ގަރލް ގައިޑްސްގެ އަހަރީ ޢާންމު ޖަލްސާ ފަސްޓް ލޭޑީ ޝަރަފުވެރި ކޮށްދެއްވައިފި

މޯލްޑިވްސް ގަރލްގައިޑްސް އެސޯސިއޭޝަންގެ 2025 ވަނަ އަހަރުގެ އަހަރީ ޢާންމު ޖަލްސާ ރައީސުލްޖުމްހޫރިއްޔާގެ އަނބިކަނބަލުން އަދި ޗީފް ގައިޑް، މެޑަމް ސާޖިދާ މުޙައްމަދު ޝަރަފުވެރި ކޮށްދެއްވައިފިއެވެ.

މިއަދު ހެނދުނު މޫކާއި ހޮޓަލުގައި ބޭއްވި މި ޖަލްސާއަށް ރައީސުލްޖުމްހޫރިއްޔާގެ އަނބިކަނބަލުން ވަޑައިގަތުމުން އެކަމަނާއަށް އަދި މި ރަސްމިއްޔާތުގެ ޚާއްޞަ މެހެމާން، ވޯލްޑް އެސޯސިއޭޝަން އޮފް ގަރލް ގައިޑްސް އަދި ގަރލް ސްކައުޓްސްގެ އޭޝިއާ ޕެސިފިކް ރީޖަނަލް ކޮމިޓީގެ ޗެއަރއަށް ވަނީ ގާޑް އޮފް އޮނަރއެއް އަރުވާފައެވެ.

މޯލްޑިވްސް ގަރލްގައިޑްސް އެސޯސިއޭޝަންގެ 2025 ވަނަ އަހަރުގެ އަހަރީ ޢާންމު ޖަލްސާގައި ވަނީ، 2024 ވަނަ އަހަރުގެ އަހަރީ ޢާންމު ޖަލްސާގެ ޔައުމިއްޔާ ފާސްކޮށްފައެވެ. އަދި މިދިޔަ އަހަރުގެ އަހަރީ ރިޕޯޓް ފާސްކޮށްފައިވާއިރު، މިދިޔަ އަހަރުގެ މާލީ ބަޔާންވެސް ވަނީ ފާސްކޮށްފައެވެ. މީގެ އިތުރުން މި ޖަލްސާގައި ވަނީ، އޭޝިއާ ޕެސިފިކް ރީޖަންގެ ޗެއަރޕާސަން ނިއުމަތު ޝަފީޤަަށް ޓޯކަން އޮޕް އެޕްރިސިއޭޝަނެއް އަރުވާފައެވެ.

މި ޖަލްސާގައި ވާހަކަދައްކަވަމުން އޭޝިއާ ޕެސިފިކް ރީޖަންގެ ޗެއަރޕާސަން ނިއުމަތު ޝަފީޤު ވަނީ ރާއްޖޭގެ ގަރލްގައިޑުންނާއި، ލީޑަރުންނަކީ މުޖުތަމަޢުގައި ދިމާވާ ކޮންމެ ކަމަކަށް އެހީތެރިކަން ފޯރުކޮށްދިނުމަށް ތައްޔާރަށް ތިބި ބައެއްކަން ފާހަގަކުރައްވާފައެވެ. ގަރލްގައިޑުގެ ހަރަކާތްތައް ރާއްޖޭގެ ހުރިހާ ސްކޫލެއްގައިވެސް ކުރިއަށް ގެންދިޔުމަކީ، މުހިއްމު ކަމެއްކަން ފާހަގަކުރައްވާ އޭނާ ވިދާޅުވީ، ކުރިއަށް އޮތްތަނުގައި އެމަގަށް ވަޞީލުވުމަކީ އަމާޒަކަށް ހަދަންޖެހޭ ކަމަށެވެ. އަދި ސްކޫލު ކުދިންގެ އިތުރަށްވެސް މުޖުތަމައުގައި ތިބި އެހެން މީހުންނަކީވެސް މި މަސައްކަތުގައި ބައިވެރިވާނެ ބަޔަކަށްވުމަކީ މުހިއްމު ކަމެއްކަން ފާހަގަކުރެއްވިއެވެ.

"އެހެން މިީހުންވެސް މި ހަރަކާތުގައި ބައިވެރިވެ މުސްތަޤުބަލުގައި މި ހަރަކާތްތައް ގައިޑްކޮށް ކުރިއަށް ގެންދެވޭނެ ބައެއް އުފެއްދުމަކީ މުހިއްމު ކަމެއް." އޭޝިއާ ޕެސިފިކް ރީޖަންގެ ޗެއަރޕަސަން ނިއުމަތު ޝަފީޤު ވިދާޅުވިއެވެ.

މިދިޔަ އަހަރު އެ އެސޯސިއޭޝަންގެ އަހަރީ ޢާންމު ޖަލްސާގައި ވަނީ، އެ އެސޯސިއޭޝަނުން ކުރިއަށް ގެންދިޔަ ހަރަކާތްތަކާއި ލިބުނު ކާމިޔާބީތައް ފާހަގަކުރައްވާފައެވެ. މިދިޔަ އަހަރުގެ ގަރލް ގައިޑްސް އެސޯސިއޭޝަންގެ މާލީ ބަޔާނުގައިވާ ގޮތުން އާމްދަނީގެ ގޮތުގައި ލިބިފައިވަނީ، އެކި ބްރާންޗުތަކުގެ ޔުނިފޯމްތައް ވިއްކައިގެންނާއި، އެހެނިހެން ފީގެ ގޮތުގައި ލިބުނު އާމްދަނީއެވެ.

އެގޮތުން މިދިޔަ އަހަރު އެ އެސޯސިއޭޝަންގެ ފިހާރައަށް އާމްދަނީގެ ގޮތުގައި 2.7 މިލިޔަން ރުފިޔާ ލިބިފައިވެއެވެ. އޭގެ ތެރެއިން %47 އަކީ ލިޓިލްމެއިޑް ބްރާންޗުން ލިބުނު އާމްދަނީއެވެ. އަދި މުދާ ގަތުމަށް 1.7 މިލިޔަން ރުފިޔާ ވަނީ ޚަރަދުކޮށްފައެވެ. މިދިޔަ އަހަރަކީ، ފާއިތުވި ދެ އަހަރާ އަޅާބަލާއިރު އާމްދަނީ %21 އަށް ދަށްވެފައިވާ އަހަރެއް ކަމަށް މާލީ ބަޔާނުން ދައްކައެވެ.

މިދިޔަ އަހަރު ސަރުކާރުން އެހީގެ ގޮތުގައި އެ އެސޯސިއޭޝަނަށް 5 ލައްކަ ރުފިޔާ ދީފައިވާއިރު، އަމިއްލަ ފަރާތްތަކުން އެހީގެ ގޮތުގައި އެއްލައްކަ ހަތްދިހަ ހަތް ހާހަށްވުރެ ގިނަ ރުފިޔާ ދީފައިވެއެވެ. އަދި އެހެނިހެން އާމްދަނީގެ ގޮތުގައި މިދިޔަ އަހަރު 5000 ރުފިޔާ ލިބިފައިވެއެވެ. ޚަރަދުތަކަށް ބަލާލާއިރު، ރާއްޖެއާއި ރާއްޖޭން ބޭރުގައި ކުރިޔަށް ގެންދިޔަ ހަރަކާތްތަކަށް ބޮޑު އަދަދެއް ހޭދަކޮށްފައިވެއެވެ. މިގޮތުން ފީ ނަގައިގެން 8 ހަރަކާތެއް ކުރިއަށް ގެންގޮސްފައިވާއިރު، އެ ހަރަކާތްތަކަށް 1.9 މިލިޔަން ރުފިޔާ ވަނީ ޚަރަދުކޮށްފައެވެ.

ގަރލް ގައިޑްސް އެސޯސިއޭޝަނަކީ، އަންހެން ކުދިންނާއި އަންހެނުން ބާރުވެރިކުރުވާ އެކި ކަންކަމަށް ބާރުވެރި ކުރުމަށް ތަފާތު ހަރަކާތްތައް ހިންގާ އެސޯސިއޭޝަނެކެވެ. އެ އެސޯސިއޭޝަން އުފެދުނީ 1948 ވަނަ އަހަރުގައެވެ. އެ އެސޯސިއޭޝަންގައި 88 ސްކޫލަކުން 14000އަށްވުރެ ގިނަ ކުދިން ވަނީ ބައިވެރިވެފައެވެ.