އަޒްމީލްގެ ކަށު ނަމާދު ޢިޝާ ނަމާދަށްފަހު ހުޅުމާލޭގައި

ސްޓެލްކޯގައި ހިނގި އަލިފާނުގެ ޙާދިސާގައި ނިޔާވި އަޙްމަދު އަޒްމީލްގެ ކަށު ނަމާދު މިރޭ ޢިޝާ ނަމާދަށްފަހު ބޭއްވުމަށް ހަމަޖެހިއްޖެއެވެ.

ކަށު ނަމާދު އޮންނާނީ، ޢިޝާ ނަމާދަށްފަހު ހުޅުމާލޭ ސަހަރާ މިސްކިތުގައެވެ.

ޢުމުރުން 42 އަހަރުގެ އަޙްމަދު އަޒްމީލް ނިޔާވީ، މިދިޔަ މަހުގެ 26 ވަނަ ދުވަހު ހުޅުމާލޭ ބައު އިންޖީނުގޭގައި ހިނގި އަލިފާނުގެ ޙާދިސާގައެވެ. އަލިފާނުގެ ޙާދިސާގައި އަޒްމީލްގެ ހަށިގަނޑުގެ ބޮޑުބައެއް ވަނީ، ފިހިފައެވެ. އަޒްމީލް ނިޔާވީ، ތައިލެންޑުގެ ހޮސްޕިޓަލު އޭނާއަށް އިތުރު ފަރުވާ ދެމުންދަނިކޮށް މިމަހުގެ 11 ވަނަ ދުވަހުއެވެ.

މަރުޙޫމް އަޙްމަދު އަޒްމީލްގެ މައްޗަށް ކުރެވޭ ކަށުނަމާދު މިރޭގެ އިޝާ ނަމާދަށްފަހު މަސްޖިދުލް ޒައިދު ބިން ޘާބިތު (ހުޅުމާލޭ ސަހަރާ މިސްކިތް) ގައި އޮންނާނެ. މި ކަށުނަމާދުގައި ވީހާވެސް ގިނަ ބަޔަކު ބައިވެރިވުމަކީ އަޅުގަނޑުމެންގެ ވަރަށް ބޮޑު އެދުމެއް.
މާތް ﷲ މަރުޙޫމް އަޙްމަދު… pic.twitter.com/Le55AML3in

— STELCO (@STELCOMALDIVES) December 16, 2025

އަޒްމީލްގެ ހަށިގަނޑު އޭނާގެ ޢާއިލާގެ އެދުމުގެ މަތިން މާލެ ގެނެސް ކަށުނަމާދު ބޭއްވުމަށް ހަމަޖެހިފައިވަނީ، މިރޭ ޢިޝާ ނަމާދަށްފަހު ހުޅުމާލޭ ސަހަރާ މިސްކިތުގައެވެ.

ސްޓެލްކޯއިން ވަނީ، އަޒްމީލްގެ ކަށު ނަމާދުގައި ވީހާވެސް ގިނަ ބަޔަކު ބައިވެރިވެ ދިނުމަށް އެދިފައެވެ.

އަޒްމީލްއަކީ، ސްޓެލްކޯގައި 21 އަހަރަށްވުރެ ގިނަ ދުވަހު ޚިދުމަތްކޮށްފައިވާ މީހެކެވެ.