ފަންނުވެރި ޤާބިލް ދިވެހިން ރާއްޖެއިން ތަމްރީނުކުރުމަށްޓަކައި ސަރުކާރު މެދުވެރިވެގެން މަތީ ތަޢުލީމުގެ ޚިދުމަތް ފަށްޓަވާފައިވަނީ 1973 ވަނަ އަހަރުއެވެ. އެލައިޑް ހެލްތް ސަރވިސަސް ޓްރެއިނިންގ ސެންޓަރުގެ ނަމުގައިފެށި މި ސެންޓަރަކީ ފެކަލްޓީ އޮފް ހެލްތް ސައިންސަސް ފެށުމުގެ ކުރިން އޭރުގެ ހެލްތް މިނިސްޓްރީން އުފައްދަވާ މީހުން ތަމްރީނުކުރުމަށް އުފެއްދެވި ސެންޓަރެެކެވެ. އެގޮތުން އެންމެ ފުރަތަމަ ހިންގި ކޯހަކީ ކޮމިއުނިޓީ ހެލްތް ވޯކަރުން ތަމްރީނުކުރުމުގެ ކޯހެވެ.
ސްކޫލް ނިންމާ ދަރިވަރުން މެކޭނިކަލް އަދި އިލެކްޓްރިކަލް މަސައްކަތްތައް ދަސްކޮށްދިނުމަށް ވޮކޭޝަނަލް ޓްރެއިނިންގ ސެންޓަރުގެ ނަމުގައި 1975 ވަނަ އަހަރުގެ ތެރޭގައި ސެންޓަރެއް އުފެއްދެވިއެވެ. މި ސެންޓަރުގެ ނަން ފަހުން މޯލްޑިވްސް އިންސްޓިޓިއުޓް ފޮރ ޓެކްނިކަލް އެޑިއުކޭޝަން މަޓީގެ ނަމަށް ބަދަލުކުރެވުނުއެވެ.
އެޑިޔުކޭޝަން ޑިވެލޮޕްމަންޓް ސެންޓަރ، އީޑީސީއިން ކުރިއަށްގެންދެވި ޓީޗަރުން ތަމްރީނުކުރުމުގެ މަސައްކަތް ހިންގެވުމަށް މިކަމަށްޓަކައި 1984 ތެރޭގައި އިންސްޓިޓިއުޓް ފޮރ ޓީޗަރ އެޑިޔުކޭޝަން އުފެއްދެވިއެވެ. އަދި 1987 ވަނަ އަހަރު، ރާއްޖޭގެ ޓޫރިޒަމް ދާއިރާ އިތުރަށް ތަރައްޤީކުރުމަށް ހޮޓެލް އެންޑް ކޭޓްރިންގގެ ދާއިރާއަށް ޚާއްޞަ ސްކޫލެއް ވަނީ އުފައްދަވާފައެވެ. މެނޭޖްމަންޓް އަދި އެޑްމިނިސްޓްރޭޓިވް ދާއިރާއަށް މީހުން ތަމްރީނުކުރުމަށްޓަކައި މޯލްޑިވްސް ސެންޓަރ ފޮރ މެނޭޖްމަންޓް އެންޑް އެޑްމިނިސްޓްރޭޝަންގެ ނަމުގައި ސެންޓަރެއްވެސް އެއަހަރުގެ ތެރޭގައިވަނީ އުފައްދަވާފައެވެ.
މަތީ ތަޢުލީމުގެ ޚިދުމަތްތައް އިތުރަށް ފުޅާކުރުމުގެ މަސައްކަތްތަކުގެ ދަށުން 1998 ވަނަ އަހަރު މޯލްޑިވްސް ކޮލެޖް އިފް ހަޔަރ އެޑިޔުކޭޝަންގެ ނަމުގައި ކޮލެޖެއް ސަރުކާރުން އުފެއްދަވާ ޖެހިގެން އައި އަހަރު ހުރިހާ އިންސްޓިޓިއުޓްތަކާއި ސެންޓަރުތައް ކޮލެޖްގެ ދަށުން ހިންގަން ފެށިއެވެ. އަދި ހަމައެއަހަރުގެތެރޭގައި ދުރުން ދޭ ތަޢުލީމަށް ޚާއްޞަކޮށްގެން އިންސްޓިޓިއުޓެއް ޤާއިމުކުރިއެވެ. އަދި ޝަރީއާ އިން ލޯ ކިޔަވައިދޭނެ އިންޓިޓިއުޓެއްވެސް ވަނީ ޤާއިމްކުރައްވާފައެވެ.
ކޮލެޖުން ފުރަތަމަ ޑިގްރީ ޕްރޮގްރާމެއް ތަޢާރަފްކޮށްފައިވަނީ ދެހާސްވަނަ އަހަރުއެވެ.
ދެހާސް އެގާރަވަނަ ދިވެހިރާއްޖޭގެ ޤައުމީ ޔުނިވަރސިޓީއަށް ބަދަލުކޮށް މަތީ ތަޢުލީމުގެ ޚިދުމަތްތައް ވަނީ ފުޅާކޮށްފައެވެ. އެގޮތުން މިހާރު ޔުނިވަރސިޓީއިން ޕީއެޗްޑީ ފެންވަރަށް ކޯސްތައް ހިންގަމުންދާއިރު، އެޔުނިވަރސިޓީގައި ވަނީ ރިސާރޗްގެ ޚިދުމަތްވެސް ފަށާފައެވެ. ޤައުމީ ޔުނިވަރސިޓީގައި 9 ފެކަލްޓީއާއި 2 ސެންޓަރަކުން ޖުމްލަ 182 ކޯސް ދަނީ ހިންގަމުންނެވެ. މިއަހަރުގެތެރޭގައިވެސް އެޔުނިވަރސިޓީން ވަނީ ދެހާސް ބާވީސް ދަރިވަރުން ގްރެޖުއޭޓްވެފައެވެ. އަދި ދިގުމުއްދަތުގެ ކޯސްތަކުގައި ހަހާހަށްވުރެ ގިނަ ދަރިވަރުން ކިޔަވަމުންދާއިރު، ކުރު ކޯސްތަކުގައި ތިންހާހަށްވުރެ ގިނަ ދަރިވަރުން ދަނީ ތަޢުލީމު ޙާޞިލްކުރަމުންނެވެ.
ޔުނިވަރސިޓީގެ ވައިސް ޗާންސެލަރ ޑޮކްޓަރ ޢަލީ ފަވާޒް ޝަރީފް ވިދާޅުވީ ޔުނިވަރސިޓީން ކޯސްތައް ހިންގުމުގައި އެންމެ އިސްކަމެއްދެނީ ފެންވަރު ރަނގަޅު ކޯސްތަކެއް ހިންގުމަށްކަމަށެވެ. އަދި އެޔުނިވަރސިޓީއަކީ މިސަރަޙައްދުގެ ނަމޫނާ ޔުނިވަރސިޓީއަކަށްވެ އެނަމޫނާ ދެކެން ސްޓަޑީ ވިޒިޓްތަކުގައި ޤައުމީ ޔުނިވަރސިޓީއަށް އެހެން ޔުނިވަރސިޓީތަކުން އައުމަކީ މި އަމާޒަށް ވާސިލްވެވޭ ދުވަސްކަމުގައި ވިދާޅުވިއެވެ.
ސާޅީސް ތިން އަހަރުގެ ޚިދުމަތާ ގުޅިގެން އެޔުނިވަރސިޓީގެ އެކި ފެކަލްޓީތަކުގައި ދަނީ އެކި ޙަރަކާތްތައް ހިންގަމުންނެވެ.