16،000އަށްވުރެ ގިނަ މަސްދަޅު ކޭސް ޙަވާލުކޮށްފި
-
ހއ، ހދ އަދި ޅ.އަތޮޅުގެ ބައެއް ރަށްތަކަށް މަސްދަޅު ކޭސް ވަނީ ބަހައި ނިމިފައި
-
މާލެ ސަރަހައްދުގެ 15 މަރުކަޒަކުން ދަނީ މަސްދަޅު ކޭސް ދޫކުރަމުން
މިއަހަރުގެ ރޯދަ ހަދިޔާގެ ގޮތުގައި ސަރުކާރުން ކޮންމެ ގޭބިސީއަކަށް ދޭން ނިންމާފައިވާ މަސްދަޅު ކޭހުގެ ތެރެއިން މިހާތަނަށް 16،000 އަށްވުރެ ގިނަ މަސްދަޅު ކޭސް ދޫކޮށްފައިވާ ކަމަށް ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާބެހޭ ވުޒާރާއިން ވިދާޅުވެއްޖެއެވެ.
ރޯދަ ހަދިޔާގެ ގޮތުގައި މިދިޔަ އަހަރެކޭ އެއްގޮތަށް މިއަހަރުވެސް މަސްދަޅު ކޭސް ބަހަން ނިންމާފައިވާއިރު އެމަސައްކަތް ކުރިއަށް ގެންދަނީ ސިޓީތަކާއި އިދާރީ ދާއިރާތަކާއި ޢާންމު މަސައްކަތްތަކާއި ބެހޭ ވުޒާރާގެ ބެލުމުގެ ދަށުންނެވެ. މިމަސައްކަތް ކުރަނީ، ކައުންސިލްތަކާއި ޤައުމީ ދިފާޢީ ބާރާއި އެކި އިދާރާތައް ގުޅިގެންނެވެ.
ސިޓީތަކާއި ބެހޭ ވުޒާރާއިން އާންމުކޮށްފައިވާ ތަފާސް ހިސާބުތައް ދައްކާގޮތުން މިހާތަނަށް މާލެއާއި، ވިލިމާލެ އަދި ހުޅުމާލޭގައި ޤާއިމުކޮށްފައިވާ 15 މަރުކަޒަކުން 15،997 މަސްދަޅު ކޭސް ބަހާފައިވެއެވެ.
މިފްކޯއިން އުފައްދާފައިވާ މަސްދަޅު ބެހުމަށް އަތޮޅުތަކަށްވެސް ފޮނުވާފައިވެއެވެ. މި މަސައްކަތުގެ ދަށުން އުތުރުގެ ބައެއް ރަށްތަކުގައި މިހާރު ވަނީ މަސްދަޅު ކޭސް ބަހައި ނިންމާފައެވެ.
ސިޓީތަކާއި ބެހޭ ވުޒާރާއިން ވިދާޅުވި، މިހާތަނަށް ހއ. އަތޮޅުގެ 3 ރަށަކަށް މަސްދަޅު ކޭސް ފޮނުވާފައިވާ ކަމަށެވެ. އެ އަތޮޅު މުރައިދޫގެ ގޭބިސީތަކަށް މަސްދަޅު ކޭސް ބަހައި ނިމިފައިވާއިރު، އެރަށުގެ 137 ގޭބިސީއަކަށް މަސްދަޅު ކޭސް ދޫކޮށްފައިވެއެވެ. މީގެ އިތުރުން ހދ. ފިނޭ އަދި ނޮޅިވަރަމްފަރުގައި މަސްދަޅު ބަހައި ނިމިފައިވާ ކަމަށް އެ ވުޒާރާއިން ވިދާޅުވިއެވެ. ފިނޭގެ 100 ގޭބީސީއަކަށް މަސްދަޅު ކޭސް ޙަވާލުކޮށްފައިވާއިރު، ނޮޅިވަރަމްފަރުގެ 350 ގޭބީސީއަކަށް މަސްދަޅު ކޭސް ޙަވާލުކޮށްފައިވެއެވެ. އަދި އެއަތޮޅު ނޮޅިވަރަމުގައި މަސްދަޅު ކޭސް ބެހުމުގެ މަސައްކަތް ދަނީ ކުރަމުންނެވެ.
ރާއްޖޭގެ އުތުރުން ނ. އަތޮޅަށްވެސް މިހާރު މަސްދަޅު ކޭސް ވަނީ ފޮނުވާފައެވެ. އަދި ޅ. އަތޮޅުގެ 4 ރަށަކަށް މަސްދަޅު ކޭސް ފޮނުވާފައިވާއިރު، އެއަތޮޅުގެ އޮޅުވެލިފުށީގައި މިހާރު މަސްދަޅު ކޭސް ގޭބީސީތަކަށް ޙަވާލުކޮށް ނިމިފައިވާ ކަމަށް ސިޓީތަކާއި ބެހޭ ވުޒާރާއިން ވިދާޅުވިއެވެ. އޮޅުވެލިފުށީގެ 137 ގޭބީސީއަކަށް މަސްދަޅު ކޭސް ދޫކޮށްފައިވެއެވެ.
ރަމަޟާންމަހު ކޮންމެ ގޭބީސީއަކަށް މަސްދަޅު ކޭހެއް ހަދިޔާކުރުމަށް ނިންމަވާފައިވާކަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިޢުލާންކުރެއްވީ، ސަރުކާރަށް އެއް އަހަރު ފުރުމުގެ ކާމިޔާބީ ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. ރައީސްގެ ވަޢުދުފުޅާ އެއްގޮތަށް ގޭބީސީތަކަށް މަސްދަޅު ކޭސްތައް ބެހުމުގެ މަސައްކަތް މާލެ ސަރަޙައްދުގައި ކުރިއަށް ދާނީ، ކޮންމެ ރެއަކު 8:30އިން ފެށިގެން 11:00އަށް މަސްދަޅު ކޭސް ދޫކުރާނެއެވެ.
މަސްދަޅު ކޭސް ދޫކުރުމަށް ޕޯޓަލް މެދުވެރިކޮށް ޓޯކަން ނެގުމަށް ވަނީ ހުޅުވާލާފައެވެ. ކޮންމެ ރެއަކު 300 ޓޯކަންއަށް މަސްދަޅު ކޭސް ދޫކުރުމަށް ހަމަޖެހިފައިވާއިރު، ކޮންމެ ކަރަންޓް މީޓަރަކަށް މަސްދަޅު ކޭހެއް ދޫކުރާނެއެވެ.