ސަރަހައްދީ ފުޓްސަލްގައި ރާއްޖެއިން ސިއްކަ ޖެހި ތާރީޚީ ތަށި

ސައުތު އޭޝިއަން ފުޓުބޯޅަ ފެޑެރޭޝަނުން މިވަނީ ފުރަތަމަ ފަހަރަށް، ފުޓްސަލްއަށް ޙާއްސަ ސަރަހައްދީ މުބާރާތެއް ބާއްވާފައެވެ.

ސާފް ފުޓްސަލް ޗެމްޕިއަންޝިޕްގެ ނަމުގައި ބޭއްވި މި މުބާރާތުގައި ޖުމްލަ ހަތް ޓީމުން ވާދަކޮށްފައިވެއެވެ. އެއީ ދިވެހިރާއްޖެ، އިންޑިއާ، ޕާކިސްތާން، ބަންގްލަދޭޝް، ސްރީލަންކާ، ބޫޓާން އަދި ނޭޕާލެވެ.

މުބާރާތް ފެށިއިރު، ފޭވަރިޓުންގެ ގޮތުގައި އޮތީ އިންޑިއާ، ޕާކިސްތާން އަދި ދިވެހިރާއްޖެއެވެ. ބައެއް ޤައުމުތަކުން ތަށްޓާމެދު ކުރީ އުންމީދެއް ނޫނެވެ. އޮތީ ޔަގީންކަމެކެވެ. ކުޅިވަރުގެ ވަޞީލަތްތައް ގިނަ، ކުރިއަރާފައިވާ ބައެއް ޤައުމުތަކުން، މިއީ އެ ޤައުމުތަކަށް ފުޓްސަލްގައި ލިބޭ ފުރަތަމަ ތަށި ހޯދާނެ މުބާރާތް ކަމަށް ދިޔައީ ބުނަމުންނެވެ.

އެހެންނަމަވެސް، ރާއްޖެ ފެނުނީ މާ "އަޑުގަދަ" ޤައުމެއްގެ ގޮތުގައެއް ނޫނެވެ. މާ ބަސް ގިނަ ޤައުމެއްގެ ގޮތުގައެއް ވެސް ނޫނެވެ. ފެނުނީ މަޑުމައިތިރި، ބަސްމަދު، އަމަލު ގިނަ ޤައުމެއްގެ ގޮތުގައެވެ. ކުރީ އުންމީދެކެވެ. ދުޢާއެކެވެ. މަސައްކަތެވެ.

މިއާއެކު މެޗަކަށްފަހު މެޗެއް ދިޔައީ ނަތީޖާ ނެރެމުންނެވެ. ރާއްޖޭގެ ޢަަމަލުތަކުގެ އަޑު، އެހެން ޤައުމުތަކުގެ ކީ ބަސްތަކުގެ އަޑަށްވުރެ ބާރުވާ މަންޒަރެވެ. ރާއްޖޭގެ މޮޅުކަމާއި، ކުޅަދާނަކަމުގެ ވާހަކަ ބުނެދިނީ މެޗުތަކުގެ ނަތީޖާއިންނެވެ. ތަށި ނަގާނެކަން ބުނެދިނީ ޖެހި ގޯލުތަކުންނާއި ބައިކޮޅަށް ވަން ގޯލުތަކުގެ އަދަދު މަދުކޮށްގެންނެވެ. ޖެހުނު ކޮންމެ މެޗެއް ކާމިޔާބުކޮށްގެންނެވެ.

ހަމައެކަނި ޗެމްޕިއަންކަން ހޯދީއެއް ނޫނެވެ. ކުޅުނު ހުރިހާ މެޗަކުން މޮޅުވެސް ވީއެވެ.

މިއާއެކު ރާއްޖެއަށް މިވަނީ، މި ސަރަހައްދުގެ އެހެން އެއްވެސް ޓީމަކަށް ނުލިބޭނެ ޝަރަފަކާއި ފަޚުރެއް ލިބިފައެވެ. ތާއަބަދަށް، ތާރީޚުގައި ސިއްކަޖެހި، ސީލްކުރެވުނު ރަން ކާމިޔާބީއެއް ހޯދާފައެވެ.

ސާފުން ބޭއްވި ފުރަތަމަ ސާފް ފުޓްސަލް ޗެމްޕިއަންޝިޕުގެ ޗެމްޕިއަނުންނަކީ ދިވެހިރާއްޖެއެވެ. ދިވެހިންނެވެ. ދުވަހަކު ވެސް އެކަން ބަދަލެއް ނުވާނެއެވެ. ނުވެސް ކުރެވޭނެއެވެ. އެ ޝަރަފެއް، އެ ފަޚުރެއް ނުގެއްލޭނެއެވެ.

އަންނަން އޮތް ޖީލުތަކުގައި ވެސް، ސަރަހައްދީ ފުޓްސަލްގެ ތާރީޚުގެ ފަތްފުށްތައް ހުޅުވާލާނަމަ ފެންނާނީ އެއްކަލަ 500،000 އެއްހައި މީހުން ދިރިއުޅުނު ދިވެހިރާއްޖެއިން، ބޮޑެތި ބިޔަ، އެތައް މިލިއަން މީހުން ދިރިއުޅުނު ޤައުމުތަކުގެ މައްޗަށް ކުރިހޯދައި، ފުރަތަމަ ސާފް ފުޓްސަލް ޗެމްޕިއަންޝިޕް ކާމިޔާބުކުރި ވާހަކައެވެ.

ބުނެދޭން މިއުޅޭ ހަގީގަތުގައި، ޤައުމީ ފުޓްސަލް ޓީމުން މި ހޯދި ކާމިޔާބީ ހާއްސަވާ ސަބަބެވެ. މިއީ ކިހާބޮޑު ކާމިޔާބީއެއް ކަމެވެ.

ކޯޗު ފާރޫކް ޒަކިރޯވް، އެސިސްޓަން ކޯޗު މުޙައްމަދު ފުހެއިދު އަދި އަޙްމަދު ނިޔާޒްގެ އިތުރުން ގޯލްކީޕަރު ކޯޗު އަޙްމަދު އަޙްސަންއާއި މެނޭޖަރު މުޙައްމަދު އުމެއިރަށް ޝުކުރުވެރިވާންޖެހޭ މިންވަރެވެ. ކީޕަރު ޒައިދާނާއި ނާޖިހުގެ އިތުރުން ކެޕްޓަން އިމްރާނާއި އަޙްމަަދު ހަމީދާއި އިޝާން އިބްރާޙީމްގެ އިތުރުން ޢަބްދުﷲ ޝާފިއުއާއި ޢަލީ ޝިޔާހާއި ހުސެއިން ޝަރީފް އަދި ހުސެއިން ސުހެއިލާއި ހުޒެއިފަތު ރަޝީދާއި އަޙްމަދު ރާހިލް، ޢަބްދުﷲ ޖުނައިދު، ޢަލީ ހައިސަމް އަދި ޢަލީ ޝަމާލް ޢަބްދުﷲ އަށް ވެސް ޝުކުރުވެރިވާންޖެހޭ ކަމެވެ.

މި ފާޙަގަކުރި ފަރާތްތަކަކީ ރާއްޖޭގެ ވެސް އަދި ސަރަހައްދީ ކުޅިވަރުގައި ވެސް، ތާރީޚުގައި ރަން އަކުރުން ފަވާލެވޭނެ ފަރާތްތަކެކެވެ.