ސަޢޫދީ ޢަރަބިއްޔާގެ ވެރިރަށް ރިޔާޟުގައި ހުންނަ އެމެރިކާގެ އެމްބަސީއަށް އީރާނުން ޑްރޯން ޙަމަލާތަކެއް ދީފިއެވެ. މިއީ، އީރާނާ ދެކޮޅަށް ޔަހޫދީންނާއި އެމެރިކާ ގުޅިގެން ފަށާފައިވާ ޣައިރުޤާނޫނީ ހަނގުރާމައާ ގުޅިގެން ދީފައިވާ ޙަމަލާތަކެކެވެ. އީރާންގެ މިނިވަން ކަމުގެ ދިފާޢުގައި ފަށާފައިވާ ހަނގުރާމައިގައި އީރާނުން ދަނީ ގަލްފާއި ޢަރަބި ޤައުމުތަކުގައި ހުރި އެމެރިކާގެ އަސްކަރީ މަރުކަޒުތަކާއި އެމެރިކާގެ މަސްލަޙަތު ހުރި އަމާޒުތަކަށް ވެސް ޙަމަލާ ދެމުންނެވެ.
ފެބުރުވަރީ 28ވަނަ ދުވަހު ޔަހޫދީންނާއި އެމެރިކާއިން އީރާނާ ދެކޮޅަށް ފެށި ހަނގުރާމައިގައި ޝަހީދު ކޮށްލާފައިވާ މީހުންގެ އަދަދު ވަނީ 555 އަށް އުފުލިފައެވެ. އޭގެ ތެރޭގައި، އެ ޤައުމުގެ ރޫހީ އެންމެ މަތީ ވެރިޔާ، އާޔަތުالله ޢަލީ އަލް-ޚާމަނާޢީއާއި އޭނާގެ ޢާއިލާގެ މެންބަރުންގެ އިތުރުން އީރާންގެ އަސްކަރިއްޔާގެ އިސްވާރުންގެ ތެރެއިން ބަޔަކު ހިމެނެއެވެ. އަދި، ގިނަ އަދަދެއްގެ ޢާންމުންނާއި ކުޑަކުދިން ހިމެނެއެވެ.
އެ ޙަމަލާތަކަށް ރައްދު ދިނުމުގެ ގޮތުން އީރާނުން ގަލްފާއި ޢަރަބި ޤައުމުތަކަށް ޙަމަލާ ދޭން ފަށާފައިވާއިރު، އެ ޙަމަލާތައް އަމާޒު ކުރަމުން ދަނީ އެމެރިކާގެ އަސްކަރީ މަރުކަޒުތަކާއި އެމެރިކާގެ މަސްލަޙަތު އޮތް އިމާރާތްތަކަށް ކަމުގައި އީރާނުން ބުނެއެވެ. ރިޔާޟުގައި ހުންނަ އެމެރިކާގެ އެމްބަސީއަށް ޙަމަލާ ދިނުމަށް އީރާނުން ވަނީ ދެ އަސްކަރީ ޑްރޯން ބޭނުން ކޮށްފައެވެ. އެ ޙަމަލާތަކުގައި އެމްބަސީ ހުންނަ އިމާރާތުގައި އަލިފާން ރޯވި ކަމުގައި ސަޢޫދީ ޢަރަބިއްޔާގެ ދިފާޢީ ވުޒާރާއިން ހާމަކުރިއެވެ. ނަމަވެސް، އެއްވެސް މީހެއްގެ ފުރާނައަށް ނުރައްކަލެއް ނުވެއެވެ. އީރާނުން ދީފާނެ ޙަމަލާއަކުން އެމެރިކާގެ ޚާރިޖީ ދާއިރާގެ މުވައްޒަފުން ޙިމާޔަތް ކުރުމަށް އެމެރިކާ ސަރުކާރުން ވަނީ އެ މީހުން ރައްކާތެރި ހިސާބުތަކަށް ބަދަލު ކޮށްފައެވެ.
ރިޔާޟުގެ އިތުރުން، ޢުމާންގެ އަލް-ދަޤަމު ވިޔަފާރި ބަނދަރަށް ވެސް އީރާނުން ވަނީ ޑްރޯން ޙަމަލާތަކެއް ދީފައެވެ. އެ ޙަމަލާތަކުގައި ތެޔޮ އުފުލާ ޓޭންކަރަކަށް ބޮޑެތި ގެއްލުންތަކެއް ލިބުނެވެ. އީރާނަށް އިސްވެ ޙަމަލާދިނުމުގެ އަޑީގައި ހުންނެވީ ރައީސް ޑޮނަލްޑް ޓްރަމްޕެވެ. ބަދަލު ހިފުމުގެ ގޮތުން ރިޔާޟުގައި ހުންނަ އެމެރިކާގެ އެމްބަސީއަށް އީރާނުން ޙަމަލާ ދިނުމުން، އެ ކަން ހަޖަމުވެ ވަޑައިނުގެން، ޓްރަމްޕް ވަނީ އީރާނަށް އައު އިންޒާރުތަކެއް ދެއްވާފައެވެ.
އީރާނުން ދީފައިވާ ޙަމަލާތަކެއްގައި އެމެރިކާ ސިފައިންގެ ތިން މީހަކު މަރުވުމާއި، އިތުރު ފަސް މީހުން ޒަޚަމުވުމުގެ އިތުރުން އެމެރިކާގެ އަސްކަރީ މަރުކަޒުތަކަށް އީރާނުން ބޮޑެތި ގެއްލުންތަކެއް ދެމުންދާތީ ޓްރަމްޕް ވަނީ ކޯފާ އިސްކުރައްވާފައެވެ. އޭނާ ވިދާޅުވީ، އެމްބަސީއަށް ދިން ޙަމަލާއާއި، އެމެރިކާ ސިފައިން މަރައިލި ހާދިސާގެ ބަދަލު ހިއްޕަވާނެ ކަމުގައެވެ. އަދި، ބަދަލު ހިފުމުގެ ގޮތުން އެމެރިކާއިން ކުރާ ކަންތައް "ވަރަށް އަވަހަށް އެނގިގެންދާނެ" ކަމުގައި ވެސް އޭނާ ވިދާޅުވިއެވެ.
ސަޢޫދީ ޢަރަބިއްޔާއާއި ޢުމާންގެ އިތުރުން ބަޙްރައިންގައި ހުންނަ އެމެރިކާގެ އަސްކަރީ މަރުކަޒަކަށް ވެސް އީރާންގެ އިސްލާމީ އިންޤިލާބީ ލަޝްކަރު (އައިއާރްޖީސީ)ން ވަނީ ޙަމަލާދީފައެވެ. އައިއާރްޖީސީއާ ޙަވާލާދީ އީރާނުގެ ރަސްމީ ނޫސް އޭޖެންސީ (އައިއާރްއެންއޭ)ން ބުނީ، ބަޙްރައިންގެ ޝައިޚް ޢީސާ ސަރަހައްދުގައި ހުންނަ އެމެރިކާގެ އަސްކަރީ މަރުކަޒަކަށް 20 ޑްރޯނާއި ތިން މިސައިލް ބޭނުންކޮށްގެން ވަރުގަދަ ޙަމަލާތަކެއް ދީފައިވާނެ ކަމުގައެވެ. ފާއިތުވި ދެ ދުވަހުގެ ތެރޭގައި އީރާނުން ވަނީ 15 ޤައުމެއްގައި ހުރި އެމެރިކާގެ އަސްކަރިއްޔާގެ 27 މަރުކަޒަކަށް ޙަމަލާ ދީފައެވެ.