އެޗްޑީސީން ލޭ ހަދިޔާކުރުމުގެ ހަރަކާތެއް

މޯލްޑިވްސް ބްލަޑް ސަރވިސަސްއަށް ދިމާވެފައިވާ ލޭ ލިބުމުގެ ދަތިކަމަށް ހައްލެއް ހޯދުމަށް އެހީތެރިވުމުގެ ގޮތުން، ހައުސިން ޑިވެލޮޕްމަންޓް ކޯޕަރޭޝަން، އެޗް.ޑީސީން ލޭ ހަދިޔާކުރުމުގެ ކޭމްޕެއް ކުރިއަށްގެންގޮސްފިއެވެ.

ލޭ ލިބުމުގައި ދަތިތަކެއް ހުރެގެން އާއްމު ފަރާތްތަކުގެ އެހީއަށް މޯލްޑިވްސް ބްލަޑް ސަރވިސަސްގެ ފަރާތުން ވަނީ މިދިޔަ ހަފްތާގައި އެދިފައެވެ.

އެޗް.ޑީ.ސީގެ ފަރާތުން އިސްނަގައިގެން ކުރިއަށްގެންދިޔަ މި ބްލަޑް ކޭމްޕް ކުރިއަށްދިޔައީ މިއަދު ހެނދުނު 9:30 އިން ހަވީރު 4:00 އަށެވެ. ތެލަސީމިއާ ސެންޓަރާއި ގުޅިގެން ކުރިއަށްގެންދިޔަ މި ކޭމްޕްގެ ތެރެއިން ލޭ ހަދިޔާކުރުމުގެ ފުރުސަތު އެޗްޑީސީގެ މުވައްޒަފުންނަށް ހުޅުވާލާފައިވާއިރު، އެ ކުންފުނީގެ ގިނަ އަދަދެއްގެ މުވައްޒަފުން ލޭ ހަދިޔާކޮށްފައިވާކަމަށް އެޗްޑީސީން ވިދާޅުވެއެވެ.

ޕީ.އެސް.އެމްއަށް މައުލޫމާތުދެއްވަމުން އެޗް.ޑީ.ސީގެ އެސިސްޓެންޓް ޕީއާރް މެނޭޖާރ މުހައްމަދު ސިރާޖް ވިދާޅުވީ އެޗް.ޑީ.ސީގެ ފަރާތުން މި ހަރަކާތް ކުރިޔަށް ގެންދިއުމުގެ މައިގަނޑު މަގްސަދަކީ، މޯލްޑިވްސް ބްލަޑް ސާވިސްއަށް ކުރިމަތިވެފައިވާ ލޭ ލިބުމުގެ ދަތިކަމަށް ހައްލެއް ހޯދުމަށް އެހީތެރިވުންކަމަށެވެ.

ޕީއެސްއެމް ނިއުސްއަށް މައުލޫމާތު ދެއްވަމުން ތެލެސީމިއާ ސެންޓަރުން ވިދާޅުވީ މިފަދަ ބްލަޑް ކޭމްޕުތައް ކުރިޔަށް ގެންދިއުމަކީ ވަރަށް މުހިއްމުކަމެއްކަމަށެވެ. ހަމައެއާއެކު ލޭހަދިޔާކުރުމުގައި ސަމާލުކަންދޭންޖެހޭ ކަންތައްތައް ފާހަގަކުރައްވަމުން، އުމުރުން 18 އަހަރުވެފައިވާ، އަދި ބަރުދަނުން 45 ކިލޯއަށްވުރެ މަތީގެ މީހުންނަށް ލޭ ހަދިޔާކުރެވޭނެކަމަށެވެ. ހަމައެއާއެކު، ލޭ ހަދިޔާކުރަން ބޭނުންވާ ފަރާތްތަކުން، ހުޅުމާލެ ފިޔަވަހި 1 ގައިވާ ތެލެސީމިއާ ސެންޓަރަށް ދިއުމުން އެ އިންތިޒާމް ހަމަޖެހޭނެކަމަށްވެސް އެ ސެންޓަރުން ވިދާޅުވެއެވެ.

މި ދުވަސްވަރު ލޭ ލިބުން ވަރަށް ބޮޑަށް ދަތިވެފައިވާއިރު، މޯލްޑިވިއަން ބްލަޑް ސަރވިސަސް، އެމްބީއެސްއިން ވިދާޅުވީ 6 ބާވަތެއްގެ ލޭ ވަރަށް އަވަހަށް އެ ސަރވިސްއަށް ބޭނުންވާ ކަމަށެވެ. އޭގެތެރޭގައި ހިމެނެނީ އޭ ޕޮޒިޓިވް، އޯ ޕޮޒިޓިވް، އޯ ނެގެޓިވް، ބީ ޕޮޒިޓިވް، ބީ ނެގެޓިވް އަދި އޭބީ ޕޮޒިޓިވްއެވެ.

ލޭ ހަދިޔާ ކުރަންދާއިރު 6 ގަޑިއިރުގެ ނިދި ހަމަވާން ޖެހެއެވެ. އަދި ލޭ ހަދިޔާ ކުރުމުގެ 1 ގަޑިއިރު ކުރިން ކޮންމެވެސް އެއްޗެއް ކާންޖެހޭނެއެވެ. ލެއަކީ ހަދިޔާ ކުރުމުން މެނުވީ އެއަށް ބޭނުންޖެހިފައިވާ ފަރާތްތަކަށް ލިބޭނެ އެއްޗެއްނޫނެވެ. އެހެންކަމުން ލޭ ހަދިޔާ ކުރުމަކީ، ކޮންމެ ފަރާތަކުންވެސް އިންސާނިއްޔަތަށްޓަކައި ކޮށްދޭ ކަމެއްގެ ގޮތުގައި ދެކެން ޖެހެއެވެ.

ކޮންމެ 3 މަހަކުން 1 ފަހަރު ލޭ ހަދިޔާ ކުރެވޭނެއެވެ. ރާއްޖޭގައި ލޭއަޅާ 660 އަށްވުރެ ގިނަ ކުދިން ތިބިއިރު މީގެތެރެއިން ގިނަ ކުދިން ޚިދުމަތް ހޯދަމުންދަނީ، ތެލަސީމިއާ ސެންޓަރުންނެވެ. އެހެންކަމުން ކޮންމެ ދުވަހަކު އެތައް ޕޮއިންޓެއްގެ ލޭ ބޭނުންވެއެވެ. ކުރިއަށް އޮތީ ރަމަޟާންމަހަށް ވުމާއިއެކު މިއީވެސް ލޭ ހޯދުމަށް ދަތި މަހަކަށް ވާނެ ކަމަށް އެމްބީއެސްއިން ވިދާޅުވެއެވެ.