައިގައި ވާދަވެރި ރެއާލް މެޑްރިޑް އޮތީ 60 ޕޮއިންޓާއެކުއެވެ. ލީގުގައި ބާސާއަށް ކުރިއަށް އޮތީ އެތުލެޓިކް ކްލަބާ ދެކޮޅަށް މި މަހުގެ އަށްވަނަ ދުވަހު ކުޅެން އޮތް މެޗެވެ.

ޗެމްޕިއަންސް ލީގުގައި ވެސް މޮޅު ކުޅުމެއް ބާސާއިން ދައްކަމުން އަންނައިރު، މުބާރާތުގެ ގަދަ 16 ގައި މި މަހުގެ 11 ވަނަ ދުވަހު ބާސާއިން ނިއުކާސަލް ޔުނައިޓެޑާ ދެކޮޅަށް ނުކުންނާނެއެވެ.