ޓޭބަލް ޓެނިސް އަންޕަޔަރުންނާއި ރެފްރީން އަދި މުބާރާތްތައް އިންތިޒާމުކުރާ ފަރާތްތައް އިތުރުކުރުމަށް މިއަހަރު 6 ކޯހެއް ހިންގުމަށް ޓޭބަލް ޓެނިސް އެސޯސިއޭޝަނުން ނިންމައިފިއެވެ.
މިކޯސްތައް ބޭއްވުމަށް މަސައްކަތް ކުރަމުން އަންނައިރު ޓީޓީ އެސޯސިއޭޝަނުން މިއަހަރު އެންމެ ފުރަތަމަ ބާއްވާނީ ޓޯނަމަންޓް އޮގަނައިޒިން އަދި ދިވެހި ރެފްރީން ތަމްރީނު ކުރުމަށް ބާއްވާ ކޯހެވެ. މިކޯސް އެޕްރީލް މަހުގެ ތެރޭގައި ބޭއްވުމަށް އަންނަނީ މަސައްކަތްކުރަމުންނެވެ.
އެއަށްފަހު އޮންނާނީ، އިންޓަރނޭޝަނަލް ޓެނިސް ފެޑެރޭޝަން، އައިޓީއެފް ލެވެލް 1 ކޯޗިން ކޯހެވެ. މި ކޯސް އޮންނާނީ 17 ޖުލައިން 1 އޮގަސްޓްގެ ނިޔަލަށެވެ.
ބޭސިކް އަންޕަޔަރުންނާއި ވައިޑީޕީ ކޯޗުން ތަމްރީނު ކުރުމަށް ބާއްވާ ކޯސް މިއަހަރު ބާއްވާނީ ޅ. ނައިފަރުގައެވެ. މި ކޯސް ބާއްވަން ނިންމާފައިވަނީ ސެޕްޓެންބަރުގައެވެ. މީގެ އިތުރުން އައްޑޫ ސިޓީއާއި ފުވައްމުލައް ސިޓީގައިވެސް ބޭސިކް އަމްޕަޔަރ ކޯސްތައް ހިންގުމަށް ޓީޓީ އެސޯސިއޭޝަނުންވަނީ ނިންމާފައެވެ.
އައްޑޫ ސިޓީއާއި ފުވައްމުލައް ސިޓީގައި ބޭސިކް އަމްޕަޔަރު ކޯހާއި އައިޓީޓީއެފް ލެވެލް 1ގެ ކޯޗިން ކޯސް އޮންނާނީ ޑިސެންބަރުގައެވެ. އަދި ޑިސެންބަރުމަހުގެތެރޭގައި މާލޭގައިވެސް ބޭސިކް އަމްޕަޔަރު ކޯހެއް ބޭއްވުމަށް ވަނީ ތާވަލުކޮށްފައެވެ.
މިފަދަ މީހުން ބިނާކުރުމުގެ ޕްރޮގްރާމެއް މިދިޔަ އަހަރު އެސޯސިއޭޝަނުން ކުރިޔަށް ގެންގޮސްފައި ނެތްނަމަވެސް އިންޓަރނޭޝަނަލް ޓޭބަލް ޓެނިސް ފެޑެރޭޝަން (އައިޓީޓީއެފް) އިން ދޭ ބްލޫ ބެޖު ރާއްޖޭ އަމްޕަޔަރު އައްޒާމް އިބްރާހީމް ވަނީ ހާސިލްކޮށްފައެވެ. އަދި އަމްޕަޔަރު މުޙައްމަދު ޔާމީންވެސް ވަނީ 2024 ވަނަ އަހަރު މިބެޖު ހާސިލުކޮށްފައެވެ. އަދި 4 އަމްޕަޔަރަކު ވަނީ ހަތަރު ވައިޓް ބެޖު ހާސިލުކޮށްފައިވެއެވެ.
އަތޮޅު ތެރޭގައި ޓީޓީގެ ވަސީލަތްތައް ގާއިމުކޮށް ކުޅުންތެރިން އުފައްދާ ޓެކްނިކަލް މީހުން ބިނާކުރުމަކީ ޓޭބަލް ޓެނިސް އެސޯސިއޭޝަނުން ވަރަށް ބޮޑަށް އިސްކަންދޭ ކަމެކެވެ. އަދި ކުޅިވަރު ވުޒާރާއާއި ނޭޝަނަލް ސްޕޯޓްސް އިންސްޓިޓިއުޓްގެ އެހީތެރިކަމާއެކު ރާއްޖޭގެ އެކި ސަރަހައްދުތަކުގައި މި ކުޅިވަރުގެ ޓެކްނިކަލް މީހުން ބިނާކުރުމުގެ ކޯސްތައް ބޭއްވުމަށް ކޮންމެ އަހަރަކުވެސް ބޮޑު ހޭދައެއް ކުރެއެވެ.