ސޯޝަލް މީޑިއާ ހެކްކޮށްގެން ވައްކަންކުރި 10 މީހަކު ހައްޔަރުކޮށްފި

މީހެއްގެ ސޯޝަލް މީޑިއާ އެކައުންޓުތައް ކޮމްޕްރޮމައިޒްކޮށް، އޭނާގެ ހިއްސާ އޮންނަ ކުންފުނީގެ ބެންކު އެކައުންޓުން ގިނަ އަދަދެއްގެ ފައިސާ ނަގާފައިވާ މައްސަލައެއްގައި 10 މީހަކު ހައްޔަރުކޮށްފިއެވެ. މި މީހުން ހައްޔަރުކޮށްފައިވަނީ ކުންފުނީގެ އެކައުންޓުން 279,600އަށްވުރެ ގިނަ ރުފިޔާ ވަގަށް ނަގާފައިވާ މައްސަލައަކާ ގުޅިގެންނެވެ.

މި މައްސަލައާ ގުޅިގެން ހައްޔަރުކޮށްފައިވަނީ ލ. އިސްދޫ / ގުޑްލައިފް، އުމުރުން 59 އަހަރުގެ މުޙައްމަދު ޙަސަން އާއި ސ. ހިތަދޫ / އުދަ، އުމުރުން 26 އަހަރުގެ އަލީ ޢިރުފާނު އަޙްމަދުދީދީ އާއި ސ. ހިތަދޫ / ނަންރީތިގެ، އުމުރުން 38 އަހަރުގެ ޢަލީ ޝިރާޒު އާއި ހދ. ވައިކަރަދޫ / ޕެރިމްރޯޒް، އުމުރުން 39 އަހަރުގެ ޢަބްދުﷲ ނާފިޛްއެވެ.

އަދި ގއ. ކަނޑުހުޅުދޫ / ފޫހިވާގެ، މުޙައްމަދު ޢަލީ (42އ) އާއި މ. މާލޭގެއާގެ / މާލެ، މުޙައްމަދު ނުހާދު ޢަލީ (30އ) އާއި ހއ. ކެލާ / ޕެނަމާ، މުޙައްމަދު ސިމާދު (38އ) އާއި ގދ. ފިޔޯރީ / ހީނާމާގެ، އަލީ އިމްރާން (38އ) އާއި ގދ. ތިނަދޫ / ގުލްބަކާގެ، ޢަބްދުﷲ އިސްރާޤް (19އ) އަދި ކ. ހިންމަފުށި / މެޑޯޒް، މުޙައްމަދު އިބްރާހީމް (49އ)ވެސް މި މައްސަލާއިގައި ވަނީ ހައްޔަރުކޮށްފައެވެ.

މި މީހުންގެ ތެރެއިން އެކަކު ހިންމަފުށިން ހައްޔަރުކޮށްފައިވާއިރު، ތިން މީހަކު ހައްޔަރުކުރީ އައްޑޫ ސިޓީންނެވެ. އަދި ބާކީ ތިބި މީހުން ހައްޔަރުކޮށްފައިވަނީ މާލެއިންނެވެ.

ފުލުހުން ހާމަކުރި ގޮތުގައި، ހައްޔަރުކުރި މީހުންގެ ތެރެއިން 6 މީހުންނަކީ ސްކޭމްކޮށްގެން ހޯދާފައިވާ ފައިސާ އެ މީހުންގެ އަމިއްލަ އެކައުންޓުތަކަށް ޖަމާކޮށް ފައިސާ ނަގާފައިވާ މީހުންނެވެ. މީގެ އިތުރުން، އެކަކު ވަނީ ސްކޭމްގެ ފައިސާ އެކި ވިޔަފާރިތަކަށް ޖަމާކޮށްގެން މުދާ ގަނެފައެވެ. އަނެއް ތިން މީހުންނަކީ އެކި މީހުން އޭޓީއެމްތަކަށް ގެންގޮސް، އެ މީހުން މެދުވެރިކޮށް ފައިސާ ނެގުމަށްފަހު އެ ފައިސާއާ ހަވާލުވެފައިވާ މީހުންނެވެ.

މި ޖަނަވަރީ މަހުގެ 21 ވަނަ ދުވަހުން ފެށިގެން ކުރިއަށް ގެންދިޔަ މި އޮޕަރޭޝަންގައި ގޭންގު ކްރައިމް އިންވެސްޓިގޭޝަން ޔުނިޓާއި، ހިންމަފުށި ޕޮލިސް އަދި އައްޑޫ ސިޓީ ހިތަދޫ ޕޮލިސް ބައިވެރިވެފައިވެއެވެ. މި މީހުން ހައްޔަރުކުރީ ކޯޓު އަމުރުގެ ދަށުންނެވެ.

ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، މުޙައްމަދު އިބްރާހީމަށް 5 ދުވަސް، މުޙައްމަދު ޢަލީއާއި މުޙައްމަދު ޙަސަނަށް 7 ދުވަސް، އަދި ޢަލީ ޢިރުފާން އަޙްމަދުދީދީއަށް 10 ދުވަހުގެ ބަންދުގެ މުއްދަތެއް ވަނީ ދީފައެވެ. ބާކީ ތިބި ހަ މީހުން 15 ދުވަހަށް ބަންދުކުރުމަށް ކޯޓުން ވަނީ އަމުރުކޮށްފައެވެ.

މި މައްސަލަ ދިވެހި ފުލުހުންގެ ޚިދުމަތުގެ އެންޓި ސްކޭމް ސެންޓަރުން ދަނީ އިތުރަށް ތަހުގީގު ކުރަމުންނެވެ.