ޔޫރަޕިއަން ސުޕަލީގު އުފައްދަން އެއްބަސްވި 12 ކުލަބުގެ ތެރެއިން އެ މަސައްކަތުގައި ދެމި އޮތް އެންމެ ފަހު ކުލަބު ކަމަށްވާ ސްޕޭނުގެ ރެއާލް މެޑްރިޑް ވެސް އެންމެ ފަހުން އެ ކުންފުނިން ވަކި ވެއްޖެ އެވެ.
ރެއާލް މެޑްރިޑުގެ ހިލާޔެއްގެ މައްޗަށް އުފައްދަން މަސައްކަތް ކުރި ލީގުން އެ ކުލަބު ވަކިވީ ވާދަވެރި ބާސެލޯނާއިން މި ލީގުން ވަލިވިކަން އިއުލާނު ކުރިތާ ހަފުތާއެއް ފަހުންނެވެ.
ބާސެލޯނާ މިހާރު ވަނީ ޔޫރަޕިއަން ކުލަބު އެސޯސިއޭޝަނާ ގުޅެން ނިންމައި އެކަމުގެ އަމަލީ މަސައްކަތް ގާތްގަނޑަކަށް ފުރިހަމަ ކޮށްފަ އެވެ.
ސުޕަލީގު އުފައްދަން އެއްބަސްވި 12 ކުލަބުގެ ތެރެއިން އެންމެ ފުރަތަމަ ވަކިވީ އިނގިރޭސި ހަ ކުލަބެވެ. މި ލީގު އިއުލާނު ކުރިތާ އެންމެ ހައެއްކަ ގަޑިއިރު ތެރޭގައި މި ކުލަބު ތަކުން ވަކިވީ ސަޕޯޓަރުންގެ ނުރުހުމާއި ޔޫރަޕުގެ ފުޓްބޯޅަ ޖަމިއްޔާ ޔޫއޭފާގެ ހިތްހަމަ ނުޖެހުންތަކާ ހެދި އެވެ.
އޭގެ ފަހުން ވަކިވީ ސްޕޭނުގެ އެތްލެޓިކޯ މެޑްރިޑާއި އިޓަލީގެ މިލާނުގެ ދެ ކުލަބު ކަމަށްވާ އިންޓަމިލާނާއި އޭސީ މިލާނެވެ. މިއަށްފަހު 2024 ވަނަ އަހަރު ސުޕަލީގު ކުންފުނިން ވަކިވީ އިޓަލީގެ ޔުވެންޓަސް އެވެ.
ބާސެލޯނާއިން ވަކިވި މައިގަނޑު ސަބަބަކީ އެ ކުލަބަށް ކުރިމަތިވެފައިވާ މާލީ ގޮންޖެހުންތަކާއެކު ޔޫއޭފާގެ ފިއްތުންތައް އިންތިހާ އަށް ދިއުމެވެ. ސުޕަލީގުން ވަކިވުމަށްފަހު ބާސެލޯނާއިން ބުނީ އެ މީހުން މިހާރު ބޭނުންވަނީ ޔޫއޭފާއާއެކު ގުޅުން ރަނގަޅު ކުރަން ކަމަށެވެ.
ސުޕަލީގުން ބާސެލޯނާ ވަކިވީ އެ ކުލަބުގެ އިންތިހާބު އަންނަ މަހު ބާއްވަން ހަމަޖެހިފައިވަނިކޮށެވެ. މި އިންތިހާބުގައި މިހާރުގެ ރައީސް ޖޯން ލަޕޯޓާ ވެސް ވާދަކުރައްވާނެ އެވެ. ދެ ވަނަ ދައުރަކަށް ހޮވެން އަމާޒު ހިފާފައިވާ ރައީސަށް މިވަގުތު އޮތް އެންމެ ބޮޑު އެއް ގޮންޖެހުމަކީ ކުލަބުގެ މާލީހާލަތެވެ. ހާއްސަކޮށް ސްޕޭނުގެ ފުޓްބޯޅައިގެ މާލީކަންކަން ހިފަހައްޓަންޖެހޭ މިންގަނޑުގައި ހިފަހައްޓައި މާލީ ގޮތުން މިނިވަންކަމާއެކު ހަރަދު ކުރެވޭނެ ގޮތަކަށް ކަންކަން ބައްޓަން ކުރުމެވެ. މިކަން ކުރެވެން އޮތީ ސްޕެނިޝް ލީގާއި ޔޫއޭފާ ރުއްސައިގެންނެވެ.
ރެއާލް ސުޕަ ލީގު ދޫކޮށްލަން މަޖުބޫރުވީ ބާސެލޯނާއިން އެލީ ފިޔަވަޅުގެ ސަބަބުން އެ ކުލަބަށް ލިބިދާނެ ގެއްލުން ކުޑަކުރުމަށް ކަމަށް ސްޕޭނުގެ މީޑިއާތަކުން ބުނެ އެވެ.