ޔޫއެފާ ޗެމްޕިއަންސް ލީގުގެ އެންމެ ފަހުގެ ޗެމްޕިއަން ޕީއެސްޖީ އާއި ދެކޮޅަށް ނިއުކާސަލް ޔުނައިޓެޑް ކުޅުނު މެޗު 1-1 ގެ ނަތީޖާއަކުން އެއްވަރުވެއްޖެ އެވެ.
މި ނަތީޖާ އާއިއެކު މި ދެ ޓީމަށްވެސް ޖެހޭނީ ދެވަނަ ބުރުގެ ޖާގައެއް ހޯދުމަށް ޕްލޭއޮފް އިތުރު މެޗުތަކެއް ކުޅުމަށެވެ. ފުރަތަމަ ބުރުގެ އަށް މެޗު ކުޅުނުއިރު ޕީއެސްޖީގެ އިތުރުން ނިއުކާސަލް އަށްވެސް ލިބިފައިވަނީ 14 ޕޮއިންޓެވެ.
ޕެރިހުގެ ޕާކް ޑި ޕްރިންސަސް ސްޓޭޑިއަމްގައި ސާޅީސް ހަތް ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގެ ހަތަރުވަނަ މިނިޓުގައި ޕީއެސްޖީ އަށް ވަނީ ލަނޑު ޖަހާނެ ރަގަޅު ފުރުސަތެއް ލިބިފަ އެވެ.
އެގޮތުން މެޗުގެ ހަތަރުވަނަ މިނިޓުގައި ނިއުކާސަލްގެ ލެވިސް މިލޭގެ އަތުގައި ބޯޅަ ޖެހުމާއި ގުޅިގެން އެ ޓީމަށް ލިބުނު ޕެނަލްޓީ އުސްމާން ޑެމްބެލޭ ފޮނުވާލިއިރު ނިއުކާސަލްގެ ގޯލުކީޕަރު ނިކް ޕޯޕް ވަނީ އެ ޕެނަލްޓީ މަތަކޮށްފަ އެވެ.
ނަމަވެސް އޭގެ ހަތަރު މިނިޓު ފަހުން ޕީއެސްޖީގެ ވިޓީނިއާ ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ.
ނަމަވެސް ފުރަތަމަ ހާފުގެ ކުޅުން ނިމުމުގެ ކުރިން ނިއުކާސަލްގެ ޖޯ ވިލޮކް ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ.
މި މެޗުގެ ދެވަނަ ހާފުގައި ނިއުކާސަލް އިން ޑިފެންސަށް އިސްކަން ދީގެން ކުޅުނު ނަމަވެސް ޕީއެސްޖީ އަށް ވަނީ އިތުރު ލަނޑެއް ޖެހޭ ގޮތް ނުވެފަ އެވެ.