އައިޔޫއެމްގެ ކުރިއަށް އޮތް 5 އަހަރުގެ ޕްލޭން އިފްތިތާހުކޮށްފި

ދިވެހިރާއްޖޭގެ އިސްލާމީ ޔުނިވަރސިޓީގެ ކުރިއަށް އޮތް ފަސް އަހަރުގެ ސްޓްރެޓީޖިކް ޕްލޭން އިފްތިތާހުކޮށްފިއެވެ.

އެ ޔުނިވަރސިޓީގައި މިއަދު ބޭއްވި ރަސްމިއްޔާތެއްގައި މި ޕްލޭން އިފްތިތާހު ކޮށްދެއްވީ ސިވިލް ސަރވިސް ކޮމިޝަންގެ ރައީސް އަލްއުސްތާޛް މުޙައްމަދު މުޖުތާޒެވެ.

މި ރަސްމިއްޔާތު ޝަރަފުވެރިކޮށްދެއްވައި ވާހަކަދައްކަވަމުން ސިވިލް ސަރވިސް ކޮމިޝަންގެ ރައީސް އަލްއުސްތާޛް މުޙައްމަދު މުޖުތާޒު ވިދާޅުވީ އެއްވެސް މުއައްސަސާއެއްގެ ސްޓްރެޓީޖިކް ޕްލޭން ބިނާކުރެވެނީ ކުރިއެރުވުމަށް މަސައްކަތް ކުރާނެ ނިޒާމެއް ގާއިމުކުރުމަށް ކަމަށެވެ. މީގެ ސަބަބުން އެ އިދާރާއެއްގެ މަގުސަދުތަކާއި ޤާނޫނީ ޒިންމާތަކާއި ޤައުމީގޮތުން އިސްކަންދޭ ކަންކަން އެއް މިސްރާބަކަށް ގެންގޮސްދެވޭ ކަމަށްވެސް ވިދާޅުވިއެވެ.

"ކޮންމެ ސްޓްރެޓީޖިކް ޕްލޭނަކީވެސް އަޅުގަނޑުމެންނަށް އެތަނެއްގައި މަސައްކަތް ކުރައްވާ ބޭފުޅުންނަށް އެއްބަސްވެވޭ އިގުރާރެއް. އެެހެންވީމަ އެ ފަސް އަހަރު ދުވަހުގެ ތެރޭގައި އަޅުގަނޑުމެން މަސައްކަތް ކުރަންވާނީ ވީހާވެސް ޕބޮޑަކަށް މި ހަދާފައިވާ ޕްލޭން ތަންފިޒު ކުރެވޭ ގޮތެއްގެ މައްޗަށް އަޅުގަނޑުމެން މަސައްކަތުގެ މާހައުލު ބައްޓަންކޮށްގެން،" ސިވިލް ސަރވިސް ކޮމިޝަންގެ ރައީސް އަލްއުސްތާޛް މުޙައްމަދު މުޖުތާޒު ވިދާޅުވިއެވެ.

އިސްލާމީ ޔުނިވަރސިޓީން 2026ވަނަ އަހަރުން ފެށިގެން 2030ވަނަ އަހަރާ ހަމައަށް އަމަލުކުރާނެ ސްޓްރެޓީޖިކް ޕްލޭނާ ގުޅޭގޮތުން ވާހަކަދައްކަވަމުން އެ ޔުނިވަރސިޓީގެ ވައިސް ޗާންސެލަރ ޑރ. އަލީ ޒާހިރު ވިދާޅުވީ މި ޕްލޭން ތައްޔާރުކޮށްފައިވަނީ ނިމުނު ފަސް އަހަރުު ދުވަހުގެ ޕްލޭން ރިވިއު ކުރުމަށްފަހު ޔުނިވަރސިޓީ އިތުރު ހަރުފަތަކަށް ކުރިއަށްގެންދިއުމަށް ކުރަން ހުރި ކަންކަމަށް ރިއާޔަތްކޮށްގެން ކަމަށެވެ. މި ޕްލޭން ތައްޔާރު ކުރުމުގައި ކޮންސަލްޓަންޓެއްގެ ހައިސިއްޔަތުން ބައިނަލްއަގުވާމީ ތަޖުރިބާކާރެއްވެސް އެހީތެރިކަން ފޯރުކޮށްދެއްވިކަން ފާހަގަކުރެއްވިއެވެ.

އައިޔޫއެމްގެ ވައިސް ޗާންސެލަރ ވިދާޅުވީ ބާރު ދުވެލީގައި ދުނިޔެ ކުރިއަރަމުން އަންނައިރު 2030ވަނަ އަހަރު އަންނައިރު ޔުނިވަރސިޓީ އޮންނަ ގޮތް ޕްލޭން ކުރުމަކީ މުހިންމު ކަމެއް. އިސްލާމް ދީނުގައިވެސް ކަންކަން ރޭވުމަށް ބާރު އަޅުއްވާ ކަމަށާއި ވަކި މިސްރާބެއް އޮވެގެން މަސައްކަތް ކުރުމަކީ ކާމިޔާބީއަށް ވާސިލްވުމަށް މުހިންމު ކަމެއް ކަމެއް ކަމަށްވެސް ވިދާޅުވިއެވެ.

"އަޅުގަނޑުމެން މިހާރު އެކުލަވާލާފައި މިއޮތް ޕްލޭނަކީ އަޅުގަނޑު ގަބޫލުކުރަނީ ބައިނަލްއަގުވާމީ އެހެން ޔުނިވަރސިޓީތަކާ އެއް ހަމައެއްގައި އަޅުގަނޑުމެން ތިބުމަށްޓަކައި ވަރަށް ބޮޑަށް މަގުފަހިވެގެންދާނެ. އެއީ ކިޔަވައިދިނުމާއި ރިސަރޗް ހެދުމާއި ޔުނިވަރސިޓީން ފޯރުކޮށްދޭ ތަފާތު އެކި ވަސީލަތްތަކާއި ޚިދުމަތްތަކާ މި ހުރިހާއެއްޗެއް ވާނީ ގުޅި ލާމެހިފައި. އެހެންމަ މި ތަސައްވުރަކީ ޔުނިަވރސިޓީ އެހެން ހިސާބަކަށް ގެންގިސްދިނުމަށް އަޅުގަނޑުމެން ކުރަމުންދާ މަސައްކަތް،" އައިޔޫއެމްގެ ވައިސް ޗާންސެލަރ ޑރ. އަލީ ޒާހިރު ވިދާޅުވިއެވެ.

މި ސްޓްރެޓީޖިކް ޕްލޭނާއެކު އެ ޔުނިވަރސިޓީ ސްމާޓް ކެމްޕަހެއްގެ ގޮތުގައި މަސައްކަތް ކުރަން މަޖުބޫރުވާނެ ކަމަށް އައިޔޫއެމްގެ ވައިސް ޗާންސެލަރ ފާހަގަކުރެއްވިއެވެ. އަދި ޔުނިވަރިސިޓީގައި މިވަގުތު ގާއިމުކޮށްފައިނުވާ އެތައް ވަސީލަތެއް ހިމެނޭގޮތަށް މާތްވެގެންވާ އިސްލާމްދީނުގެ އުސޫލުތަކާއެއްގޮތްވާގޮތުގެ މަތިން ޔުނިވަރިސޓީގެ ވިސްނުމާއި ފިކުރު ބައްޓަންވާނެގޮތަށް ޕްލޭން އެކުލަވާލާފައިވާ ކަމަށްވެސް ވައިސް ޗާންސެލަރ ޑރ. އަލީ ޒާހިރު ވިދާޅުވިއެވެ.