ޔޫއެންއޯޑީސީން އެންޑީއޭއަށް ޑްރަގް ޓެސްޓް ކިޓްތަކެއް

ރާއްޖޭގައި މަސްތުވާތަކެތި ފެތުރުން ހުއްޓުވުމަކަށް ގެނައުމަށްޓަކައި، ޔޫއެންއޯޑީސީގެ ފަރާތުން އެންޑީއޭއަށް ޑްރަގް ޓެސްޓް ކިޓްތަކެއް ޙަވާލުކޮށްފިއެވެ.

މިކަމަށްޓަކައި މިއަދު މެންދުރު ސީޓްރެކް ބިލްޑިންގގައި ބޭއްވި ޙަފްލާގައި ނޭޝަނަލް ޑްރަގް އޭޖެންސީ(އެންޑީއޭ)ގެ ފަރާތުން ޑްރަގް ޓެސްޓް ކިޓްތަކާއި ޙަވާލުވެލެއްވީ، އެންޑީއޭގެ ރައީސް، އިބްރާހިމް މުޙައްމަދެވެ. ކިޓްތައް ޙަވާލުކޮށްދެއްވީ، ޔުނައިޓެޑް ނޭޝަންސް އޮފިސް އޮން ޑްރަގްސް އެންޑް ކްރައިމް (ޔޫއެންއޯޑީސީ)ގެ ރީޖަން އޮފިސަރ، ކްރިސްޓިއަން ހޯލެގްއެވެ.

ޔޫއެންއޯޑީސީއިން ރާއްޖެއަށް ހަދިޔާކޮށްފައިވާ ޓެސްޓް ކިޓްތަކުގެ ތެރޭގައި ހިމެނެނީ، 30 ޑްރަގް ޓެސްޓް ކިޓާއި، 30 ޕްރިކާސާރ ކެމިކަލް ކިޓުގެ އިތުރުން 180 ޕޮކެޓް ކެމިކަލް ޓެސްޓް ކިޓެވެ. މީގެއިތުރުން ޓެސްޓް ކިޓްތައް ބޭނުންކުރާނެ ގޮތުގެ ތަމްރީން ވީޑިއޯތައް ހިމެނޭ 5 ޔޫއެސްބީ ޑްރައިވްވެސް ވަނީ ހަދިޔާ ކޮށްފައެވެ.

އެންޑީއޭއިން ވިދާޅުވީ، މި ޓެސްޓް ކިޓްތަކަކީ އެއް ކިޓުން 500 ޓެސްޓް ކުރެވޭނެ ގޮތަށް ފަރުމާ ކޮށްފައިވާ ކީޓްތަކެއް ކަމަށެވެ. ހަމައެއާއެކު، މި ކިޓްތައް ތައްޔާރުކޮށްފައިވަނީ، ވަގުތު ސަލާމަތްކޮށް، ސައްޙަ ނަތީޖާ ފޯރުކޮށްދިނުމުގެ އިތުރުން ހެއްކެއްގެ ގޮތުގައި ބޭނުންކުރެވޭނެ ގޮތަށް ކަމަށް އެންޑީއޭއިން ވިދާޅުވިއެވެ.

މި ޙަފްލާގައި ވާހަކަ ދައްކަވަމުން އެންޑީއޭގެ ބޯޑު މެމްބަރު ފާތިމަތު އައްޒަ ވިދާޅުވީ، މި ޓެސްޓު ކިޓުތަކުގެ ސަބަބުން އެންޑީއޭގެ އޮޕަރޭޝަންތަކަށް ފަސޭހަވެ، އިތުރު ކުރިއެރުންތަކެއް ލިބޭނެ ކަމަށެވެ. އަދި މި ޓެސްޓް ކިޓުތަކުގެ ސަބަބުން އަމާން މުޖުތަމައެއް ޤާއިމުކުރުމަށް ފުރުޞަތު ލިބުމުގެ އިތުރުން ސަރަޙައްދީ ގުޅުންތައް ވަރުގަދަ ކުރުމަށްވެސް މަގުފަހިވާނެ ކަމަށް އައްޒަ ވިދާޅުވިއެވެ.

"މިކަމުގައި ބައިވެރިވާ ފަރާތެއްގެ ހައިސިއްޔަތުން، މި ވަސީލަތްތަކުގެ ބޭނުން އެންމެ އެދެވޭ ގޮތުގައި ހިފާނެކަމުގެ ޔަޤީންކަން އަޅުގަނޑުމެން ދެން. އަދި މިކަންކަން އަޅުގަނޑުމެންގެ މަސައްކަތުގެ އޮނިގަނޑުގެ ތެރެއަށް ގެނެސް، މެދުނުކެނޑި ދެވޭ ތަމްރީނާއި މަޢުލޫމާތު ހިއްސާކުރުމުގެ ތެރެއިން މިކަން ދަމަހައްޓާނަން." ޓެސްޓް ކިޓްތައް ޙަވާލު ކުރުމުގެ ޙަފްލާގައި ވާހަކަ ދައްކަމުން އައްޒަ ވިދާޅުވިއެވެ.

މިޙަފްލާގައި ވާހަކަފުޅު ދައްކަވަމުން ޔޫއެންއޯޑީސީގެ ރީޖަން އޮފިސަރ ކްރިސްޓިއަން ހޯލެގް ވަނީ، އެއް އަހަރުން އަނެއް އަހަރަށް މަސްތުވާތަކެތި ބޭނުންކުރާ މީހުންގެ އަދަދު އިތުރުވާކަން ފާހަގަކުރައްވާފައެވެ. މީގެ އިތުރުން، މަސްތުވާތަކެތި ބޭނުން ކުރުމުގައާއި، އެތަކެތި ދައުރު ކުރުމަށް އައިސްފައިވާ ބަދަލުތަކަށް ބަލައި ފުލުހުންގެ އިތުރުން ކަމާ ބެހޭ ފަރާތްތަކުން ޢަމަލުކުރާ ގޮތްތަކަަށް ބަދަލުތަކެއް އަންނަ ޖެހިފައިވާކަންވެސް ކްރިސްޓިން ފާހަގަކުރެއްވިއެވެ.

"ސިންތެޓިކް މަސްތުވާތަކެތީގެ ތެރެއިން އެމްފެޓަމިން-ޓައިޕް ސްޓިމިއުލަންޓްސް ދަނީ މުޅި ދުނިޔޭގެ މަސްތުވާތަކެތީގެ ބާޒާރު އަލުން ބަދަލު ކުރަމުން. ކޮންމެ އަހަރަކު ނެރޭ ވޯލްޑް ޑްރަގް ރިޕޯޓުން ދައްކާ ގޮތުގައި، މިފަދަ ތަކެތި އަތުލައިގަނެވޭ މިންވަރު ދަނީ އައު ރެކޯޑްތަކެއް ހަދަމުން. މިއީ މުޅި ދުނިޔެއިން އަތުލައިގަނެވޭ މަސްތުވާތަކެތީގެ ގާތްގަނޑަކަށް ދެބައިކުޅަ އެއްބަޔަށްވުރެ ގިނަ އަދަދެއް." މި ޙަފްލާގައި ވާހަކަ ދައްކަވަމުން ކްރިސްޓިއަން ވިދާޅުވިއެވެ.

އެންޑީއޭއަށް ޙަވާލުކުރި މި ޓެސްޓް ކިޓުތަކަކީ ޢާއްމުކޮށް ރާއްޖެއަށް އެތެރެކުރާ މަސްތުވާތަކެތީގެ 10 ބާވަތް ޓެސްޓް ކުރެވޭނެހެން ތައްޔާރުކޮށްފައިވާ ކިޓުތަކެކެވެ.