އެމެރިކާއާ ގުޅިގެން ޔަހޫދީންގެ ނިރުބަވެރި ދަޢުލަތުން އީރާނާ ދެކޮޅަށް ހިންގަމުންދާ ނިރުބަވެރު ޢުދުވާނުގައި، ޝަހީދުވި މީހުންގެ ޢަދަދު 1،000އަށް ވުރެ މަތިވެފައިވާ ކަމަށް އީރާނުގެ ދައުލަތުގެ މީޑިއާއިން ބުނެފިއެވެ.
ފެބްރުއަރީ 28ގައި ފެށި ޢުދުވާނުގައި، މިހާތަނަށް 1،045 މީހުން ޝަހީދުކޮށްލާފައިވާ ކަމަށާއި އޭގެތެރޭގައި ކުޑަކުދިންވެސް ހިމެނޭކަމަށް ބުނެފައިވެއެވެ.
ފާއިތުވި ފަސް ދުވަހުގެ ތެރޭގައި، އީރާނުގެ 2،000 އެއްހާ ޢަމާޒަކަށް އެމެރިކާ އާއި ޔަހޫދީން ގުޅިގެން ޙަމަލާތައް ދީފައިވާއިރު، އެ ޙަމަލާތަކުގައި އީރާނުގެ ރޫހީ އެންމެ މަތީ ވެރިޔާ އާޔަތުﷲ ޢަލީ ޚާމަނާއި އާއި އެމަނިކުފާނުގެ އާއިލާގެ ބޭފުޅުންތަކެއް ވެސް ވަނީ ޝަހީދުކޮށްލައިފައެވެ.
އެމެރިކާއިން މިއަދު ވަނީ ސަބްމެރީނެއް ބޭނުންކޮށްގެން ޙަމަލާދީ، އީރާނުގެ އަސްކަރީ މަނަވަރެއް ފައްތާލައިފައެވެ. ގާތްގަނޑަކަށް 180 ފަޅުވެރިން ތިބި އެ މަނަވަރު އަޑިއަށްދިޔައިރު، ސަލާމަތްވީ 30 އެއްހާ މީހުންނެވެ. އެ މީހުން ސަލާމަތްކޮށްފައިވަނީ، ސްރީ ލަންކާގެ ކަނޑުގެ ސިފައިންނެވެ.
ޔަހޫދީންގެ މި ނިރުބަވެރި ޢުދުވާނު މިހާރު ވަނީ މުޅި މެދުއިރުމައްޗަށް ފެތުރި، ވަރުގަދަ ހަނގުރާމައަކަށް ބަދަލުވެފައެވެ. ޢުދުވާނުގެ ރައްދުގައި، އީރާނުން ދަނީ ޔަހޫދީންގެ އިތުރުން މެދުއިރުމަތީގެ އެކި ޤައުމުތަކުގައި އެމެރިކާ ސިފައިން ތިބި މަރުކަޒުތަކަށް ޢަމާޒުކޮށް ވަރުގަދަ ޙަމަލާތަކެއް ދެމުންނެވެ.
މިގޮތުން، ޤަތަރާއި އެކުވެރި ޢަރަބި ޢިމާރާތް (ޔޫއޭއީ)، އޮމާން، އުރުދުން އަދި ސަޢުދީ ޢަރަބިއްޔާ ހިމެނެއެވެ. މީގެއިތުރުން، ތުރުކީވިލާތަށް ފޮނުވައިލި މިސައިލެއް، ވިލާތުގެ ދިފާޢީ އިއްތިޙާދު، ނޭޓޯގެ އެހީގައި ވައްޓާލާފައިވާކަމަށް ބުނެފައިވެއެވެ.
އީރާނުގެ ޙަމަލާތައް މިހާރު ވަނީ މެދުއިރުމަތީގައި ހުރި އެމެރިކާގެ ޖާސޫސީ އިދާރާ، ސީއައިއޭގެ މަރުކަޒުތަކާއި އެމްބަސީތަކަށް ވެސް ޢަމާޒުކުރަން ފަށައިފައެވެ.
މި ކުރިމަތިލުންތަކުގެ ސަބަބުން، މެދުއިރުމަތީގެ ވައިގެ ސަރަޙައްދު ބަންދުކުރަންޖެހުމުން، މުޅި ދުނިޔޭގެ ވައިގެ އުދުހުންތަކަށް ވަނީ ބުރޫއަރައިފައެވެ. މީގެއިތުރުން ހޮރްމުޒް ކަނޑުއޮޅި އީރާނުން ބަންދުކޮށްފައިވާތީ، މެދުއިރުމަތިން ތެލާއި ގޭސް ބޭރުކުރުން ވަނީ ގާތްގަނޑަކަށް ހުއްޓުމަކަށް އައިސްފައެވެ.
އޭގެ ސަބަބުން، ދުނިޔޭގެ ބާޒާރުގައި ތެލާއި ގޭހުގެ އަގު މިހާރު ވެސް ވަނީ އެތައް ގުނައަކުން އިތުރުވާން ފަށައިފައެވެ.