ވަކިވަކި ޤައުމުތަކަށް ބަލާއިރު، ތަރައްޤީގެ އެންމެ މުހިންމު ބައިވެރިޔާގެ ގޮތުގައި ތަރައްޤީވަމުން އަންނަ ކުދި ޖަޒީރާ ޤައުމުތަކުން ދެކެނީ ޗައިނާ ކަމަށް ދިރާސާއަކުން ދައްކައިފިއެވެ.
އޯޑީއައި ގްލޯބަލްއިން ހެދި މި ދިރާސާގައި ބުނީ، އެމެރިކާ އާއެކު ހުޅަނގުގެ ގިނަ ޤައުމުތަކުން މާލީ އެހީތައް އެތައް ގުނައަކުން ކަނޑަމުންދާ ދަނޑިވަޅެއްގައި، ކުދި ޖަޒީރާ ޤައުމުތަކުގެ އޮފިޝަލުން ޤަބޫލުކުރަނީ، ޗައިނާއަކީ އެ ޤައުމުގެތަކުގެ ތަރައްޤީގެ އެންމެ މުހިންމު ބައިވެރިޔާގެ ގޮތުގައި ކަމަށެވެ.
ތަރައްޤީވަމުން އަންނަ ކުދި ޖަޒީރާ ޤައުމުތަކުގެ ތަފާތު 29 ޤައުމަކުން މި ދިރާސާއަށް މަޢުލޫމާތު އެއްކޮށްފައިވާއިރު، އޭގެ ތެރޭގައި ދިވެހިރާއްޖެ ވެސް ހިމެނެއެވެ.
އެ ދިރާސާގައި އިސްކޮށް ހުންނެވި، އެމިލީ ވިލްކިންސަން ވިދާޅުވީ ސައިޒުން ކުޑަނަމަވެސް، މި ޤައުމުތަކަކީ ބޮޑެތި އެކި ޤައުމުތަކަށް ސަރަޙައްދީ ގޮތުން މުހިންމު ޤައުމުތައް ކަމަށެވެ.
މިގޮތުން، ކެރީބިއަންގެ ޤައުމުތަކުގައި، އެމެރިކާ އާއި އިނގިރޭސިވިލާތް ފަހަތަށް ޖައްސައިލުމަށްފަހު، ޗައިނާގެ މަޤުބޫލުކަން ބޮޑުވުމަކީ ހައިރާންކުރަނިވި ކަމެއްގެ ގޮތުގައި އޭނާ ސިފަކުރެއްވިއެވެ.
މިދިޔަ އަހަރުގެ ޖުލައި މަހުން ފެށިގެން ނޮވެމްބަރު މަހާ ހަމައަށް ކުރިއަށް ގެންދިޔަ މި ދިރާސާ ބިނާކޮށްފައިވަނީ ކެރީބިއަން އިން ފެށިގެން، ދެކުނު ޗައިނާ ކަނޑާއި، ސޮލޮމޮން އައިލެންޑްސް، ޕަޕާ ނިއު ގިނީ، މޮރިޝަސް އަދި ރާއްޖެ ފަދަ ޤައުމުތަކަށެވެ.
އޯޑީއައިން ޙިއްޞާކޮށްފައިވާ މަޢުލޫމާތުތަކަށް ބަލާއިރު، 2020ވަނަ އަހަރާއި 2023ވަނަ އަހަރާ ދެމެދު، ޗައިނާއިން ވަނީ ކުދި ޖަޒީރާ ޤައުމުތަކުގެ ތަރައްޤީއަށް 6 ބިލިއަން އެމެރިކާ ޑޮލަރު ހޭދަކޮށްފައެވެ. އެ މުއްދަތުގެ ތެރޭގައި އެންމެ ގިނައިން އެހީފޯރުކޮށްދިން ޤައުމުތަކުގެ ތެރޭގައި ދެން ހިމެނެނީ، އޮސްޓްރޭލިއާ، 4.78 ބިލިއަން ޑޮލަރު، އެމެރިކާ، 3.17 ބިލިއަން ޑޮލަރު އަދި ޖަޕާނުން ދިން ދެ ބިލިއަން ޑޮލަރެވެ.